Samweli Wakutoma
9 Pakhali mamuna mʼbodzi wa ku Bhenjamini akhacemerwa Kisi,+ iye akhali mwana wa Abhiyeli, mwana wa Zerori, mwana wa Bhekorati, mwana wa Afiya. Iye akhali wa dzindza ya Bhenjamini,+ pontho akhali wakupfuma kakamwe. 2 Iye akhali na mwana akhacemerwa Sauli,+ wakuti akhali mʼphale wakubalika. Pakati pa Aizraeli nee pakhali na munthu unango wakubalika kakamwe kupiringana iye, pontho akhali wakulapha kakamwe, anthu onsene akulapha akhadhromera mʼmapewa mwace.
3 Ntsiku inango maburu* a Kisi atayika, natenepa iye apanga mwanace akhacemerwa Sauli: “Kwata nyabasa mʼbodzi toera muende kasake maburu.” 4 Iwo apita na kucisa ca mapiri ca ku Efraimu na ku dziko ya Salisa, mbwenye nee aaona. Apita na ku dziko ya Salimu, mbwenye maburu nee akhali kweneko. Iwo afamba dziko yonsene ya dzindza ya Bhenjamini, mbwenye nee aaona.
5 Pidafika iwo mu dziko ya Zufi, Sauli apanga nyabasa akhali na iye kuti: “Tende tibwerere, gopa baba anapswipa ntima thangwi ya ife mʼmbuto mwakudzudzumika na maburu.”+ 6 Mbwenye nyabasa antawira: “Mu nzinda uyu muli na munthu wa Mulungu wakuti asalemedzwa. Pyonsene pinalonga iye pisacitika.+ Tende kuna iye, panango anatipangiza njira inafunika ife kuenda nayo.” 7 Natenepa, Sauli abvundza nyabasa wace: “Tingaenda kweneko, tinakwatanji toera kupasa mamuna unoyu? Mʼmabudu mwathu nkhabemo mikate; nkhabemo cinthu toera kupasa munthu wa Mulungu wandimomwene ninga muoni. Ninji ciri na ife cakuti tinakwanisa kumpasa?” 8 Natenepa, nyabasa atawira pontho Sauli: “Pano ndiri na kobiri ingʼono ya parata. Ndinapereka kobiri ineyi kuna munthu wa Mulungu wandimomwene, natenepa iye anadzatipanga njira inafunika ife kuenda nayo.” 9 (Kale mu Izraeli, munthu angafuna kusaka citsogolero ca Mulungu akhalonga: “Tendeni kuna munthu anaona masomphenya.”+ Thangwi anthu anacemerwa aprofeta lero, kale akhacemerwa anthu anaona masomphenya.) 10 Sauli apanga nyabasa wace: “Maonero adidi, tende.” Natenepa iwo aenda ku nzinda ukhali na munthu wa Mulungu wandimomwene.
11 Pikhaenda iwo ku nzinda unoyu, agumanikana na atsikana akhaenda katunga madzi, mbaabvundza: “Munthu anaona masomphenya+ ali mphimba zino?” 12 Iwo atawira: “Inde. Iye ali kweneko kunaenda imwe. Cimbizani, lero iye ali mu nzinda, thangwi anthu anapereka ntsembe+ lero pa nthunda.+ 13 Mungapita mu nzinda, munanʼgumana mbadzati kuenda kadya pa nthunda. Anthu nee anadya, iye mbadzati kufika, thangwi ndiye anapasa nkhombo ntsembe. Buluka penepo anthu adacemerwa asadya. Ndokoni, munanʼgumana cincino.” 14 Natenepa iwo aenda ku nzinda. Pidapita iwo mu nzinda, aona Samweli akubwera kudzaonana nawo toera aende onsene pa nthunda.
15 Ntsiku ibodzi Sauli mbadzati kufika kweneko, Yahova akhadapanga* Samweli kuti: 16 “Mangwana ndzidzi ninga uno, ine ndinadzatuma kuna iwe munthu wa ku Bhenjamini.+ Usafunika kundzodza toera akhale ntsogoleri wa mbumba yanga ya Izraeli,+ pontho iye anadzapulumusa mbumba yanga mʼmanja mwa Afilisti. Thangwi ndaona kuthabuka kwa mbumba yanga, pontho ndabva kulira kwawo.”+ 17 Samweli pidaona iye Sauli, Yahova ampanga: “Unoyu ndi munthu adalonga ine, ‘Ndiye anafuna kudzatonga mbumba yanga.’”+
18 Sauli afendedzera Samweli pansuwo ukulu, mbambvundza: “Musadziwambo panyumba ya munthu anaona masomphenya?” 19 Samweli atawira Sauli: “Munthu anaona masomphenya ndine. Tendeni pa nthunda, pontho lero tinadya pabodzi.+ Mangwana namacibese munaenda ndingamala kukupangani pyonsene pinafuna imwe kudziwa.* 20 Lekani kudzudzumika na maburu adatayika ntsiku zitatu nduli,+ thangwi iwo agumanwa. Pinthu pyonsene pyadidi pya mu Izraeli ndi pya ani? Nee ndi pyako na pya anthu a panyumba pa babako?”+ 21 Sauli atawira: “Ine ndine wangʼono kakamwe pakati pa madzindza a Izraeli,+ pontho banja yathu ndi yakupwazika kakamwe pakati pa mabanja a dzindza ya Bhenjamini. Mphapo thangwi yanji imwe mukulonga mafala anewa?”
22 Buluka penepo, Samweli akwata Sauli pabodzi na nyabasa wace, mbaenda nawo mu sala yakudyera. Mwenemo aapasa mbuto yadidi kakamwe pakati pa anthu adacemerwa. Mu sala ineyi mukhali na anthu cifupi na 30. 23 Samweli apanga nyakuphika: “Bweresa phindi ya nyama idakupasa ine toera uikoye.” 24 Natenepa, nyakuphika abulusa mwendo wa nyama, mbauikha dhuzi na Sauli. Pontho Samweli alonga: “Nyama idakoyerwa iwe ndi iyi. Dya, yakoyiwa toera iwe uidye ndzidzi uno. Thangwi ine ndaapanga kuti: ‘Ndinatambira alendo.’” Pa ntsiku ineyi, Sauli na Samweli adya pabodzi pene. 25 Buluka penepo, iwo abuluka pa nthunda+ mbaenda ku nzinda, pontho iye apitiriza kucedza na Sauli padzulu panyumba. 26 Iwo alamuka namacibese kakamwe, pontho pikhaca kunja, Samweli acemera Sauli wakuti akhali padzulu panyumba, mbampanga: “Khunganyika toera uende.” Natenepa, Sauli akhunganyika mbabuluka kunja pabodzi na Samweli. 27 Pikhabuluka iwo mu nzinda, Samweli apanga Sauli: “Panga nyabasa+ toera atsogole, mbwenye iwe dikhira pangʼono toera ndikupange pidalonga Mulungu.” Natenepa nyabasa atsogola.