Kronika Waciwiri
15 Nzimu wa Mulungu wapita muna Azariya mwana wa Odhedhi. 2 Natenepa iye aenda kaonana na Aza, mbampanga: “Ndibvesereni imwe, Aza na anthu onsene a ku Yuda na ku Bhenjamini! Yahova anakhala na imwe mu ndzidzi unapitiriza imwe kukhala na iye;+ mungansaka munan’gumana,*+ mbwenye mungansiya, iye anadzakusiyani.+ 3 Aizraeli amala ndzidzi uzinji nee kutumikira Mulungu wandimomwene, nee kupfundziswa na anyantsembe, pontho nee akhakoya mwambo.+ 4 Mbwenye pikhali iwo pa nyatwa, pidabwerera iwo kuna Yahova Mulungu wa Izraeli, mbansaka, iwo an’gumana.*+ 5 Mu ndzidzi unoyu, nee m’bodzi akhakwanisa kucita ulendo mwakutsidzikizika,* thangwi anthu a mupisa pyenepi akhacita uviyaviya kakamwe. 6 Dzindza ibodzi ikhafudzwa na dzindza inango, nzinda ubodzi ukhafudzwa na nzinda unango, thangwi Mulungu akhapitiriza kuadzudzumisa na mitundu yonsene ya nyatwa.+ 7 Mbwenye imwe khalani amphambvu, pontho lekani kugopa,+ imwe munadzapaswa nkhombo thangwi ya mabasa anu.”
8 Aza pidabva iye mafala anewa na profesiya ya mprofeta Odhedhi, akhala na cipapo mbafudza madzimunthu mu dziko yonsene ya Yuda,+ ya Bhenjamini na m’mizinda inango idakunda iye mucisa ca mapiri ca ku Efraimu, mbasasanyira pontho guwa ya Yahova ikhali dhuzi na khonde ya nyumba ya Yahova.+ 9 Iye agumanyiza anthu onsene a ku Yuda na ku Bhenjamini, pabodzi na anthu a madziko anango akhali pakati pawo, anthu a dzindza ya Efraimu, ya Manase na ya Simeoni,+ thangwi azinji a iwo akhadathawa ku Izraeli mbaenda kuna Aza pidaona iwo kuti Yahova Mulungu wace akhali na iye. 10 Natenepa iwo agumanyikana ku Yerusalemu pa mwezi wacitatu wa caka 15 ca utongi wa Aza. 11 Pa ntsiku ineyi, mwa pinthu pidatapata iwo mbabwera napyo, apereka ng’ombe 700 na mabira 7.000 ninga ntsembe kuna Yahova. 12 Kusiyapo pyenepi, iwo acita cibverano toera kusaka Yahova Mulungu wa ambuyawo na ntima wawo onsene na umaso wawo onsene.+ 13 Ule wakuti nee mbadasaka Yahova Mulungu wa Izraeli, akhafunika kuphiwa, mwakukhonda tsalakana khala ndi nkulu peno mwana, mamuna peno nkazi.+ 14 Penepo iwo adumbira kuna Yahova mwakugaluza, pontho akhuwa mwakutsandzaya, mbaliza matuluka na nyanga. 15 Anthu onsene a ku Yuda akomerwa thangwi ya dumbiro ineyi, thangwi iwo acita dumbiro na ntima onsene, pontho akhansaka na cifuno cadidi, iye mbatawirisa kuti an’gumane;+ pontho Yahova aacitisa kuti akhale muntendere na anyamalwa awo onsene akhali n’khundu mwawo.+
16 Mambo Aza abulusambo yavu wace wankazi akhacemerwa Maaka+ pa cidzo cikhali na iye ninga mai wace mambo,* thangwi iye akhadacita dzimunthu yakunyanyasa toera kulambira nayo muti wakulambirwa.*+ Aza agwisa dzimunthu ineyi yakunyanyasa, aigwanda-gwanda mbaipisa ku Gowa ya Sidhroni.+ 17 Mbwenye mbuto zikhalambira anthu nee zafudzwa+ mu Izraeli.+ Ngakhale tenepo, Aza aperekeka na ntima wace onsene kuna Mulungu mu umaso wace onsene.+ 18 Pontho iye apitisa n’nyumba ya Mulungu wandimomwene parata, ouro na pyombo pyakusiyana-siyana+ pyakuti iye na babace akhadapicenesa. 19 Mu dziko ineyi nee mwaoneka nkhondo mpaka pa caka 35 ca utongi wa Aza.+