Kronika Waciwiri
19 Natenepa Yosafate abwerera kunyumba kwace ku Yerusalemu muntendere.+ 2 Jeu+ mwana wa mprofeta Anani,+ aenda kuna Mambo Yosafate mbampanga: “Iwe usanyerezera kuti ndi pyadidi kuphedza+ anthu akuipa mbufuna anthu anaida Yahova?+ Nakuti wacita pyenepi, Yahova aipirwa na iwe. 3 Ngakhale tenepo, Mulungu aona pinthu pyadidi muna iwe,+ thangwi iwe wafudza miti inalambirwa mu dziko, pontho iwe wakhunganya ntima wako toera kutumikira Mulungu wandimomwene.”+
4 Yosafate apitiriza kukhala mu Yerusalemu, iye aenda pontho kaona mbumba kutomera ku Bhersebha mpaka kucisa ca mapiri ca ku Efraimu,+ iye awangisa mbumba toera ilambire pontho Yahova Mulungu wa ambuyawo.+ 5 Iye aikhambo anyakutonga miseru mu nzinda ubodzi na ubodzi wakutsidzikizwa na mpanda mu dziko yonsene ya Yuda.+ 6 Iye apanga anyakutonga miseru: “Citani mphole-mphole na pinacita imwe, thangwi imwe mukutonga+ mu dzina ya Yahova, tayu mu dzina ya anthu. 7 Natenepa, musafunika kugopa Yahova.+ Citani mphole-mphole na pinacita imwe, thangwi Yahova Mulungu wathu nkhabe kutawirisa kusowa ulungami,+ tsankhulo,+ nee kudyekerwa.”+
8 Mu Yerusalemu, Yosafate aikhambo Alevi angasi, anyantsembe na atsogoleri a madzindza a Izraeli toera atumikire ninga anyakutonga miseru a Yahova, pontho toera kutonga miseru ya anthu anakhala mu Yerusalemu.+ 9 Iye aapanga tenepa: “Ipi ndipyo pinafunika imwe kucita mwakukhulupirika, pontho na ntima onsene thangwi yakugopa Yahova: 10 Ndzidzi onsene abale anu anakhala m’mizinda inango angabweresa nseru wa kupha munthu,+ kukhonda kubvera mwambo, pitsogolero, matongero peno mitemo, musafunika kuacenjeza toera iwo akhonde khala na mulando kuna Yahova; thangwi mungakhonda kucita pyenepi iye anaipirwa na imwe pabodzi na abale anu. Pyenepi ndipyo pinafunika imwe kucita toera mukhonde kukhala na mulando. 11 Uyu ndi Amariya nyantsembe wankulu, wakuti ndiye anafuna kukutsogolerani pakuphata mabasa onsene a Yahova.+ Zebhadhiya mwana wa Ijimaeli ndiye anafuna kutsogolera dzindza ya Yuda m’mabasa onsene a mambo. Alevi anadzakutumikirani ninga atsogoleri. Khalani amphambvu mbamucita pinthu, pontho Yahova mbakhale na ale anacita pinthu pyadidi.”+