Kronika Waciwiri
12 Umambo wa Robhoamu pidakhala iwo wakuwanga,+ iye mbakhala wamphambvu, mwakukhonda dembuka, iye asiya Mwambo wa Yahova,+ pontho Aizraeli onsene acitambo pibodzi pyene. 2 Nakuti iwo asiya kukhala akukhulupirika kuna Yahova, Sizaki+ Mambo wa ku Ejitu abwera kudzamenyana na Yerusalemu pa caka cacixanu ca utongi wa Mambo Robhoamu. 3 Iye akhali na ngolo 1.200 za nkhondo, anyamakavalo 60.000 na anyankhondo akukhonda lengeseka adabwera na iye buluka ku Ejitu, akuti akhali anthu a ku Libhiya, Sukimu na ku Etiopya.+ 4 Iye akunda mizinda yakutsidzikizwa na mipanda mu dziko ya Yuda, mbafika ku Yerusalemu.
5 Mprofeta Semaya+ aenda kuna Robhoamu na kuna atsogoleri a ku Yuda, adagumanyikana mu Yerusalemu thangwi ya Sizaki, mbaapanga: “Yahova alonga tenepa: ‘Imwe mwandisiya, na thangwi ineyi, ine ndinakuperekani+ m’manja mwa Sizaki.’” 6 Natenepa, akulu a Izraeli na mambo acepeseka+ mbalonga: “Yahova ndi wakulungama.” 7 Pidaona Yahova kuti iwo acepeseka, Yahova atumiza mafala awa kuna Semaya: “Iwo acepeseka. Ine nee ndinaafudza,+ mbwenye mwakukhonda dembuka ndinaaombola. Nee ndinaphatisira Sizaki toera kupangiza kuipirwa kwanga thangwi ya Yerusalemu. 8 Mbwenye iwo anadzakhala atumiki ace, natenepa iwo anadziwa kusiyana kwa kutumikira ine na kutumikira amambo a madziko anango.”
9 Sizaki Mambo wa ku Ejitu abwera toera kumenyana na Yerusalemu. Iye akwata mpfuma za panyumba ya Yahova+ na mpfuma za panyumba ya mambo. Iye akwata pinthu pyonsene, kuphatanizambo maxango a ouro adacita Salomoni.+ 10 Na thangwi ineyi, Mambo Robhoamu acita maxango a nkuwa toera kuaikha pa mbuto ya ale adakwatwa, buluka penepo aapereka kuna atsogoleri a anyakuonera,* akuti akhaonera nsuwo wa nyumba ya mambo. 11 Ndzidzi onsene ukhaenda mambo kunyumba ya Yahova, anyakuonera akhabwera mbakwata maxango anewa, buluka penepo akhaabweza nkwartu ya anyakuonera. 12 Nakuti mambo acepeseka, Yahova nee apangiza kuipirwa kwace kuna iye,+ pontho iye nee aafudza onsene.+ Kusiyapo pyenepi, pakhali pinthu pyadidi pikhacita anthu a ku Yuda.+
13 Mambo Robhoamu awangisa umambo wace ku Yerusalemu mbapitiriza kutonga. Robhoamu akhali na pyaka 41 pyakubalwa pidakhazikiswa iye ninga mambo, pontho iye atonga pyaka 17 mu Yerusalemu, wakuti ndi nzinda udasankhula Yahova pakati pa mizinda ya madzindza onsene a Izraeli toera dzina yace ikhale mwenemu. Mai wace mambo akhacemerwa Naama wa dzindza ya Amoni.+ 14 Mbwenye iye acita pinthu pyakuipa, thangwi muntima mwace, iye nee asankhula kusaka citsogolero ca Yahova.+
15 Mphangwa zinalonga pinthu pidacitika mu umaso wa Robhoamu, kubulukira pakutoma mpaka kunkhomo zalembwa m’mabukhu a mprofeta Semaya+ na a mprofeta Idho,+ mwakubverana na mphangwa za madzindza. Ndzidzi onsene pakhaoneka nkhondo pakati pa Robhoamu na Yerobhoamu.+ 16 Pakumalisa, Robhoamu afa ninga pidacita ambuyace, mbaikhwa munthumbi mu Nzinda wa Dhavidhi.+ Mwanace akhacemerwa Abhiya,+ adzakhala mambo pa mbuto yace.