Kronika Wakutoma
21 Sathani* atoma kuthimbana na Aizraeli mbakulumiza Dhavidhi toera kulembera Aizraeli.+ 2 Natenepa Dhavidhi apanga Yoabhe+ na atsogoleri a mbumba: “Ndokoni kalengese anthu onsene a dzindza ya Izraeli kutomera ku Bhersebha mpaka ku Dhani,+ mungamala bweresani mphangwa toera ndidziwe kuti alipo angasi.” 3 Mbwenye Yoabhe alonga: “Yahova mbanjipise mbumba yace m’maulendo 100. Mbuyanga mambo, kodi iwo onsene nee ndi atumiki anu? Thangwi yanji mbuyanga mambo musafuna kucita pyenepi? Thangwi yanji musafuna kubweresa mulando kuna Izraeli?”
4 Mbwenye mambo akhonda kubvera pidalonga Yoabhe. Natenepa Yoabhe abuluka, mbafamba mu dziko yonsene ya Izraeli, pidamala iye abwerera ku Yerusalemu.+ 5 Yoabhe apereka kuna Dhavidhi numero ya anthu adalengeswa. M’madzindza onsene a Izraeli mukhali amuna akukwana 1.100.000 akuti akhali na masupada, pontho ku Yuda akhalipo amuna akukwana 470.000 akuti akhali na masupada.+ 6 Mbwenye anthu a dzindza ya Levi na ya Bhenjamini nee alengeswa,+ thangwi Yoabhe nee akomerwa* na mafala a mambo.+
7 Mulungu wandimomwene aipirwa kakamwe na pyenepi, na thangwi ineyi, iye atcunyusa Izraeli. 8 Penepo Dhavidhi apanga Mulungu wandimomwene: “Ine ndadawa+ kakamwe pidacita ine pinthu pyenepi. Ndaphata miyendo, lekererani madawo a ntumiki wanu,+ thangwi ine ndacita pinthu mwakusowa ndzeru.”+ 9 Buluka penepo, Yahova apanga Gadhi,+ nyakuona masomphenya wa Dhavidhi mbampanga: 10 “Ndoko kapange Dhavidhi kuti: ‘Yahova alonga: “Ndiri na pinthu pitatu, sankhula cinafuna iwe toera ine ndikucitire.”’” 11 Natenepa Gadhi aenda kuna Dhavidhi mbampanga: “Ipi ndi pidalonga Yahova: ‘Sankhula cinafuna iwe: 12 Pyaka pitatu pya njala;+ kumala miyezi mitatu mbukakundwa na anyamalwa ako mu ndzidzi wakuti ukutcunyuswa na supada ya anyamalwa ako;+ peno ntsiku zitatu za kutcunyuswa na supada ya Yahova, yakuti ndi muliri unafuna kuoneka mu dziko yanu,+ mu ndzidzi wakuti anju wa Yahova anadzapha+ anthu mu dziko yonsene ya Izraeli.’ Cincino ndipange pinafunika ine kuenda kalonga kuna Ule adandituma.” 13 Penepo Dhavidhi apanga Gadhi: “Pyenepi pisanditsukwalisa kakamwe. Ndaphata miyendo, lekani tawirisa kuti nditcunyuswe na anthu,+ mbwenye tawirisani kuti nditcunyuswe na Yahova thangwi ntsisi zace ndi zikulu kakamwe.”+
14 Buluka penepo, Yahova abweresa muliri+ kuna Aizraeli, natenepa anthu 70.000 afa mu dziko ya Izraeli.+ 15 Kusiyapo pyenepi, Mulungu wandimomwene atuma anju wace toera kufudza Yerusalemu. Mbwenye pikhafuna iye kufudza, Yahova atsukwala* thangwi ya muliri udabweresa iye,+ pontho iye apanga anju akhapha anthu kuti: “Pyakwana!+ Gwisa nkono wako.” Anju wa Yahova akhali dhuzi na mbuto yakububudira pinthu* ya Ornani+ wakuti ndi Muyebusi.+
16 Dhavidhi pidalamusa iye maso ace, aona anju wa Yahova pakati, uku kudzulu uku dziko yapantsi, akhali na supada+ m’manja mwace mbakathonya nayo Yerusalemu. Dhavidhi na akulu a mbumba akhadabvala masakha,+ iwo agodama pantsi mwakucimbiza mbakotamisa misolo yawo mpaka pantsi.+ 17 Dhavidhi apanga Mulungu wandimomwene: “Kodi sine tayu adaphemba toera mbumba ilengeswe? Adadawa ndine, pontho adacita pinthu pyakuipa ndine;+ mphapo anthu* awa, ninji pidacita iwo? Yahova Mulungu wanga, ndaphata miyendo, tcunyusani pyanu ine na anthu a panyumba ya babanga; mbwenye lekani kubweresa miliri ineyi kuna mbumba yanu.”+
18 Penepo anju wa Yahova apanga Gadhi+ toera aende kapanga Dhavidhi kuti aende kamange guwa ya Yahova pa mbuto yakububudira pinthu* ya Ornani, Muyebusi.+ 19 Natenepa Dhavidhi aenda mwakubverana na pidapangwa iye na Gadhi, pidalonga iye mu dzina ya Yahova. 20 Pa ndzidzi unoyu, Ornani azungunuka mbaona anju, anace anai akhali na iye abisala. Ornani akhabubuda tirigu. 21 Dhavidhi pidafika iye dhuzi, Ornani ayang’ana mbaona Dhavidhi, abuluka mwakucimbiza pa mbuwa, agodamira Dhavidhi mbakotamisa nsolo wace mpaka pantsi. 22 Dhavidhi apanga Ornani: “Ndigulisire* mbuto yako yakububudira pinthu* toera ndimangepo guwa ya Yahova. Ndigulisire na ntengo onsene wakuthema toera muliri umale pakati pa mbumba.”+ 23 Ornani apanga Dhavidhi: “Ikwateni pyanu mbuyanga mambo, pontho citani penepo pyonsene pinaona imwe kuti ndi pyadidi. Kwatani ng’ombe izi toera kupereka ntsembe zakupiswa, kwatanimbo cakububuda naco+ toera mucite nkhuni, na tirigu toera kupereka ntsembe za pyakudya. Ndiri kukupasani pyonsene.”
24 Mbwenye mambo Dhavidhi apanga Ornani: “Nkhabe, ine ndinaigula na ntengo wakuthema! Nee ndinakwata pinthu pyako toera kupasa Yahova, peno kupereka ntsembe zakupiswa za pinthu pidakhonda ine kugula.”+ 25 Natenepa Dhavidhi apasa Ornani masiklo* 600 a ouro toera kulipa mbuto ineyi. 26 Dhavidhi amangira Yahova guwa+ pa mbuto ineyi, mbapereka ntsembe zakupiswa na ntsembe toera kupereka takhuta.* Acemera* dzina ya Yahova, penepo iye atawira, mbatumiza moto+ buluka kudzulu mbupisa ntsembe ikhali pa guwa. 27 Buluka penepo, Yahova apanga anju+ toera aikhe supada yace mu mbuto mwayo. 28 Dhavidhi pidadzindikira iye kuti Yahova atawira phembo yace pa mbuwa ya Ornani, Muyebusi, iye apitiriza kupereka ntsembe pa mbuto ineyi. 29 Mbwenye tabhernakulo ya Yahova idacitwa na Mose n’thando, pabodzi na guwa ya ntsembe zakupiswa pikhali pa mbuto yakucena ku Jibheyoni.+ 30 Ngakhale tenepo, Dhavidhi nee akhakwanisa kuenda kweneko toera kusaka citsogolero ca Mulungu, thangwi iye akhagopa supada ya anju wa Yahova.