TSAMBA YACIWIRI KUNA AKRISTU A KU KORINTO

1 Ine Paulu, mpostolo wa Kristu Yezu mwakubverana na pinafuna Mulungu, pabodzi na mʼbale wathu Timoti,+ ndiri kulembera mpingo wa Mulungu uli ku Korinto, kuphatanizambo anthu onsene akucena ali mucisa consene ca Akaya:+

2 Mulungu Babathu pabodzi na Mbuya Yezu Kristu, apangize kukoma ntima kukulu kuna imwe, pontho mbakupaseni ntendere.

3 Mbasimbwe Mulungu Baba wa Mbuyathu Yezu Kristu,+ Baba wantsisi zikulu,+ Mulungu wacibalangazo consene,+ 4 wakuti asatibalangaza* mu nyatwa zathu zonsene,*+ toera na cibalangazo cinatambira ife kuna Mulungu,+ tikwanisembo kubalangaza ale+ anathimbana na ntundu onsene wa nyatwa. 5 Nakuti nyatwa zinaona ife thangwi ya Kristu ndi zizinji,+ tenepambo cibalangazo cinatambira ife mwa Kristu ndi cizinji. 6 Khala ife tisathimbana na nyatwa* zizinji, ndi toera kukubalangazani, pontho toera mupulumuke; khala ife tisatambira cibalangazo, ndi toera imwembo mutambire cibalangazo. Cibalangazo ceneci cinakuphedzani toera kupirira nyatwa zinaonambo ife. 7 Pontho cidikhiro cathu kuna imwe ndi cakuwanga, thangwi ife tisadziwa kuti ninga munaonera imwe nyatwa pabodzi na ife, imwembo munadzabalangazwa+ pabodzi na ife.

8 Abale, ife nee tisafuna kuti imwe mukhale anthu akukhonda dziwa pya nyatwa idaona ife mu provinsya ya Azya.+ Ife taona nyatwa zakunentsa kakamwe zakuti nee mbatidakwanisa kuzipirira na mphambvu zathu; natenepa, nee tikhanyindira kuti mbatidapulumuka.+ 9 Mwandimomwene, ife tikhanyerezera kuti tinafa. Pyenepi pyacitika toera ife tikhonde kunyindira mphambvu zathu, mbwenye toera tinyindire Mulungu,+ wakuti asakwanisa kulamusa anyakufa. 10 Iye atiombola pangozwi ineyi ikulu yakufa, pontho anadzatiombola. Ife tisanyindira kuti iye anapitiriza kutiombola.+ 11 Imwe munakwanisambo kutiphedza mungaticitira maphembero akudembetera;+ natenepa, anthu azinji anapereka takhuta thangwi ya ciphedzo cinatambira ife cakuti ndi ntawiro wa maphembero a anthu azinji.+

12 Cinthu cinatigayisa ndi cakuti ife tiri na cikumbuntima cadidi, thangwi pikhali ife pakati pa anthu a dziko, makamaka pakati panu, ife tapangiza makhaliro akucena na adidi mwakubverana na pinapfundzisa Mulungu, tayu mwakubverana na udziwisi wa anthu,+ mbwenye mwakubverana na kukoma ntima kukulu kwa Mulungu. 13 Thangwi mwandimomwene, ife nee tisakulemberani pinthu pyakuti nee munakwanisa kupileri* peno kupibvesesa, ndisadikhira kuti imwe munapitiriza kubvesesa mwadidi* pinthu pyenepi, 14 ninga imwembo mwafika pa kudzindikira kuti ife ndife thangwi inakucitisani kugaya, munjira ibodzi ene, imwe munadzakhalambo thangwi inafuna kuticitisa kugaya pa ntsiku ya Mbuyathu Yezu.

15 Na cinyindiro ceneci, pakutoma ine ndikhafuna kudzakuonani kaciwiri toera imwe mutsandzaye pontho;* 16 thangwi ine ndikhafuna kupita mbandikuonani pakuenda kwanga ku Masedhonya, buluka penepo ndibwerere pontho kuna imwe buluka ku Masedhonya, toera mundiperekere pangʼono pakuenda kwanga ku Yudeya.+ 17 Kodi pikhafuna ine kucita pyenepi, nee ndatoma kupinyerezera mwadidi? Peno ndikhanyerezera kucita pinthu ninga munacitira anthu a dziko, mbandilonga “inde,” buluka penepo mbandilonga “nkhabe”? 18 Mbwenye nakuti Mulungu ndi wakunyindirika, pinakupangani ife nee ndi “inde” mu ndzidzi ubodzi ene mbapikhala “nkhabe.” 19 Thangwi Mwana wa Mulungu, Yezu Kristu, wakuti ine, Silvano* na Timoti,+ takumwazirani mphangwa zinalonga pya iye, nee asalonga “inde” buluka penepo mbalonga “nkhabe,” mbwenye angalonga “inde,” ndzidzi onsene asakhala “inde.” 20 Thangwi mwakukhonda tsalakana kunjipa kwa mapikiro a Mulungu, iwo asakhala “inde”* kubulukira mwa iye.+ Natenepa, kubulukira mwa iye, ife tisalonga “Ameni” kuna Mulungu+ toera apaswe mbiri kubulukira mwa ife. 21 Mbwenye Mulungu,+ ule adatidzodza, ndiye anatipasa cinyindiro cakuti imwe na ife ndife anthu a Kristu. 22 Iye atiikhambo cidzindikiro.+ Cidzindikiro ceneci ndi nzimu wakucena+ mʼmitima yathu, wakuti ndi pikiro ya* pinthu pinafuna kudza.

23 Ine ndidzati kubwera ku Korinto thangwi nee ndisafuna kuthimizira kutsukwala kwanu, Mulungu ndi mboni wa pinthu pyenepi. 24 Pyenepi nee pisabveka kuti ndife anyakutonga cikhulupiro canu,+ mbwenye ife ndife anyabasa andzanu toera mukhale akutsandzaya, thangwi imwe muli akuwanga kubulukira mu cikhulupiro canu.

2 Thangwi ine ndanyerezera kuti paulendo wanga unafuna kudza nee ndisafunika kukutsukwalisani pontho. 2 Kodi ine ndingakutsukwalisani, mbani anafuna kunditsandzayisa, kusiyapo imwe adatsukwalisa ine? 3 Na thangwi ineyi, ine ndakulemberani pinthu pyenepi, toera ndingabwera kuna imwe ndikhonde kutsukwaliswa na ale akuti akhafunika kunditsandzayisa, thangwi ndiri na cinyindiro cakuti pinthu pinanditsandzayisa pisatsandzayisambo imwe monsene munjira ibodzi ene. 4 Ine ndakulemberani tsamba ineyi mwakunentseka na mwakutsukwala muntima, pabodzi na misozi mizinji, tayu toera kukutsukwalisani,+ mbwenye toera mudziwe kuti ine ndisakufunani kakamwe.

5 Khala alipo adacita cinthu cakutsukwalisa,+ iye nee atsukwalisa ine, mbwenye atsukwalisa imwe monsene. Ngakhale tenepo, ine nee ndisafuna kugomezera kakamwe pyenepi. 6 Nakuti munthu unoyu asandikwa na anthu azinji, pyakwana; 7 cincino, imwe musafunika kumulekerera na ntima onsene, mbamumʼbalangaza,+ toera iye akhonde kukundwa* thangwi yakutsukwala kakamwe.+ 8 Natenepa, ine ndisakuwangisani toera mupangize kuna iye kuti imwe musanfuna.+ 9 Na thangwi ineyi, ine ndakulemberani toera ndione khala imwe munapangiza kuti ndimwe anthu akubvera mu pinthu pyonsene. 10 Imwe mungalekerera munthu thangwi ya cinthu cidacita iye, ine ndinamulekererambo. Mwandimomwene, cinthu consene cidalekerera ine, (khala ciripo cikhafunika ine kulekerera), ndacita pyenepi toera kuphedza imwe pamaso pa Kristu, 11 toera tikhonde kukundwa na Sathani,+ thangwi ife tisadziwa mwadidi njira zinaphatisira* iye toera kutinyengeza.*+

12 Pidafika ine ku Troadhe+ toera kumwaza mphangwa zadidi zinalonga pya Kristu, mbandifungulirwa nsuwo mʼbasa ya Mbuya, 13 ntima wanga wanentseka kakamwe thangwi yakukhonda kugumana mʼbale wanga Tito.+ Natenepa, ndapangana abale kweneko, mbandienda ku Masedhonya.+

14 Mbwenye tisapereka takhuta kuna Mulungu, wakuti ndzidzi onsene asatitsogolera munafamba ife pabodzi na Kristu ninga anyankhondo akuwina. Pontho kubulukira mwa ife, khwema ya cidziwiso cace isamwazika* konsene kwene! 15 Thangwi kuna Mulungu, ife ndife khwema yadidi ya Kristu pakati pa ale akuti ali kuenda kapulumuswa na kuna ale akuti ali kuenda kafudzwa; 16 kuna ale akuti ali kuenda kafudzwa, ndife khwema yakufa inabweresa kufa,+ kuna ale akuti ali kuenda kapulumuswa, ndife khwema ya umaso inatsogolera ku umaso. Mphapo mbani adathema kakamwe toera kuphata basa ineyi? 17 Ife tathema, thangwi nee ndife anyakuzengeza* mafala a Mulungu+ ninga pinacita anthu azinji, mbwenye tisalonga na ntima wakucena ninga anthu adatumwa na Mulungu; inde, pamaso pa Mulungu ninga atowereri a Kristu.

3 Kodi tisafunika kupangizika pontho kuna imwe kuti ndife ani? Kodi tisafuna matsamba analonga mwadidi thangwi ya ife ninga pinacita anthu anango? Peno pisafunika kuti imwe mutilembere matsamba ninga anewa? 2 Imwe ene ndimwe tsamba yathu,+ idalembwa mʼmitima yathu, yakuti isadziwika mbilerwi na anthu onsene. 3 Thangwi pisaoneka pakweca kuti imwe ndimwe tsamba ya Kristu idalembwa na ife ninga atumiki a Mulungu,+ tsamba yakuti nee yalembwa na tinta, mbwenye yalembwa na nzimu wa Mulungu wa mʼmaso; nee yalembwa pa matabwa a miyala,+ mbwenye yalembwa mʼmitima yanu.+

4 Ife tiri na cinyindiro ceneci kuna Mulungu kubulukira mwa Kristu. 5 Nee pisabveka kuti ife tisaoneka tekhene kuti tathema kuphata basa ineyi, mbatinyerezera kuti pinthu pyonsene pisabuluka kuna ife, mbwenye anaticitisa kukhala akuthema ndi Mulungu,+ 6 wakuti mwandimomwene aticitisa kukhala akuthema ninga atumiki a cibverano cipswa,+ tayu a cibverano ca Mwambo wakulembwa,+ mbwenye a cibverano ca nzimu wakucena; thangwi Mwambo wakulembwa usabweresa kufa,+ mbwenye nzimu wakucena usapasa umaso.+

7 Mphapo, khala Mwambo unabweresa kufa wakuti ukhadalembwa pa miyala+ wabwera na mbiri idacitisa Aizraeli kucimwana kuyangʼana nkhope ya Mose thangwi ya mbiri ikhayetimira pa nkhope pace,+ mbiri yakuti mbidafudzwa, 8 kodi nzimu wakucena+ nee unakhala na mbiri ikulu kakamwe kupiringana ineyi?+ 9 Khala Mwambo unabweresa kufa+ ukhali na mbiri,+ mphapo mbiri ya basa ya nzimu wakucena yakuti isaphedza anthu toera akhale akulungama,+ ndi ikulu kakamwe! 10 Mwandimomwene, thangwi ya mbiri ineyi ikulu, Mwambo wakuti kale ukhali na mbiri waluza mbiri yace.+ 11 Khala Mwambo wakuti mbudafudzwa ukhali na mbiri,+ mphapo cibverano cipswa cakuti cisapitiriza, ciri na mbiri ikulu kakamwe!+

12 Nakuti tiri na cidikhiro+ ceneci, ife tisalonga na cinyindiro consene, 13 mbatikhonda kucita pinthu ninga Mose, wakuti akhaphimbira nkhope+ yace na nguwo toera Aizraeli akhonde kuona na maso awo mbiri ya Mwambo wakuti mbudafudzwa. 14 Mbwenye manyerezero awo akhadafungika.+ Mpaka lero, nguwo ibodzi ene isapitiriza kuphimbira manyerezero awo mu ndzidzi unalerwi cibverano cakale;+ thangwi nguwo ineyi, basi ene isabuluswa na Kristu.+ 15 Mwandimomwene, ndzidzi onsene unalerwi mwambo wa Mose,+ nguwo isapitiriza kuphimbira mitima yawo.+ 16 Mbwenye munthu angabwerera kuna Yahova,* nguwo ineyi isabuluswa.+ 17 Yahova* ndi nzimu,+ panagumanika nzimu wakucena wa Yahova* pali na ufulu.+ 18 Pontho ife tonsene, akuti nee tiri na nkhope zakuphimbirwa na nguwo, ndife ninga masupeyu anapangiza mbiri ya Yahova.* Tisacinjwa toera tikhale ninga iye, pontho toera tipangize mwakukwana kakamwe mbiri yace sawasawa ninga munacitira Yahova,* wakuti ndi nzimu.*+

4 Natenepa, nakuti tiri na utumiki uyu udapaswa ife mwakubverana na ntsisi zidapangizwa ife, ife nkhabe kubwerera nduli. 2 Mbwenye ife tasiya pinthu pyakupasa manyadzo, pinacitwa ncibisobiso, tisakhonda macitiro aciphamaso,* pontho ife nkhabe kuthimizira nee kupungula* mafala a Mulungu;+ mbwenye tisadziwisa undimomwene. Natenepa, ife tisapangizika kuna cikumbuntima ca anthu onsene kuti tisacita pinthu pyadidi pamaso pa Mulungu.+ 3 Mwandimomwene, khala mphangwa zadidi zinamwaza ife zaphimbirwa, zaphimbirwa kuna ale akuti ali kuenda kafudzwa, 4 akuti mulungu wa dziko ino*+ afunga manyerezero a anyakukhonda kukhulupira,+ toera cikhonde kupita muna iwo+ ceza ca mbiri ya mphangwa zadidi zinalonga pya Kristu, wakuti ndi cipangizo ca makhaliro a Mulungu.+ 5 Thangwi nee tisamwaza mphangwa zinalonga pya ife, mbwenye zinalonga pya Yezu Kristu ninga Mbuya, mbatibvekesa kuti ndife mabitcu thangwi ya Yezu. 6 Thangwi Mulungu ndiye adalonga kuti: “Ceza mbacioneke pa cidima,”+ pontho iye asayetimira mʼmitima yathu, toera aimwanikire+ na mbiri ya cidziwiso ca Mulungu, kubulukira pa nkhope ya Kristu.

7 Mbwenye ife tiri na mpfuma+ iyi mu pyombo pya dongo,*+ toera kupangiza kuti mphambvu yakupiringana yacibaliro isabuluka kuna Mulungu, tayu kuna ife.+ 8 Tisaona nyatwa munjira zonsene, mbwenye nee tisapfinywa kakamwe mbaticimwana kupfukunyuka, tisamala ndzeru,* mbwenye nee tisasowa cakucita;*+ 9 ife tisatcingwa, mbwenye nee tisasiyiwa tekhene,+ tisagwiswa pantsi, mbwenye nee tisafudzwa.+ 10 Ndzidzi onsene tisapirira mʼmanungo mwathu nyatwa za kufa zidaona Yezu,+ toera umaso wa Yezu upangizikembo mʼmanungo mwathu. 11 Thangwi ife akuti tiri mʼmaso, ndzidzi onsene tisakhala pangozwi yakufa+ thangwi ya Yezu, toera umaso wa Yezu upangizikembo mʼmanungo mwathu akuti anakwanisa kufa. 12 Natenepa, kufa kusaphata basa muna ife,* mbwenye pyenepi pisabweresa umaso kuna imwe.

13 Cincino, nakuti tiri na cikhulupiro cibodzi cene ninga mudalemberwa ipyo kuti: “Ine ndakhulupira, na thangwi ineyi ndalonga”;+ ifembo tisakhulupira, na thangwi ineyi tisalonga, 14 mbatidziwa kuti ule adalamusa Yezu muli akufa, anadzatilamusambo na Yezu, mbatiendesa pabodzi na imwe kuna Yezu.+ 15 Pinthu pyenepi pyonsene pyacitika thangwi ya imwe, toera kukoma ntima kukulu kuthimizirike, thangwi anthu azinji ali kupereka takhuta toera kupasa mbiri Mulungu.+

16 Na thangwi ineyi, ife nkhabe kubwerera nduli, maseze kunja manungo athu akumala, mbwenye nkati mwathu musasasanyirwa ntsiku zonsene. 17 Thangwi maseze nyatwa* zinaona ife ndi za ndzidzi wakucepa na zakululupa, izo zisabweresa mbiri ikulu* kakamwe kuna ife, mbiri yakuti nkhabe kumala;+ 18 mu ndzidzi wakuti nee tisaikha maso athu ku pinthu pyakuoneka na maso, mbwenye ku pinthu pyakukhonda kuoneka na maso.+ Thangwi pinthu pinaona ife na maso athu ndi pya ndzidzi wakucepa, mbwenye pinthu pinakhonda ife kuona ndi pya kwenda na kwenda.

5 Ife tisadziwa kuti nyumba yathu ya pa dziko yapantsi yakuti ndi manungo athu adalandana na khumbi, ingafudzwa,+ ife tinadzakhala na nyumba ya kwenda na kwenda inafuna kutipasa Mulungu kudzulu, nyumba yakukhonda kumangwa na manja a anthu.+ 2 Thangwi mwandimomwene ife tisabulira nʼnyumba ino inakhala ife, mbatifuna kakamwe kubvala nyumba yathu yakudzulu,+ 3 toera tingadzabvala nyumba ineyi, tikhonde kukhala cipezipezi. 4 Mwandimomwene, ife akuti tiri mu khumbi iyi tisabulira mbatinentseka, thangwi ife nee tisafuna kudula khumbi iyi, mbwenye tisafuna kubvala inango,+ toera umaso wakukhonda mala upite pa mbuto ya manungo athu akuti anakwanisa kufa.+ 5 Adatikhunganya toera kutambira pyenepi ndi Mulungu,+ ule adatipasa nzimu wace ninga cidzindikiro ca pinthu pinafuna kudza.+

6 Natenepa, ndzidzi onsene ife tiri na cinyindiro, pontho tisadziwa kuti mu ndzidzi unakhala ife na manungo awa, tiri kutali na Mbuya,+ 7 ife tisadziwa pyenepi thangwi tisatsogolerwa na cikhulupiro, tayu na pinthu pinaona ife na maso. 8 Mbwenye ife tiri na cinyindiro kakamwe, pontho tisafuna kukhala kutali na manungo awa, toera tikhale pabodzi na Mbuya.+ 9 Natenepa, mwakukhonda tsalakana khala tisakhala na iye peno tiri kutali na iye, ife tisawangisira toera kucita pinthu pinakomerwa na iye.* 10 Thangwi tonsene tinadzaonekera pa mpando wa Kristu unatongera iye miseru, toera mʼbodzi na mʼbodzi atongwe mwakubverana na pinthu pyadidi peno pyakuipa+ pidacita iye pikhali iye mʼmanungo awa.

11 Natenepa, nakuti tisadziwa kugopa Mulungu, ife tisapitiriza kupfundzisa anthu mwakuphata ntima, mbwenye Mulungu asatidziwa mwadidi kakamwe. Pontho ndisadikhira kuti cikumbuntima canu cakuphedzani toera kutidziwa mwadidi. 12 Ife nee tiri kupangizika pontho kuna imwe kuti ndife ani, mbwenye tisakuwangisani toera mulonge mwakugaya thangwi ya ife toera mukwanise kutawira ale anagaya thangwi ya maonekero awo akunja,+ tayu thangwi ya pinthu piri muntima. 13 Khala tacita pinthu ninga anyansala,+ ife tapicitira Mulungu; mbwenye khala tacita pinthu ninga anthu andzeru zadidi, ife tapicita toera kuphedza imwe. 14 Ufuni wa Kristu usatikulumiza,* thangwi ife tafika pa kudzindikira kuti: Munthu mʼbodzi basi afera anthu onsene;*+ thangwi anthu onsene akhadafa. 15 Pontho iye afera anthu onsene toera anthu akuti ali mʼmaso akhonde kukhala mʼmaso toera kucita pinafuna iwo* basi,+ mbwenye acite pinafuna ule* adaafera mbalamuswa muli akufa.

16 Natenepa, kutomera cincino ife nee tisadziwabve munthu mwakubverana na maonero athu aunyama.+ Maseze kale tikhadziwa Kristu mwakubverana na maonero athu aunyama, mwandimomwene nee tisandziwabve munjira ineyi.+ 17 Na thangwi ineyi, khala munthu ali wakuphatana na Kristu, iye ndi munthu mupswa;*+ pinthu pyakale pyapita, piripo ndi pinthu pipswa. 18 Mbwenye pinthu pyonsene pisabuluka kuna Mulungu, adatiphedza toera tikhale pontho na uxamwali na iye kubulukira mwa Kristu,+ mbatipasa basa* yakuphedza anthu toera akhale pontho na uxamwali na iye.+ 19 Pyenepi pisabveka kuti Mulungu asaphatisira Kristu toera kuphedza anthu kuti akhale pontho na uxamwali na iye,+ mbakhonda kuapasa mulando thangwi ya madawo awo.+ Iye atipasa basa yakupanga anthu kuti iwo anakwanisa kukhala pontho na uxamwali na Mulungu.+

20 Natenepa, ife ndife aimiriri+ adasala pa mbuto ya Kristu,+ ninga kuti Mulungu asaphatisira ife toera kudembetera anthu. Ninga anthu adasala pa mbuto ya Kristu, ife tisadembetera anthu kuti: “Khalani pontho na uxamwali na Mulungu.” 21 Ule wakuti cipo acita madawo,+ iye ampereka ninga ntsembe ya madawo* thangwi ya ife, toera kubulukira mwa iye, ife tikhale anthu akulungama pamaso pa Mulungu.+

6 Ninga anyakuphata basa pabodzi na Mulungu,+ ife tisakudembeteranimbo toera mukhonde kutambira kukoma ntima kukulu kwa Mulungu, mbamuluza cifuniro ca kukoma ntima kweneku.+ 2 Thangwi iye alonga: “Mu ndzidzi wakutawirika, ine ndakubvesera, pontho pa ntsiku yacipulumuso, ine ndakuphedza.”+ Bveserani, uno ndi ndzidzi wakutawirika kakamwe! Uno ndi ndzidzi wacipulumuso!

3 Ife nkhabe kucita cinthu cakuti cinagwegwedusa* munthu, toera anthu akhonde kuona madodo mʼbasa yathu inaphatira ife Mulungu;*+ 4 mbwenye munjira zonsene ife tisapangiza kuti ndife atumiki a Mulungu,+ mu kupirira pinentso pizinji, pakuona nyatwa, pakusowa pinthu, pakuthimbana na makhaliro akunentsa,+ 5 pakumenywa, pakufungirwa nkaidi,+ pakucitirwa cikuti, pakuphata basa mwakuwanga, kumala masiku nee kugona, midzidzi yakusowa cakudya;+ 6 ife tisapangiza kuti ndife atumiki a Mulungu thangwi yakukhala na umaso wakucena, cidziwiso, kupirira,+ kukoma ntima,+ nzimu wakucena, kukhala na ufuni wakusowa umpfakafaka,+ 7 kulonga undimomwene, kunyindira mphambvu za Mulungu;+ kuphatirira pida pyaulungami+ kunkono wamadyo* na wabzwere,* 8 pakupaswa mbiri na pakupwazwa, pakuseruswa* na pakusimbwa. Tisaoniwa ninga anyakunyengeza, maseze ife tisalonga undimomwene; 9 tisaoniwa ninga anthu akukhonda dziwika, maseze tisadziwika mwadidi; tisaoniwa ninga anthu akuti ali dhuzi na kufa,* mbwenye onani, ife tiri mʼmaso;+ tisaoniwa ninga anyakutcunyuswa,* maseze nee tisaphiwa;+ 10 tisaoniwa ninga anyakutsukwala, mbwenye tiri akutsandzaya ndzidzi onsene; tisaoniwa ninga anyakutcerenga, mbwenye tisapfumisa anthu azinji; tisaoniwa ninga anyakusowa pinthu, mbwenye tiri na pinthu pyonsene.+

11 Ife tafungula mulomo wathu toera kulonga* na imwe abale a ku Korinto, pontho tafungula mwakukwana ntima wathu. 12 Ife tisapangiza mwakukwana ufuni wathu kuna imwe,+ mbwenye imwe nee musapangiza mwakukwana ufuni wanu kuna ife. 13 Ine ndisalonga na imwe ninga ananga, titsalakaneni ninga munakutsalakanani ife, fungulanimbo mwakukwana mitima yanu.+

14 Lekani kumangirirwa pa goli* ibodzi ene na anyakukhonda kukhulupira.+ Thangwi ulungami unabverana tani na uipi?*+ Peno ceza cinabverana tani na cidima?+ 15 Kusiyapo pyenepi, kodi Kristu anabverana tani na Bheliale?*+ Kodi munthu wakukhulupira* anabverana tani na munthu wakukhonda kukhulupira?+ 16 Ndi cibverano cipi ciripo pakati pa templo ya Mulungu na madzimunthu?+ Thangwi ife ndife templo ya Mulungu wa mʼmaso;+ ninga mudalongera Mulungu kuti: “Ine ndinadzakhala pakati pawo,+ mbandifamba pakati pawo, ine ndinadzakhala Mulungu wawo, pontho iwo anadzakhala mbumba yanga.”+ 17 “‘Natenepa, bulukani pakati pawo, pambulikani,’* alonga Yahova,* ‘lekani kuphata pontho pinthu pyakupswipa’”;+ “‘ine ndinadzakutambirani.’”+ 18 “‘Pontho ine ndinadzakhala babanu,+ imwe munadzakhala ananga amuna na akazi,’+ alonga Yahova* Wamphambvu Zonsene.”

7 Natenepa, abale anga akufunika, nakuti tiri na mapikiro anewa,+ tisafunika kuceneseka, mbatisiya pinthu pyonsene pinapswipisa manungo athu na manyerezero athu,+ pontho tithimize kukhala akucena munjira inapangiza kuti tisagopa Mulungu.

2 Tifungulireni mitima yanu.+ Nkhabe munthu adacitira ife cinthu cakuipa, nkhabe munthu adapeusa ife, nkhabe munthu adanyengeza ife.*+ 3 Nee ndikulonga pyenepi toera kukupasani mulando. Thangwi ine ndakupangani kale kuti imwe muli mʼmitima yathu, toera mufe pabodzi na ife, pontho toera mukhale mʼmaso pabodzi na ife. 4 Ine ndisalonga mwakusudzuka kakamwe na imwe. Ndisagaya kakamwe thangwi ya imwe. Ine ndabalangazwa kakamwe; ndiri wakutsandzaya kakamwe mu nyatwa zathu zonsene.+

5 Mwandimomwene, pidafika ife ku Masedhonya+ nee takwanisa kupuma, mbwenye ife tapitiriza kuthabuka munjira zonsene, thangwi kunja anthu akhathimbana na ife, nkati ife tikhadzudzumika. 6 Mbwenye Mulungu wakuti asabalangaza anthu akutsukwala,+ atibalangaza thangwi yakufika kwa Tito; 7 tayu basi thangwi yakufika kwace, mbwenye thangwi ya cibalangazo cidatambirambo iye thangwi ya imwe, pidatipanga iye kuti musafuna kakamwe kundiona, thangwi yakutsukwala kwanu kukulu kakamwe na kudzudzumika kwanu* thangwi ya ine; natenepa ine ndakomerwa kakamwe.

8 Thangwi maseze ine ndakutsukwalisani na tsamba yanga,+ ine nee ndisatsumbikika napyo. Ngakhale kuti pakutoma ndatsumbikika napyo, (thangwi ndisaona kuti tsamba ineyi yakutsukwalisani, mbwenye yakutsukwalisani mu ndzidzi wakucepa), 9 cincino ine ndisakomerwa, tayu thangwi yakutsukwala kwanu, mbwenye thangwi kutsukwala kwanu kwakuphedzani toera kutcunyuka. Thangwi imwe mwatsukwaliswa munjira inakomeresa Mulungu; natenepa, nkhabe cinthu cakuipa cidaona imwe thangwi ya ife. 10 Thangwi kutsukwala munjira inakomeresa Mulungu kusaphedza munthu toera kutcunyuka mbagumana cipulumuso; natenepa, iye nkhabe kutsumbikika;+ mbwenye kutsukwala ninga pinacita anthu a dziko kusabweresa kufa. 11 Onani kuti kutsukwala kwanu munjira inakomeresa Mulungu, kwakuphedzani toera kuwangisira kakamwe kucita pinthu pyadidi, toera kucenesa makhaliro anu, toera kutsumbikika thangwi ya pinthu pyakuipa pidacita imwe, toera kugopa Mulungu, toera kufuna kutcunyuka, toera kutumikira Mulungu mwaphinga, pontho toera kusasanyira madodo anu!+ Mu pinthu pyenepi, imwe mwapangiza kuti ndimwe akucena* munjira zonsene. 12 Maseze ndakulemberani tsamba, ine nee ndacita pyenepi thangwi ya ule adacita madawo peno thangwi ya ule adacitirwa pinthu pyakuipa,+ mbwenye ndakulemberani toera kuona khala imwe mbamudapangiza pamaso pa Mulungu kuti musafuna kakamwe kutibvera. 13 Natenepa ife tabalangazwa.

Mbwenye kusiyapo cibalangazo cidatambira ife, ife takomerwa kakamwe thangwi ya kutsandzaya kudakhala na Tito, thangwi monsene mwatsandzayisa ntima wace. 14 Thangwi khala ine ndakusimbani kuna Tito, nee ndapasika manyadzo; mbwenye ninga pinthu pyonsene pidakupangani ife pikhali pyandimomwene, pyaonekambo pakweca kuti mafala akukusimbani adapanga ife Tito ndi andimomwene. 15 Kusiyapo pyenepi, ufuni wace kuna imwe usathimizirika kakamwe angakumbuka kubvera kunacita imwe monsene,+ na kuntambira kwanu mwacilemedzo kakamwe. 16 Ine ndisakomerwa thangwi ndinakwanisa kukunyindirani* munjira zonsene.

8 Abale, cincino tisafuna kukudziwisani pidacita mpingo wa ku Masedhonya+ thangwi ya kukoma ntima kukulu kwa Mulungu kudapangizwa iwo. 2 Iwo aona nyatwa mu ndzidzi ukhathimbana iwo na pinentso pikulu, mbwenye iwo apangiza kukomerwa kwawo, mbapasa mwakudzala manja. Iwo acita pyenepi maseze akhali akutcerenga kakamwe. 3 Iwo acita pyonsene toera kupereka mwakubverana na makhaliro awo.+ Mwandimomwene ine ndiri na umboni wakuti iwo acita pizinji kupiringana makhaliro awo.+ 4 Nakufuna kwawo, iwo akhatidembetera mwakubwereza-bwereza toera akwanisembo kukhala na nkhombo yakupasa na ntima onsene, toera acitembo khundu mʼbasa yakuphedza anthu akucena.+ 5 Iwo acita pizinji kupiringana pikhadikhira ife, thangwi pakutoma iwo aperekeka na ntima wawo onsene toera kutumikira Mbuya na ife ene, ninga munafunira Mulungu. 6 Natenepa, ife tawangisa Tito+ toera amalise basa idatoma iye pakati panu, yakukwata pinthu pidapereka imwe na ntima onsene. 7 Nakuti ndimwe akupfuma mu pinthu pyonsene, mu cikhulupiro, mʼmafala,* mu cidziwiso, pakuwangisira mu pinthu pyonsene na mu ufuni wathu kuna imwe, khalanimbo akupfuma pakupasa na ntima onsene.+

8 Nee ndikulonga pyenepi toera kukukakamizani, mbwenye toera kukudziwisani pya kuwangisira kunacita anango, pontho toera kuona khala ufuni wanu ndi wandimomwene. 9 Thangwi imwe musadziwa pya kukoma ntima kukulu kwa Mbuyathu Yezu Kristu, kuti maseze iye akhali wakupfuma, adzakhala wakutcerenga thangwi ya imwe,+ toera imwe mukhale akupfuma thangwi yakutcerenga kwace.

10 Mu pinthu pyenepi, maonero anga ndi awa:+ Kucita pyenepi kunakuphedzani, thangwi papita caka, tayu basi kubulukira padatoma imwe basa ineyi, mbwenye mwapangizambo kuti musafuna kuphata basa ineyi yakugumanya pyakupereka. 11 Natenepa, cincino malisani basa idatoma imwe, mwakubverana na piri na imwe. Munjira ineyi, munaimalisa ninga mukhafunira imwe pakutoma. 12 Muoni ndi wakutawirika khala munthu asafuna kupereka. Thangwi munthu asafunika kupereka mwakubverana na piri na iye,+ tayu kupiringana piri na iye.* 13 Thangwi nee ndisafuna kuti pyenepi pikhale ninga ntolo wakulemera kuna imwe, mbwenye mbapikhala ntolo wakululupa kuna anango; 14 mbwenye kunjipa kwa pinthu piri na imwe, kuaphedze mu pinthu pidasowa iwo, toera kunjipa kwa pinthu pyawo kukuphedzenimbo mu pire pidasowa imwe; natenepa, monsene munakhala sawasawa. 15 Ninga mudalemberwa ipyo kuti: “Munthu adagumanya pizinji nee akhala na pizinji kakamwe, pontho ule adagumanya pangʼono nee akhala na pangʼono kakamwe.”+

16 Tisapereka takhuta kuna Mulungu thangwi Tito+ asafuna kakamwe kukuphedzani ninga munafunirambo ife, 17 thangwi iye atawira ciwangiso cidapereka ife kuna iye, mbwenye nakuti iye asafuna kakamwe kucita pidampanga ife, iye ali kubwera kuna imwe nakufuna kwace. 18 Mbwenye tiri kuntumiza pabodzi na mʼbale wakuti asasimbwa mʼmipingo yonsene thangwi ya pinacita iye mʼbasa yakumwaza mphangwa zadidi. 19 Si pyenepi basi tayu, mbwenye iye asankhulwambo na mipingo toera kufamba pabodzi na ife mu ndzidzi unatsalakana ife basa ineyi yakupereka miyoni toera kupasa mbiri Mbuya, pontho ninga cipangizo cakuti tiri dzololo toera kuphedza anango. 20 Munjira ineyi, ife tisacita pyonsene toera anthu akhonde kuona pyakuipa muna ife, mu ndzidzi unaphata ife basa yakutsalakana pyakupereka pinabulusa anthu na ntima onsene.+ 21 Thangwi ife ‘tisacita pinthu pyonsene mwakulungama,* tayu basi pamaso pa Yahova,* mbwenye tisacitambo pyenepi pamaso pa anthu.’+

22 Kusiyapo pyenepi, ife tiri kutumiza pabodzi na iwo mʼbale wathu wakuti tamuyesera kazinji kene, mbationa kuti iye ndi waphinga mu pinthu pizinji, mbwenye cincino iye ndi waphinga kakamwe thangwi ya cinyindiro cikulu ciri na iye kuna imwe. 23 Khala alipo anafuna kudziwa kuti Tito mbani, iye ndi ndzanga anatumikira na ine toera kukuphedzani; pontho khala alipo anafuna kudziwa pya abale ali pabodzi na iye, iwo ndi anthu adatumwa na mipingo,* pontho asapasa mbiri Kristu. 24 Natenepa, pangizani kuna iwo kuti musaafuna,+ pontho pangizani kuna mipingo kuti ninji cidaticitisa kulonga mwakugaya thangwi ya imwe.

9 Cincino, thangwi ya basa yakuphedza anthu akucena,+ nee ndisafunika kukulemberani, 2 thangwi ine ndisadziwa kuti imwe muli dzololo toera kupereka ciphedzo, natenepa ine ndisakusimbani kuna abale a ku Masedhonya, mbandiapanga kuti mu caka camumphu imwe a ku Akaya muli dzololo toera kuphedza, pontho phinga yanu yawangisa azinji a iwo. 3 Mbwenye ndiri kutumiza abale kuna imwe, toera kukusimbani kunacita ife kukhonde kukhala kwapezi, pontho toera mukhale akukhunganyika, ninga mudaapangira ine kuti imwe muli akukhunganyika. 4 Thangwi abale a ku Masedhonya mbadabwera na ine, mbatikugumanani kuti mudzati kukhunganyika, ife na imwe ene mbatidakhala na manyadzo thangwi ya kukunyindirani kudacita ife. 5 Natenepa, ndanyerezera kuti mphyadidi kuwangisa abale toera abwere kuna imwe nakweru, toera agumanye mwanyapantsi miyoni idalonga imwe kuti mbamudaipereka na ntima onsene, toera ikhale miyoni idaperekwa na ntima onsene, tayu idaperekwa mwakukakamizwa.*

6 Mbwenye mu pinthu pyenepi, ule anabzwala pangʼono,* anadzabvunambo pangʼono; mbwenye ule anabzwala pizinji, anadzabvunambo pizinji.*+ 7 Mʼbodzi na mʼbodzi mbapereke* ninga mudanyerezera iye muntima mwace, tayu mwakukhonda funa* peno mwakukakamizwa,+ thangwi Mulungu asafuna munthu anapasa mwakukomerwa.+

8 Mbwenye Mulungu anakwanisa kupangiza kukoma ntima kwace konsene kuna imwe, toera ndzidzi onsene imwe mukwanise kukhala na pinthu pyakukwana pyakuti ndi pyakufunika kuna imwe, mbamukhalambo na pinthu pizinji pinafuna imwe toera kuphata mabasa adidi onsene.+ 9 (Ninga mudalemberwa ipyo kuti: “Iye asagawiza mwakudzala manja;* iye asapasa anyakutcerenga. Ulungami wace unapitiriza kwenda na kwenda.”+ 10 Ule anapereka mbeu mwakudzala manja kuna nyakubzwala na nkate ninga cakudya, anadzakupasanimbo, mbathimizira mbeu toera imwe mubzwale, mbakuphedzani toera kubvuna pizinji mʼmabasa anu aulungami.) 11 Mulungu asakupasani nkhombo mu pinthu pyonsene toera imwe mupase mwakudzala manja munjira zonsene; natenepa, anthu anapereka takhuta kuna Mulungu thangwi ya miyoni yanu inafuna kupereka ife kuna anango; 12 thangwi cifuniro ca utumiki unoyu si toera kupereka ciphedzo kuna anthu akucena basi tayu,+ mbwenye ndi toera anthu azinji aperekembo takhuta kuna Mulungu. 13 Iwo asasimba Mulungu, thangwi basa ineyi yakupereka ciphedzo isapangiza kuti imwe musabvera mphangwa zadidi zinalonga pya Kristu, ninga mudalongera imwe pakweca, thangwi imwe musapereka mwakudzala manja kuna iwo na kuna anthu onsene.+ 14 Pontho iwo asacita maphembero akudembetera thangwi ya imwe, mbapangiza kuti asakufunani thangwi ya kukoma ntima kukulu kudapangiza Mulungu kuna imwe.

15 Tendeni tipereke takhuta kuna Mulungu thangwi ya muoni wace ukulu kakamwe.*

10 Cincino, ine Paulu ndisakudembeterani kubulukira mu kukhurudzika na kukoma ntima kwa Kristu,+ maseze ndisaoneka ninga wakupwazika ndingakhala pakati panu,+ mbwenye wacipapo ndingakhala kutali na imwe.+ 2 Ine ndisakuphembani kuti mucite pyonsene pinakwanisa imwe toera ndingabwera kuna imwe, ndikhonde kusandika mwakuwanga kakamwe ale ananyerezera kuti ife tisacita pinthu ninga munacitira anthu a dziko ino. 3 Thangwi maseze ndife anthu aunyama, ife nee tisamenya nkhondo mwakubverana na manungo athu aunyama. 4 Thangwi pida pyathu pya nkhondo nee ndi pyaunyama,+ mbwenye ndi pida pyamphambvu pinatipasa Mulungu+ toera kufudza* pinthu pidakhomereka kakamwe. 5 Thangwi ife tisafudza* manyerezero akuphonyeka na mipingizo* yonsene inacimwanisa anthu kudziwa Mulungu,+ pontho tisaikha mu ubitcu manyerezero onsene toera abvere Kristu; 6 ife tiri akukhunganyika toera kutcunyusa ntundu onsene wakukhonda kubvera,+ mbwenye tinacita pyenepi mungamala kupangiza kuti kubvera kwanu ndi kwakukwana.

7 Imwe musaona pinthu mwakubverana na maonekero apyo akunja. Khala munthu ali na cinyindiro cakuti iye ndi ntumiki wa Kristu, asafunika kunyerezera pontho tenepa: Ninga iye ndi ntumiki wa Kristu, ifembo ndife atumiki a Kristu. 8 Maseze ine mbidakwanisa kugaya pangʼono thangwi ya mphambvu zidatipasa Mbuya toera kukuwangisani, tayu toera kukufewesani,+ ine nee mbidapasika manyadzo. 9 Mbwenye nee ndisafuna kupangiza kuti ndisafuna kukugopesani na matsamba anga. 10 Thangwi anango asalonga kuti: “Matsamba ace asalonga pinthu pyakufunika, pontho ndi amphambvu, mbwenye iye angakhala pano ndi wakufewa, pontho mafalace ndi akupwazika.”* 11 Ale analonga pyenepi, asafunika kudziwa kuti pire pinalonga* ife mʼmatsamba athu tingakhala kutali na imwe, ndipyo pinafuna kucita ife tingafika kuna imwe.+ 12 Thangwi ife nkhabe kuyesera kukhala sawasawa na anango peno kulandanisika na ale anasimbika okhene.+ Mbwenye iwo angadingika okhene mwakubverana na manyerezero awo, mbatongeka okhene mwakubverana na pinanyerezera iwo kuti mphyadidi, asapangiza kuti iwo nkhabe kubvesesa pinthu.+

13 Ife nee tinagaya na pinthu pinacitika kunja kwa madire a cisa cidapaswa ife, mbwenye tinagaya nkati mwa madire a cisa cidatipasa Mulungu, imwembo muli nkati mwa cisa ceneci.+ 14 Mwandimomwene, ife nee tiri kunumpha madire athu, ninga kuti imwe nee muli nkati mwa cisa cathu, thangwi ndife adatoma kufika kuna imwe na mphangwa zadidi zinalonga pya Kristu.+ 15 Ife nee tisagaya kunja kwa madire a cisa cidapaswa ife, cakuti ndi basa idaphata anango mwakuwanga, mbwenye tisadikhira kuti mu ndzidzi unapitiriza kukula cikhulupiro canu, basa idaphata ife pakati panu inapitirizambo kukula nkati mwa cisa cathu. Natenepa, ife tinakwanisa kucita pizinji, 16 toera tikwanise kumwaza mphangwa zadidi mupisa pyakutali na imwe, toera tikhonde kugaya na pinthu pidacitwa kale mucisa ca munthu unango. 17 “Mbwenye munthu anagaya, mbagaye thangwi ya Yahova.”*+ 18 Thangwi munthu wakutawirika si ule anasimbika ekhene tayu,+ mbwenye ndi ule anasimbwa na Yahova.*+

11 Maseze ndisaoneka ninga pswiru, mbwenye ndisafuna kuti mundipirire. Mwandimomwene imwe musandipirira! 2 Thangwi ine ndiri na ntcanje* na imwe, ntcanje ninga ya Mulungu, thangwi ine ndapikira kuti imwe musembwe* na mamuna mʼbodzi basi, toera ndikuperekeni kuna Kristu+ ninga mwali wakusowa midonthi.* 3 Mbwenye ndisagopa kuti ninga mudanyengezwa Eva na nyoka thangwi ya kucenjera kwayo,+ manyerezero anu anapeuswa mbamusiya kutowera Kristu+ na ntima onsene, pontho mbamukhonda kukhala akucena ninga munafunira iye. 4 Thangwi munthu angabwera, mbakumwazirani mphangwa zinalonga pya Yezu unango wakusiyana na ule adakumwazirani ife, peno mungatambira nzimu unango wakusiyana na udatambira imwe, peno mphangwa zadidi zakusiyana na zidatawira imwe,+ imwe musatawira pinalonga iye. 5 Thangwi nkhabe cinthu cidacita ine cinapangiza kuti ndine wangʼono kuna apostolo anu ananyerezera okhene kuti iwo ndi adidi kakamwe.+ 6 Maseze nee ndiri na luso yakulonga mwadidi,+ mbwenye ndiri na cidziwiso; mwandimomwene, pyenepi ife tapipangiza pakweca kuna imwe munjira zonsene na mu pinthu pyonsene.

7 Peno ndacita madawo pidacepeseka ine toera imwe mukuzwe, pidakumwazirani ine mphangwa zadidi za Mulungu mwakutsandzaya mbandikhonda kutambira cinthu?+ 8 Ine ndatawira ciphedzo ca mipingo inango, pyenepi ndi ninga ine ndaabera toera kutumikira imwe.+ 9 Mbwenye pikhali ine pakati panu mbandisowa pinthu, ine nee ndakhala ninga ntolo kuna munthu, thangwi abale adabuluka ku Masedonya andipasa pinthu pyonsene pikhasowa ine.+ Ine ndacita pyonsene toera ndikhonde kukhala ninga ntolo kuna imwe, pontho ndinapitiriza kucita pyenepi.+ 10 Ine ndisalonga undimomwene wa Kristu; natenepa, ine ndinapitiriza kulonga pyenepi mwakugaya+ mupisa pya ku Akaya. 11 Thangwi yanji nee ndatawira kutambira cinthu kuna imwe? Thangwi nee ndisakufunani? Mulungu asadziwa kuti ine ndisakufunani.

12 Mbwenye pinacita ine ndinapitiriza kupicita+ toera kumatamisa ale anagaya mbalonga kuti iwo ndi sawasawa na ife mu pinthu pinagaya na iwo. 13 Thangwi anthu anewa ndi apostolo authambi, anyabasa akunyengeza, mbasangizira kukhala apostolo a Kristu.+ 14 Pyenepi si pyakudzumisa tayu, thangwi Sathani asapitirizambo kusangizira kukhala anju wa ceza.*+ 15 Natenepa, si pyakudzumisa tayu atumiki ace angapitirizambo kusangizira kukhala atumiki aulungami. Mbwenye mamalisiro awo anadzakhala mwakubverana na mabasa awo.+

16 Ine ndinalonga pontho: Nee mʼbodzi asafunika kunyerezera kuti ine ndine pswiru. Mbwenye khala musanyerezera pyenepi, nditawireni ninga pswiru toera inembo ndikwanise kugaya pangʼono. 17 Cincino ine ndisalonga, tayu ninga munalongera Mbuya, mbwenye ndisalonga mwakugaya ninga munalongera munthu wakusowa ndzeru. 18 Nakuti anthu azinji asagaya thangwi ya pinthu pya dziko ino,* ine ndinagayambo. 19 Khala ndimwe anthu “andzeru kakamwe,” mphapo thangwi yanji musatawira na ntima onsene anthu akusowa ndzeru? 20 Mwandimomwene, imwe musatawira munthu anakutsalakanani ninga mabitcu, onsene anatapata pinthu pyanu, onsene anakupokoserani pinthu piri na imwe, onsene anadzikuza pakati panu, na onsene anakumenyani mbama.

21 Mphyamanyadzo kuna ife kulonga pyenepi, thangwi panango pinapangiza kuti ndife anthu akufewa.

Mbwenye khala anango asacita pinthu mwakukhonda gopa, inembo nee ndinagopa, maseze anango anandiona ninga pswiru. 22 Kodi iwo ndi Ahebheri? Inembo ndine Muhebheri.+ Kodi iwo ndi Aizraeli? Inembo ndine Muizraeli. Kodi iwo ndi a dzindza* ya Abhrahamu? Inembo ndine wa dzindza* ya Abhrahamu.+ 23 Kodi iwo ndi atumiki a Kristu? Ine ndinatawira ninga nyansala, kuti inembo ndine ntumiki wandimomwene kupiringana iwo: Ndaphata basa kakamwe,+ ndafungirwa nkaidi kazinji kene,+ ndamenywa mwakukhonda lengeseka, pontho kazinji kene ndikhali dhuzi na kufa.+ 24 Kaxanu Ayuda+ andikwapula mitcamu 40 bulusa ubodzi, 25 ndamenywa na ndodo katatu,+ ndamenywa na miyala kabodzi,+ bote yathu yalobzweka katatu,+ pa ntsiku ibodzi ndamala masiku na masikati pakati pa bara; 26 kazinji kene, mʼmaulendo anga ndikhali pangozwi mʼmikulo, pangozwi ya mambava, kuthabuswa na anthu a mbumba yanga,+ kuthabuswa na anthu a madzindza anango,+ ndikhali pangozwi mu nzinda,+ nʼthando, mʼbara, kuoneswa nyatwa na abale aumpfakafaka,* 27 kuwangisira kakamwe, kuphata basa mwakuwanga, kumala masiku mazinji nee kugona,+ kuthabuka na njala, na nyota,+ kazinji kene ndikhasowa cakudya,+ kuthabuka na mphepo na kusowa cakubvala.*

28 Kusiyapo pinthu pyenepi, pana pinango pinandinentsa muntima mwanga ntsiku zonsene:* Kudzudzumika thangwi ya mipingo yonsene.+ 29 Mbani adafewa, mbandikhonda kukhalambo wakufewa? Mbani anagwegweduswa,* ine mbandikhonda kumbvera ntsisi?

30 Khala ndisafunika kugaya, ine ndinagaya thangwi ya pinthu pinapangiza kufewa kwanga. 31 Mulungu na Baba wa Mbuya Yezu, Wakuti ndiye asafunika kusimbwa kwenda na kwenda, asadziwa kuti ine nee ndikulonga uthambi. 32 Ku Dhamasku, ntongi wa Mambo Areta aikha anyakuonera mu nzinda wa Dhamasku toera andimange, 33 mbwenye ndatcitiswa ncitundu na pa janela ya mpanda wa nzinda;+ natenepa, ndakwanisa kupulumuka mʼmanja mwace.

12 Ndisafunika kugaya. Maseze pyenepi nee pinakuphedzani, mbwenye ine ndinalonga pya masomphenya+ adapangizwa ine na Mbuya+ na mphangwa zidandipasa iye. 2 Ine ndisadziwa munthu mʼbodzi wakuti ndi nyakupfundza wa Kristu, mu pyaka 14 nduli, iye akwatwa mpaka kuthambo yacitatu; khala akwatwa na manungo ace ene peno nee akwatwa na manungo ace ene, ine nkhabe kupidziwa, anapidziwa ndi Mulungu. 3 Inde, ine ndisandziwa munthu unoyu, khala akwatwa na manungo ace ene peno nee akwatiwa na manungo ace ene, ine nkhabe kupidziwa; anapidziwa ndi Mulungu, 4 iye akwatwa mbaendeswa mʼparaizu, mbabva mafala akuti nkhabe funika kulongwa, pontho akuti munthu nee asatawiriswa kualonga. 5 Ine ndinagaya thangwi ya munthu unoyu, mbwenye nee ndinagaya thangwi ya ine, basi ene ndinagaya thangwi yakufewa kwanga. 6 Thangwi mbidafuna kugaya, ine nee mbidakhala pswiru, thangwi mbidalonga undimomwene. Mbwenye ine ndisacalira kucita pyenepi, toera akhonde kuoneka munthu wakuti anandisimba kakamwe kupiringana pinaona iye muna ine na pinabva iye kuna ine, 7 basi ene thangwi ndisapaswa mphangwa zenezi zakudzumisa.

Toera ndikhonde kugaya mwakupiringana midida, ine ndaikhwa munga mʼmanungo mwanga,+ anju wa Sathani, toera apitirize kundimenya mbama, toera ine ndikhonde kugaya kakamwe. 8 Ine ndadembetera Mbuya katatu, toera abuluse munga unoyu mʼmanungo mwanga. 9 Mbwenye iye andipanga: “Kukoma ntima kwanga kukulu kwakwana kuna iwe, thangwi mphambvu yanga isapangizika mwakukwana mu kufewa kwako.”+ Natenepa, mwakukomerwa kakamwe, ine ndinagaya thangwi yakufewa kwanga, toera mphambvu za Kristu zipitirize muna ine ninga khumbi. 10 Munjira ineyi, ine ndiri wakutsandzaya thangwi ya Kristu mu kufewa kwanga, pakutikanwa, pakusowa pinthu, pakutcingwa na mʼmidzidzi yakunentsa. Thangwi mu ndzidzi unakhala ine wakufewa, ndi mu ndzidzi unoyu unakhala ine wamphambvu.+

11 Ine ndakhala ninga pswiru kuna imwe. Imwe ndimwe adandikakamiza toera kucita pyenepi, thangwi imwe nee mwalonga pinthu pyadidi pidacita ine. Nkhabe cinthu cidacita ine cinapangiza kuti ndine wangʼono kuna apostolo anu ananyerezera okhene kuti ndi adidi kakamwe, maseze ndine wakusowa basa pamaso panu.+ 12 Mwandimomwene, imwe mwaona umboni unapangiza kuti ine ndine mpostolo kubulukira mu kupirira kakamwe kudapangiza ine,+ pontho thangwi ya pirengo na pidzindikiro pidacita ine, pabodzi na mabasa akudzumisa.+ 13 Cinthu cibodzi basi cinapangiza kuti imwe nee mwakhala na nkhombo zidakhala na mipingo inango, ndi cakuti ine nee ndakhala ninga ntolo kuna imwe.+ Ndilekerereni na ntima onsene madodo anewa.

14 Onani, uno ndi ulendo wacitatu wakuti ndiri wakukhunganyika toera kudza kuna imwe, mbwenye nee ndinakhala ninga ntolo kuna imwe. Thangwi nee pisadikhirwa kuti ana+ akoye pinthu+ toera anyakubalawo aphedzeke napyo kutsogolo, mbwenye anyakubala ndiwo anafunika kukoyera anawo pinthu. 15 Ine ndinakomerwa kakamwe kuphatisira pyonsene piri na ine, ngakhale kupereka umaso wanga thangwi ya imwe.*+ Khala ine ndisakufunani kakamwe, kodi imwe musafunika kundifuna pangʼono? 16 Munjira zonsene, ine nee ndakhala ninga ntolo kuna imwe.+ Ngakhale tenepo, imwe musalonga kuti “ndakunyengezani” mbandikumangani na nsampha “mwakucenjera.” 17 Kodi ine ndaphatisira ale adatumiza ine kuna imwe toera ndikukwatireni pinthu pyanu? 18 Ine ndakulumiza Tito toera abwere kudzakuonani, pontho ndantuma pabodzi na mʼbale unango. Kodi Tito akwata pinthu pyanu?+ Kodi ife nee tisacita pinthu munjira ibodzi ene? Kodi ife nee tisafamba munjira ibodzi ene?

19 Kodi mu ndzidzi unoyu onsene imwe musanyerezera kuti ife tiri kusaka kubvunulirika kuna imwe? Ife tisalonga pyenepi pamaso pa Mulungu ninga atowereri a Kristu. Mbwenye abale akufunika, pyonsene pinacita ife ndi toera kukuwangisani. 20 Thangwi ndisagopa kuti ndingafika kuna imwe, nee ndinakugumanani ninga munafunira ine, pontho ine nee ndinakhala ninga munafunira imwe; mbwenye panango ndinagumana nthonga, ntcanje, kuipirwa, kukhonda bverana, kuserusana,* mapsweda, makhaliro akudzikuza na kucita pinthu mwakukhonda linganira. 21 Ine ndisagopa kuti panango, ndingabwera pontho kuna imwe, Mulungu wanga anandipasa manyadzo pamaso panu, mbandilira thangwi ya anthu azinji akuti kale adawa, mbwenye nee atcunyuka ku macitiro awo akunyanyasa, ulukwali* na pinthu pyakupasa manyadzo pidacita iwo.

13 Uno ndi ulendo wacitatu wakuti ine ndisafuna kudzakuonani. “Cinthu consene cisafunika kukhala cakutawirika khala pana umboni wa* anthu awiri peno atatu.”+ 2 Maseze cincino ine nee ndiri pabodzi na imwe, mbwenye ndi ninga ndiri pabodzi na imwe paulendo waciwiri, pontho ndiri kucenjeza ale adadawa kale nduli na anango onsene, kuti ndingabwera pontho nee ndinadzaabvera ntsisi, 3 thangwi imwe muli kusaka umboni unapangiza kuti Kristu, wakuti nee ndi wakufewa, mbwenye wakuwanga pakati panu, mwandimomwene asaphatisira ine toera kulonga. 4 Iye akhomerwadi pamuti thangwi yakufewa, mbwenye ali mʼmaso thangwi ya mphambvu za Mulungu.+ Ndimomwene kuti ifembo ndife akufewa pabodzi na iye,+ mbwenye tinadzakhala pabodzi na iye thangwi ya mphambvu zinapangiza Mulungu kuna imwe.+

5 Pitirizani kuonesesa khala muciri akuwanga mu cikhulupiro; pitirizani kudingika mwekhene toera mudziwe kuti ndimwe anthu a ntundu wanji.+ Kodi imwe nkhabe dziwa kuti Kristu ali wakuphatana na imwe? Kusiyapo khala nee ndimwe akutawirika. 6 Ine ndisadikhira kuti imwe munabvesesa kuti nee ndife anthu akukhonda kutawirika.

7 Cincino ife tisaphembera kuna Mulungu toera imwe mukhonde kucita cinthu cakuipa, tayu toera ife tioneke ninga anthu akutawirika, mbwenye toera imwe mucite pinthu pyadidi, maseze anango asationa ninga ndife anthu akukhonda kutawirika. 8 Thangwi ife nkhabe kucita pinthu pinaphonyana na undimomwene, mbwenye tisacita pinthu pinabverana na undimomwene. 9 Mwandimomwene, ife tisatsandzaya ndzidzi onsene unakhala ife akufewa, imwe mbamukhala akuwanga. Ife tisacita phembero toera imwe mukwanise kucita macinjo anafunika imwe kucita. 10 Na thangwi ineyi, ine ndiri kulemba pinthu pyenepi mu ndzidzi wakuti ndiri kutali na imwe, toera ndingabwera kuna imwe, ndikhonde kuphatisira mwakuipa mphambvu zidandipasa Mbuya toera kuwangisa,+ tayu toera kufudza.

11 Pakumalisa, abale anga, pitirizani kukomerwa, kucita macinjo anafunika imwe kucita, kubalangazwa,+ kunyerezera munjira ibodzi ene,+ kukhala anthu antendere;+ natenepa Mulungu waufuni na wantendere+ anadzakhala na imwe. 12 Mwanyikanani unango na ndzace na mpswompswono ninga abale. 13 Anthu akucena onsene asapereka mwanyikiro kuna imwe.

14 Khalani na kukoma ntima kukulu kwa Mbuya Yezu Kristu na ufuni wa Mulungu pabodzi na nzimu wakucena udapaswa ife tonsene.