TSAMBA KUNA AKRISTU A KU FILIPI

1 Ine Paulu na Timoti, ndife atumiki a Kristu Yezu, ndiri kulembera anthu akucena onsene ali ku Filipi,+ akuti ali akuphatana na Kristu Yezu, kuphatanizambo akulu a mpingo* pabodzi na atumiki akutumikira:+

2 Mulungu Babathu pabodzi na Mbuya Yezu Kristu mbapangize kukoma ntima kukulu kuna imwe, pontho akupaseni ntendere.

3 Ndisapereka takhuta kuna Mulungu wanga ndzidzi onsene unakukumbukirani ine 4 mʼmaphembero anga onsene akudembetera anacita ine thangwi ya imwe monsene. Ndisacita mwakutsandzaya phembero ibodzi na ibodzi yakudembetera,+ 5 thangwi yakuphedzera kwanu* mphangwa zadidi kubulukira pa ntsiku yakutoma mpaka ndzidzi uno. 6 Thangwi ine ndisanyindira kuti: Ule adatoma kuphata basa yadidi mwa imwe, anadzaifikisa kunkhomo*+ mpaka pa ntsiku ya Kristu Yezu.+ 7 Mphyakuthema kwa ine kunyerezera munjira ineyi thangwi ya imwe monsene, thangwi imwe muli muntima mwanga, imwe anatambirambo kukoma ntima kukulu pabodzi na ine, pakumangwa kwanga na maunyolo,+ pakutsidzikiza na pakukhazikisa mphangwa zadidi+ mwakubverana na mwambo.*

8 Mulungu asadziwa kuti ine ndisakutsuwani kakamwe monsene, ufuni ukulu uli na ine kuna imwe ndi ninga unapangiza Kristu Yezu. 9 Pakucita phembero, ine ndisapitiriza kuphemba kuti: Ufuni wanu upitirize kuthimizirika kakamwe,+ pabodzi na cidziwiso candimomwene+ na luso yadidi yakudzindikira;+ 10 toera imwe mudzindikire kuti ndi pinthu pipi pyakufunika kakamwe,+ toera mukhale anthu akusowa cilema,* mbamukhonda kugwegwedusa anango+ mpaka pa ntsiku ya Kristu; 11 pontho mudzale na nsapo wakulungama, wakuti usabuluka kuna Yezu Kristu,+ toera kupasa mbiri na kusimba Mulungu.

12 Abale, cincino ndisafuna mudziwe kuti pinthu pidandicitikira, pyaphedza toera mphangwa zadidi ziende kutsogolo, 13 thangwi anyakuonera+ onsene a mambo wa ku Roma na anthu anango onsene abva kuti ine ndamangwa na maunyolo thangwi ya Kristu.+ 14 Cincino, abale azinji mwa Mbuya, ali na cinyindiro thangwi yakumangwa kwanga na maunyolo, pontho onsene asapangiza cipapo kakamwe, mbalonga mafala a Mulungu mwakukhonda gopa.

15 Ndimomwene kuti anango asamwaza mphangwa zinalonga pya Kristu mwabibvu na mwakuzondana, mbwenye anango asacita pyenepi na cifuno cadidi. 16 Ale anamwaza mphangwa na cifuno cadidi asadziwisa pya Kristu thangwi ya ufuni, thangwi iwo asadziwa kuti ine ndasankhulwa toera kutsidzikiza mphangwa zadidi;+ 17 mbwenye ale anamwaza mphangwa mwabibvu na mwakuzondana, nee asacita pyenepi na cifuno cadidi, thangwi iwo asafuna kundibweresera nyatwa, mu ndzidzi wakuti ine ndamangwa na maunyolo. 18 Kodi pyenepi pisabweresanji? Anthu ali kubva mphangwa zinalonga pya Kristu, mwakukhonda tsalakana khala ale anazimwaza asacita pyenepi mwaciphamaso, peno na cifuno cadidi, pontho ine ndisatsandzaya na pyenepi. Mwandimomwene, ine ndinapitiriza kutsandzaya, 19 thangwi ine ndisadziwa kuti pyenepi pinabweresa cipulumuso kuna ine kubulukira mʼmaphembero anu akudembetera+ na ciphedzo ca nzimu wakucena unapereka Yezu Kristu.+ 20 Ine ndiri na cinyindiro cikulu kakamwe, pontho ndisadikhira kuti nee ndinadzakhala na manyadzo, nee pangʼono pene; mbwenye thangwi yakulonga kwanga na cinyindiro consene, Kristu asimbwe cincino kubulukira mʼmanungo mwanga, ninga munasimbwa iye ndzidzi onsene, mwakukhonda tsalakana khala ndiri na umaso peno ndafa.+

21 Thangwi kuna ine, kukhala mʼmaso ndi Kristu,+ kufa ndi kuwina.+ 22 Mbwenye khala ndisafunika kupitiriza kukhala na umaso mʼmanungo aunyama, basa yanga inabala misapo mizinji; ngakhale tenepo, ine nee ndinalonga kuti mbidasankhulanji. 23 Pa pinthu piwiri ipi, ine nkhabe dziwa kuti ndinasankhulanji, thangwi ine ndisafuna kuombolwa toera ndikhale pabodzi na Kristu,+ pyakuti mwandimomwene, ndi pyadidi kakamwe.+ 24 Mbwenye thangwi ya imwe, mphyadidi kakamwe kuti ine ndipitirize na manungo ano aunyama. 25 Natenepa, ine ndiri na cinyindiro cakuti nee ndinafa cincino, mbwenye ndinapitiriza kukhala na imwe monsene toera muthambaruke, mbamukhala akutsandzaya mu cikhulupiro, 26 toera ndingabwera pontho kuna imwe, kutsandzaya kwanu mwa Kristu Yezu kuthimizirike kakamwe thangwi ya ine.

27 Basi ene pangizani makhaliro adidi mwakubverana na mphangwa zadidi zinalonga pya Kristu,+ toera ndingabwera kudzakuonani, peno ndingakhala kutali na imwe, ndibve mphangwa zinalonga pya imwe, pontho ndidziwe kuti musapitiriza kukhala akuwanga na akuphatana kakamwe, ninga manungo mabodzi basi,*+ mbamuwangisira pabodzi pene toera mupitirize kukhala na cikhulupiro ku mphangwa zadidi, 28 mbamukhonda tawira kugopeswa na anyamalwa anu. Ceneci ndi cipangizo cakuti iwo anadzafudzwa,+ mbwenye imwe munadzapulumuswa;+ pontho pyenepi pisabuluka kuna Mulungu. 29 Thangwi imwe mwapaswa nkhombo mwa Kristu, tayu basi toera kukhulupira iye, mbwenye toera kuonambo nyatwa thangwi ya iye.+ 30 Thangwi imwe muli kuthimbana na nyatwa ibodzi ene idaona imwe mbandikathimbana nayo,+ yakuti cincino imwe musadziwa kuti ndisapitiriza kuthimbana nayo.

2 Khala muli na ciwangiso toera kupereka kubulukira mwa Kristu, khala muli na cibalangazo caufuni, citsalakano, ufuni na ntsisi, 2 khalani na ndzeru zibodzi zene, ufuni ubodzi ene, khalani akuphatana kakamwe, mbamukhala na manyerezero mabodzi ene, munjira ineyi imwe munanditsandzayisa kakamwe.+ 3 Lekani kucita pinthu mwamapika+ peno mwakudzikuza,+ mbwenye citani pinthu mwakucepeseka,* mbamuona andzanu kukhala akulu kupiringana imwe.+ 4 Lekani kunyerezera pinafuna imwe basi,+ mbwenye nyerezeranimbo pinafuna anango.+

5 Pitirizani kukhala na manyerezero anewa, akuti Kristu akhalambo nawo,+ 6 maseze iye akhali ninga Mulungu,+ nee anyerezera kuti mbadakwanisa kuyesera kukhala sawasawa na Mulungu.+ 7 Iye nee acita pyenepi, mbwenye asiya pyonsene pikhali na iye,+ mbakhala ninga bitcu, mbadzakhala munthu.*+ 8 Kusiyapo pyenepi, pidakhala iye ninga munthu,* iye acepeseka mbakhala wakubvera mpaka kufa,+ inde, kufa pamuti wakusikimizira.*+ 9 Na thangwi ineyi, Mulungu ankuza mbamuikha pa mbuto yapadzulu kakamwe;+ pontho, mwakukoma ntima, iye ampasa dzina yakuti iri padzulu pa madzina anango onsene,+ 10 toera mabondo a onsene ali kudzulu, pa dziko yapantsi na pantsi pa mataka,+ agodame mu dzina ya Yezu, 11 pontho toera anthu onsene alonge* pakweca kuti Yezu Kristu+ ndi Mbuya, toera kupasa mbiri Mulungu Baba.

12 Natenepa, abale anga akufunika, ninga munabvera imwe ndzidzi onsene, tayu basi ndingakhala pakati panu, mbwenye cincino musafuna kakamwe kubvera mu ndzidzi wakuti nee ndiri pakati panu, pitirizani kucita pyenepi mwakugopa na mwakutetemera, toera mukwanise kupulumuswa. 13 Thangwi Mulungu ndi ule wakuti mwakubverana na pinafuna iye, ali kuphata basa muna imwe, iye asakupasani cifuno na mphambvu toera mucite pinafuna iye. 14 Pitirizani kucita pinthu pyonsene mwakukhonda dungunya,+ nee kulongezana,+ 15 toera mukhale anthu akusowa mulando na akulungama, ana a Mulungu+ akusowa midonthi pakati pa anthu akuipa+ akuti nkhabe kucita pinthu pyakulungama. Imwe musayetimira pakati pawo ninga ceza mu dziko ino,+ 16 mbamupitiriza kuphatirira na manja mawiri mafala a umaso.+ Natenepa, ine ndinadzakhala na thangwi toera kutsandzaya pa ntsiku ya Kristu, thangwi yakudziwa kuti nee ndathamanga papezi, pontho nee ndawangisira papezi. 17 Natenepa, maseze ndisaperekeka ninga muoni wa pyakumwa+ pinathirirwa pa ntsembe+ na pa basa yakutumikira anango,* yakuti cikhulupiro canu cakukulumizani toera kuiphata, ine ndisakomerwa, pontho ndisatsandzaya pabodzi na imwe monsene. 18 Munjira ibodzi ene, imwe musafunikambo mukomerwe, mbamutsandzaya pabodzi na ine.

19 Cincino ndisadikhira mwa Mbuya Yezu kuti ndinakutumizirani Timoti+ mwakukhonda dembuka, toera ine ndiwangiswe ndingatambira mphangwa zinalonga pya imwe. 20 Thangwi ine nkhabebve munthu unango ali na manyerezero ninga ace, wakuti anakutsalakanani mwadidi. 21 Thangwi anango onsene akusaka pinafuna iwo basi, tayu pinafuna Yezu Kristu. 22 Mbwenye imwe musadziwa makhaliro adidi adapangiza iye, kuti ninga mwana+ anaphata basa na babace, iye atumikira ninga bitcu pabodzi na ine toera kuendesa kutsogolo mphangwa zadidi. 23 Natenepa, ndiye anadikhira ine kutumiza kuna imwe mwakukhonda dembuka, ndingamala kudziwa kuti ninji pinafuna kundicitikira. 24 Mwandimomwene, ine ndisanyindira mwa Mbuya kuti mwakukhonda dembuka ndinabwerambo kuna imwe.+

25 Mbwenye cincino ndisaona kuti mphyadidi nditumize kuna imwe Epafrodhito, wakuti ndi mʼbale wanga, nyabasa ndzanga na nyankhondo ndzanga, ule adatuma imwe toera kundiphedza mu pinthu pikhasowa ine,+ 26 cincino iye asafuna kakamwe kukuonani monsene, pontho iye ali wakutsukwala thangwi imwe mwabva kuti iye akhaduwala. 27 Mwandimomwene, iye aduwala, mbabwerera dhuzi na kufa; mbwenye Mulungu ambvera ntsisi, inde, nee abvera ntsisi iye basi, mbwenye abverambo ntsisi ine, toera kutsukwala kuli na ine cincino kukhonde kuthimizirika. 28 Natenepa, ine ndiri kuntumiza mwakucimbiza kakamwe, toera mungamuona mutsandzaye pontho, inembo ndikhonde kudzudzumika kakamwe. 29 Mphapo, ntambireni na kutsandzaya konsene mwa Mbuya ninga pinacita imwe ndzidzi onsene, pontho pitirizani kulemedza kakamwe abale ninga anewa,+ 30 thangwi iye akhali dhuzi na kufa thangwi ya basa ya Kristu,* mbaikha umaso wace pangozwi toera kundicitira pinthu pikhafunika imwe kundicitira mbamudakhala kuno.+

3 Pakumalisa, abale anga, pitirizani kutsandzaya mwa Mbuya.+ Kuna ine, si pyakunetesa tayu kukulemberani pontho pinthu pibodzi pyene, mbwenye pyenepi ndi toera kukutsidzikizani.

2 Citani mphole-mphole na anambwa; citani mphole-mphole na ale anacita pinthu pyakuipa; citani mphole-mphole na ale anakulumiza anthu toera kusidzwa.+ 3 Thangwi ife ndife adasidzwa mwandimomwene,+ thangwi tisaphata basa yakucena na ciphedzo ca nzimu wa Mulungu, ife tisadzikuza mwa Kristu Yezu,+ pontho nee tisanyindira pinthu pyaunyama, 4 maseze ine, kupiringana onsene ndiri na mathangwi toera kunyindira pinthu pyaunyama.

Khala munthu asanyerezera kuti ali na mathangwi toera kunyindira pinthu pyaunyama, ine ndiri na mathangwi mazinji kupiringana iye: 5 Ndasidzwa pa ntsiku yacisere,+ ndine wa mbumba ya Izraeli, wa dzindza ya Bhenjamini, Muhebheri adabalwa na Ahebheri;+ Nfarisi+ wakuti akhabvera Mwambo; 6 thangwi ya phinga, ine ndikhatcinga mpingo;+ mwakubverana na ulungami thangwi yakubvera mwambo, ine ndapangiza kukhala munthu wakusowa mulando. 7 Ngakhale tenepo, pinthu pikhaona ine ninga pyakufunika, ndisapiona ninga pyakusowa basa* thangwi ya Kristu.+ 8 Kusiyapo pyenepi, mwandimomwene ine ndisaona pinthu pyonsene ninga pyakusowa basa thangwi ya ntengo ukulu kakamwe wa kudziwa Kristu Yezu Mbuyanga. Thangwi ya iye, ine ndatawira kuluza pinthu pyonsene, pontho ndisapiona ninga pirombo,* toera ndikwanise kuwina Kristu,* 9 pontho toera ndigumanike kuti ndiri wakuphatana na iye, tayu thangwi yaulungami wanga kubulukira mu kubvera Mwambo, mbwenye thangwi yaulungami unabulukira mu kukhulupira+ Kristu,+ ulungami unoyu usabuluka kuna Mulungu thangwi ya cikhulupiro.+ 10 Pinafuna ine ndi kudziwa iye, pontho ndidziwe mphambvu za ule adamulamusa muli akufa,+ ndionembo nyatwa zidaona iye,+ mbanditawira kufa ninga mudafera iye,+ 11 toera ndione khala ndinakwanisa kulamuswa pabodzi na ale anafuna kulamuswa muli akufa pakutoma.+

12 Pyenepi nee pisabveka kuti ndatambira kale muoni wanga, peno kuti ndine wakulungama, mbwenye ndisawangisira+ toera pingakwanisika, ndiwine cire cakuti Kristu andisankhula toera kucitambira.+ 13 Abale anga, ine nee ndisaona kuti ndatambira kale muoni wanga; mbwenye undimomwene ndi wakuti: Ine ndisaduwala pinthu piri nduli mwanga,+ mbandiwangisira* toera ndiphate pinthu piri patsogolo panga,+ 14 ndisawangisira toera ndikwanise pinafuna ine,+ toera nditambire muoni wakucemerwa+ kwanga na Mulungu toera kuenda kudzulu kubulukira mwa Kristu Yezu. 15 Natenepa, tonsene akuti ndife akukola mwauzimu,+ tisafunika kukhala na manyerezero anewa, pontho munganyerezera pinthu munjira yakusiyana na ineyi, Mulungu anadzakupangizani manyerezero akulinganira. 16 Mbwenye mwakukhonda tsalakana kuti tathambaruka mpaka papi, tendeni tipitirize kufamba* munjira ibodzi ene.

17 Abale, mwakuphatana towezerani pinacita ine,+ pontho towezerani ale anacita pinthu munjira ibodzi ene idakupangizani ife. 18 Thangwi pana anthu azinji akuti ndikhaalonga kazinji kene, mbwenye cincino ndisaalonga nakulira, thangwi iwo asacita pinthu* ninga anyamalwa a muti wakusikimizira* wa Kristu. 19 Mamalisiro awo ndi kufudzwa, mulungu wawo ndi mimba zawo, iwo asadzikuza thangwi ya pinthu pyakuti akhafunika kupasika napyo manyadzo, pontho asanyerezera pinthu pya pantsi pano basi.+ 20 Mbwenye ife kwathu+ ndi kudzulu,+ pontho tisadikhira na cifuno cikulu mpulumusi, Mbuya Yezu Kristu,+ wakuti ali kudzulu, 21 iye anadzacinja manungo athu akupwazika toera akhale ninga manungo ace a mbiri.+ Iye anadzacita pyenepi na mphambvu yace ikulu yakuti asakwanisa kutonga nayo pinthu pyonsene.+

4 Natenepa, abale anga, ine ndisakufunani, pontho ndisakutsuwani, imwe ndimwe kukomerwa kwanga na nthimba yanga,+ imwe abale anga akufunika, pitirizani kukhala akuwanga+ tenepo mwa Mbuya.

2 Ine ndisadembetera Evodhiya na Sintike toera akhale na manyerezero mabodzi ene mwa Mbuya.+ 3 Pontho ine ndisaphembambo iwe, ninga nyabasa ndzanga wakunyindirika toera upitirize kuphedza akazi anewa adawangisira* pabodzi na ine mʼbasa yakumwaza mphangwa zadidi. Iwo acita pyenepi na Klementi pabodzi na anyabasa andzanga onsene, akuti madzina awo alembwa mʼbukhu ya umaso.+

4 Ndzidzi onsene tsandzayani* mwa Mbuya. Ine ndinalonga pontho kuti: Tsandzayani!+ 5 Anthu onsene adziwe kuti imwe muli na maonero akulinganira.+ Mbuya ali dhuzi. 6 Lekani kudzudzumika, nee na cinthu cibodzi,+ mbwenye mu pinthu pyonsene, dziwisani Mulungu maphembo anu pakucita phembero, kudembetera na kupereka takhuta;+ 7 natenepa, ntendere+ wa Mulungu wakuti usapiringana kubvesesa konsene, unadzatsidzikiza mitima yanu+ na manyerezero* anu kubulukira mwa Kristu Yezu.

8 Pakumalisa abale anga, pinthu pyonsene pyakuti ndi pyandimomwene, pyonsene pyakuti ndi pyakufunika, pyonsene pyakuti ndi pyakulungama, pyonsene pyakuti ndi pyakucena,* pyonsene pyakuti pyathema kufuniwa, pyonsene pyakuti pisalongwa mwadidi, pyonsene pyakuti ndi pyadidi na pyonsene pyakuti pyathema kusimbwa, pitirizani kunyerezera* pinthu pyenepi.+ 9 Citani pinthu pidapfundza imwe, pidatawira imwe na pidabva imwe kuna ine, kuphatanizambo pire pidandiona imwe mbandikacita;+ natenepa, Mulungu wantendere anadzakhala na imwe.

10 Ine ndisakomerwa kakamwe mwa Mbuya, thangwi cincino imwe mwatoma pontho kupangiza kuti musandinyerezera.+ Maseze imwe mukhadzudzumika thangwi ya ine, mbwenye nee mukhali na ndzidzi toera kupangiza pyenepi. 11 Nee ndiri kulonga pyenepi thangwi ciripo cidasowa ine, thangwi ine ndapfundza kukhala munthu wakukomerwa* na piri na ine mʼmakhaliro onsene.+ 12 Ine ndisadziwa kukhala na pinthu pyakucepa,+ pontho ndisadziwa kukhala na pinthu pizinji. Mu pinthu pyonsene na mʼmakhaliro onsene, ine ndapfundza cinthu cakuti anthu azinji nkhabe kucidziwa: Kukhala wakukomerwa, mwakukhonda tsalakana khala ndakhuta peno ndiri na njala, khala ndiri na pinthu pizinji peno ndasowa pinthu. 13 Mu pinthu pyonsene, ine ndisakwanisa kukhala na mphambvu thangwi ya ule anandipasa mphambvu.+

14 Mbwenye imwe mwacita mwadidi kundiphedza pa nyatwa yanga. 15 Mwandimomwene, imwe abale a ku Filipi musadziwambo kuti pidamala imwe kubva mphangwa zadidi paulendo wakutoma, pidabuluka ine ku Masedhonya, nkhabe mpingo unango udandiphedza peno udatawira ciphedzo canga, kusiyapo imwe basi;+ 16 thangwi pikhali ine ku Tesalonika imwe mwanditumizira pinthu toera kundiphedza, tayu kabodzi, mbwenye kawiri. 17 Pyenepi nee pisabveka kuti ine ndiri kusaka kuwina miyoni, mbwenye ndisafuna kakamwe kuti mutambire nkhombo zakuti zinadzathimizira ntengo wa pinthu piri na imwe. 18 Ngakhale tenepo, ine ndiri na pyonsene pinafuna ine, pontho ndiri na pizinji kupiringana pinafuna ine. Nkhabebve cinasowa ine, makamaka cincino pakumala kutambira pinthu pidatumiza imwe na Epafrodhito,+ pyakuti ndi ntsembe yakutawirika, yakununkhira,+ na yadidi pamaso pa Mulungu. 19 Natenepa, Mulungu wanga anadzakupasani mwakudzala manja+ pyonsene pinafuna imwe mwakubverana na mpfuma ya mbiri Yace kubulukira mwa Kristu Yezu. 20 Cincino, Mulungu wathu na Babathu, mbapaswe mbiri kwenda na kwenda. Ameni.

21 Perekani mwanyikiro wanga kuna anthu akucena onsene akuti ali akuphatana na Kristu Yezu. Abale akuti ali pabodzi na ine asapereka mwanyikiro wawo kuna imwe. 22 Anthu akucena onsene, mbwenye makamaka anthu a panyumba ya Sezari,+ asapereka mwanyikiro wawo kuna imwe.

23 Kukoma ntima kukulu kwa Mbuya Yezu Kristu mbakukhale na imwe thangwi ya makhaliro adidi anapangiza imwe.*