TSAMBA YAKUTOMA KUNA TIMOTI

1 Ine Paulu, mpostolo wa Kristu mwakubverana na cisankhulo ca Mulungu Mpulumusi wathu, pabodzi na Kristu Yezu, cidikhiro cathu,+ 2 ndiri kulembera iwe Timoti*+ mwananga wandimomwene+ mu cikhulupiro:

Mulungu Baba pabodzi na Mbuyathu Kristu Yezu mbapangize kukoma ntima kukulu, ntsisi na ntendere kuna iwe.

3 Ninga mudakuwangisa ine toera usale ku Efeso pikhafuna ine kuenda ku Masedhonya, cincino ndisakuwangisambo toera upange anthu anango kuti akhonde kumwaza pipfundziso pyakusiyana na pyathu,* 4 akhonde kubvesera pithankano pyapezi+ na kusaka kudziwa pya madzindza. Pinthu pyenepi nkhabe phedza,+ basi ene pisasosesa mphoka zakukhonda mala, pyenepi nee ndi pinthu pidatipasa Mulungu toera kuwangisa cikhulupiro cathu. 5 Mwandimomwene, cifuniro ca cipfundziso* ceneci ndi toera ife tipangize ufuni+ unabulukira muntima wakucena, pontho tikhale na cikumbuntima cadidi na cikhulupiro+ cakusowa umpfakafaka. 6 Anango asiya kucita pinthu pyenepi, mbapeuswa toera kuketesana thangwi ya pinthu pyakusowa basa.+ 7 Iwo asafuna kukhala apfundzisi+ a mwambo, mbwenye iwo nkhabe kubvesesa pinthu pinalonga iwo, nee pire pinakakamira iwo kakamwe.

8 Ife tisadziwa kuti Mwambo ndi wadidi khala munthu asautoweza mwadidi,* 9 mbatidzindikira kuti miyambo nee isacitirwa munthu wakulungama, mbwenye isacitirwa ale anapwaza mwambo,+ anakhonda kubvera, anacita pinthu pyakuipa na anyakudawa, anthu akukhonda kukhulupirika* na ale anapwaza pinthu pyakucena, ale anapha pai wawo peno mai wawo, mapanga, 10 anthu anacita ulukwali,* amuna anagona amuna andzawo,* ale anaba anthu, anyauthambi, anadumbira papezi,* na ale anacita pinthu pinango pyakuti nkhabe kubverana na cipfundziso cadidi,*+ 11 cakuti cisabuluka kuna Mulungu wakutsandzaya, mwakubverana na mphangwa zadidi kakamwe zidapaswa ine.*+

12 Ine ndisapereka takhuta kuna Kristu Yezu Mbuyathu, ule adandipasa mphambvu, thangwi iye andiona kuti ndine wakukhulupirika, mbandipasa basa toera ndiiphate,*+ 13 maseze kale ine ndikhali munthu wakuxola Mulungu,+ ndikhatcinga mbumba yace, pontho ndikhali waukali. Ngakhale tenepo, ine ndabverwa ntsisi thangwi ndikhacita pinthu mwakukhonda dziwa na mwakusowa cikhulupiro. 14 Mbwenye Mbuyathu apangiza kukoma ntima kukulu kakamwe kuna ine, mbanditambira cikhulupiro na ufuni kubulukira mwa Kristu Yezu. 15 Mafala awa ndi akunyindirika, pontho athema kukhulupirwa na ntima onsene: Kristu Yezu abwera pa dziko yapantsi toera kupulumusa anyakudawa.+ Mwa iwo, ine ndine nyakudawa kakamwe.+ 16 Ngakhale tenepo, ine ndabverwa ntsisi, toera kubulukira mwa ine ninga nyakudawa kakamwe, Kristu Yezu apangize kupirira kwace konsene, mbandiphatisira ninga cipangizo kuna ale anafuna kunʼkhulupira toera kukhala na umaso wakukhonda mala.+

17 Kuna iye Mambo wakwenda na kwenda,+ wakukhonda kufa,+ wakukhonda kuoneka,+ Mulungu mʼbodzi basi,+ mbasimbwe, pontho mbapaswe mbiri kwenda na kwenda. Ameni.

18 Ine ndiri kupereka cipfundziso* ici kuna iwe mwananga Timoti, mwakubverana na maprofesiya adalongwa thangwi ya iwe, toera kubulukira mwa iwo, iwe upitirize kumenya nkhondo yadidi,+ 19 mbupitiriza kukhala na cikhulupiro, pontho na cikumbuntima cadidi,+ cakuti anango acikhonda, mbaluza cikhulupiro cawo ninga munalobzweka bote mʼmadzi. 20 Anango mwa iwo ndi Imeneu+ na Alexandre, ine ndaapereka kuna Sathani,+ toera apfundze kubulukira mu kusandikwa, kuti nee asafunika kulonga mafala akupwaza Mulungu.

2 Mbwenye pakutoma ndisakuwangisani monsene toera mucite maphembero kuna Mulungu, mucite maphembero akudembetera, mucite maphembero thangwi ya anango, pontho mucite maphembero akupereka takhuta, mucitire pyenepi anthu a mitundu yonsene, 2 kuphatanizambo amambo na anthu onsene ali mu mbuto za utongi,*+ toera tipitirize kukhala na umaso wakupfulika na wantendere, tiperekeke na ntima onsene kuna Mulungu, mbatikhala na manyerezero adidi.+ 3 Pyenepi mphyadidi na pyakutawirika pamaso pa Mpulumusi wathu, Mulungu,+ 4 wakuti asafuna kuti anthu a mitundu yonsene apulumuswe,+ pontho adziwe mwadidi* undimomwene. 5 Thangwi alipo Mulungu mʼbodzi basi,+ na muimiriri mʼbodzi basi+ pakati pa Mulungu na anthu,+ munthu mʼbodzi, Kristu Yezu,+ 6 ule adaperekeka ninga ciomboli cakulinganira kuna anthu onsene.*+ Umboni unalonga pyenepi unadzaperekwa pa ndzidzi wace wakuthema. 7 Toera kupereka umboni unoyu,+ ine ndasankhulwa toera ndikhale mʼmwazi mphangwa na mpostolo.+ Ine ndiri kulonga undimomwene, nee ndiri kulonga uthambi, ine ndasankhulwa toera kupfundzisa anthu a madzindza anango+ pya cikhulupiro na undimomwene.

8 Natenepa, ine ndisafuna kuti mu mbuto zonsene, amuna apitirize kucita maphembero, alamuse manja awo akucena,*+ mwakukhonda kuipirwa,+ nee kuketesana.+ 9 Munjira ibodzi ene, akazi asafunika kubvala nguwo zakuthema,* abalikise manungo awo mwakulinganira, mbapangiza ndzeru zadidi;* tayu na mitundu yakuluka tsisi, nee na ouro, nee na perola* peno nguwo zakudhula kakamwe,+ 10 mbwenye abalikise manungo awo munjira yakuthema ninga munacitira akazi analemedza Mulungu,+ kubulukira mʼmabasa adidi.

11 Pakupfundza, nkazi asafunika akhale wakumatama,* mbabvera na ntima onsene.+ 12 Ine nkhabe kutawirisa kuti nkazi apfundzise peno atonge mamuna, mbwenye asafunika apitirize kukhala wakumatama.*+ 13 Thangwi adatoma kucitwa ndi Adhamu, buluka penepo acitwambo Eva.+ 14 Pontho, Adhamu nee anyengezwa, mbwenye nkazi anyengezwa,+ mbakhala nyakudawa. 15 Ngakhale tenepo, iye anadzapulumuka* angabala ana,+ basi ene angapitiriza mu cikhulupiro, mu ufuni na mʼmakhaliro akucena, mbakhala na ndzeru zadidi.*+

3 Mafala awa ndi akunyindirika: Khala munthu akuwangisira toera akhale muyangʼaniri,*+ iye asafuna basa yadidi. 2 Mbwenye muyangʼaniri* asafunika akhale munthu wakusowa mathangwi akusandikwa nawo, mamuna wa nkazi mʼbodzi basi, wakulinganira mu pinthu pinacita iye, wandzeru zadidi,*+ wakutsalakana mwadidi pinthu,+ wakutambira alendo,+ wakuthema toera kupfundzisa. 3 Nee asafunika kukhala nyamwera,+ nee wakumenya munthu, mbwenye akhale wa maonero akulinganira,+ tayu wanthonga.+ Nee asafunika kufuna kakamwe kobiri.+ 4 Asafunika kutsogolera mwadidi anthu a panyumba pace,* anace asafunika akhale akubvera na ntima onsene.+ 5 (Thangwi khala munthu nkhabe dziwa kutsogolera anthu a panyumba pace, anakwanisa tani kutsalakana mpingo wa Mulungu?), 6 nee asafunika kukhala munthu adatoma kwene cincino kukhulupira Kristu,+ toera akhonde kudzikuza kakamwe,* mbatongwa munjira ibodzi ene ninga mudatongerwa Dyabo. 7 Kusiyapo pyenepi, iye asafunikambo kulongwa mwadidi* na anthu akunja,+ toera akhonde kupwazwa,* mbagwa mu nsampha wa Dyabo.

8 Munjira ibodzi ene, atumiki akutumikira asafunika kukhala akulemedzeka, akukhonda kunyengeza pakulonga,* nee asafunika kumwa kakamwe vinyu, nee akufuna kuwina pinthu munjira yakukhonda kulungama.+ 9 Asafunika kutowezera* cibisobiso cakucena ca cikhulupiro, mbakhala na cikumbuntima cakucena.+

10 Pontho, pakutoma iwo asafunika kudingwa* toera aoniwe khala athema; buluka penepo, mbatumikire ninga atumiki, angasowa mathangwi akupambizirwa nawo.+

11 Munjira ibodzi ene, akazi asafunika akhale akulemedzeka, tayu anyamapsweda,+ asafunika akhale akulinganira mu pinthu pinacita iwo, akukhulupirika mu pinthu pyonsene.+

12 Ntumiki wakutumikira asafunika akhale mamuna wa nkazi mʼbodzi basi, pontho atsogolere mwadidi anace na anthu a panyumba pace. 13 Thangwi amuna anatsogolera mwadidi asawina mbiri ya makhaliro adidi, pontho anakwanisa kulonga na cinyindiro consene pya cikhulupiro cinagumanika mwa Kristu Yezu.

14 Ine ndiri kukulembera pinthu pyenepi, maseze ndisadikhira kuti ndinabwera kuna iwe cincino, 15 toera ndingadembuka, udziwe makhaliro anafunika iwe kupangiza ninga munthu wa panyumba ya Mulungu,+ yakuti ndi mpingo wa Mulungu wa mʼmaso, wakuti usaphedzera, mbutsidzikiza undimomwene. 16 Mwandimomwene, cibisobiso ceneci cakucena cinalonga pya kukhala wakuperekeka kuna Mulungu ndi cikulu kakamwe: ‘Yezu adzakhala munthu,+ aoniwa kuti ndi wakulungama mu nzimu,+ aonekera kuna aanju,+ anthu a madzindza anango amwazirwa mphangwa zinalonga pya iye,+ akhulupirwa na anthu pa dziko yapantsi,+ mbatambirwa na mbiri kudzulu.’

4 Mbwenye nzimu wa Mulungu usalonga pakweca* kuti kutsogolo inadzafika midzidzi yakuti anthu anango anadzasiya cikhulupiro, mbabvesera mafala akunyengeza anaoneka ninga abuluka kuna Mulungu,*+ na pipfundziso pya madimonyo, 2 mbakwatika na umpfakafaka wa anthu analonga uthambi,+ akuti cikumbuntima cawo ndi ninga dazi idaoneka thangwi yakuikhwa cidzindikiro na utale wakupisa. 3 Iwo asakhondesa kusemba,*+ mbapanga anthu toera acalire pyakudya pinango.+ Mbwenye Mulungu acita pyakudya pyenepi toera ale akuti ali na cikhulupiro+ thangwi yakudziwa mwadidi undimomwene, akwanise kupidya+ mbapereka takhuta. 4 Thangwi pinthu pyonsene pidacitwa na Mulungu mphyadidi,+ pontho nee cibodzi cisafunika kukhondwa+ khala cisadyiwa mbaciperekerwa takhuta, 5 thangwi ico cisaceneswa na mafala a Mulungu pabodzi na phembero.

6 Ungapereka uphungu unoyu kuna abale, iwe unadzakhala ntumiki wadidi wa Kristu Yezu, wakudyeswa na mafala a cikhulupiro na cipfundziso cadidi cinatowezera iwe mwakukhulupirika.+ 7 Mbwenye khonda pithankano pyapezi+ na pyakusowa basa pinapswipisa pinthu pyakucena, ninga pire pinalongwa na akazi anango akukalamba. Munjira inango, wangisira kakamwe, mbukhala na cifuno cakucita pinthu pyakuti pinakuphedza toera kukhala wakuperekeka kuna Mulungu. 8 Thangwi masendzekero anacita munthu toera kuwangisa manungo ace, asaphedza pangʼono basi, mbwenye kuperekeka kuna Mulungu kusaphedza munthu mu pinthu pyonsene, thangwi kusapikira umaso mu ndzidzi uno, na umaso unafuna kudza.+ 9 Mafala anewa ndi akunyindirika, pontho athema kukhulupirwa na ntima onsene. 10 Na thangwi ineyi, ife tisaphata basa mwakuwanga, mbatiwangisira,+ thangwi tisaikha cidikhiro cathu kuna Mulungu wa mʼmaso, wakuti ndi Mpulumusi+ wa anthu a mitundu yonsene,+ makamaka kuna munthu wakukhulupirika.

11 Pitiriza kupereka na kupfundzisa pitsogolero pyenepi. 12 Nee munthu mʼbodzi asafunika kukupwaza thangwi yakukhala kwako mʼphale. Mbwenye pangiza kuti wathema kutowezerwa na anthu akukhulupirika, kubulukira pakulonga, mʼmacitiro ako, pakupangiza ufuni, na mu cikhulupiro, mbupitiriza na makhaliro akucena.* 13 Mpaka kubwera kwanga, pitiriza kukhala waphinga pakuleri kwako pamaso pa anthu,+ pakucenjeza* na pakupfundzisa. 14 Leka kupwaza muoni uli na iwe, udapaswa iwe kubulukira mu profesiya pa ndzidzi udasandzikirwa iwe manja na nsoka wa akulu a mpingo.+ 15 Nyerezera mwadidi* pinthu pyenepi; ikha manyerezero ako onsene mu pinthu pyenepi, toera kuthambaruka kwako kuoneke pakweca kuna anthu onsene. 16 Ndzidzi onsene cita mphole-mphole thangwi ya iwe, pontho thangwi ya cipfundziso cinapereka iwe.+ Pitiriza kucita pinthu pyenepi, thangwi ungacita pyenepi, unadzapulumusa umaso wako na wa ale anakubvesera.+

5 Leka kulonga* mwaukali na mamuna wakukalamba.*+ Mbwenye longa naye ninga munalonga iwe na pai wako, longa na aphale ninga munalonga iwe na abale ako, 2 longa na akazi akukalamba ninga munalonga iwe na mai wako, longa na atsikana na ntima wakucena ninga munalonga iwe na abale ako akazi.

3 Tsalakana* akazi adaferwa na amunawo akuti ndi azicedi.*+ 4 Mbwenye khala nzice ali na ana peno adzukulu, pakutoma anewa asafunika apfundze kukhala anthu akuperekeka kuna Mulungu, mbatsalakana anthu a panyumba pawo.+ Iwo asafunika kubwezera anyakubalawo na ambuyawo pidathema iwo kupaswa,+ thangwi pyenepi mphyadidi pamaso pa Mulungu.+ 5 Nkazi wakuti ndi nzicedi,* wakuti nkhabe munthu wakuntsalakana, asaikha cidikhiro cace kuna Mulungu,+ asapitiriza kudembetera Mulungu, mbacita maphembero masiku na masikati.+ 6 Mbwenye nzice anakhala mʼmaso toera kucita pinafuna iye basi,* afa kale, maseze iye aciri na umaso. 7 Natenepa, pitiriza kupereka pitsogolero pyenepi,* toera iwo akhonde kukhala na mathangwi akusandikwa nawo. 8 Mwandimomwene, khala munthu nkhabe kutsalakana anthu akuti ndiye asafunika kuatsalakana, makamaka anthu a panyumba pace, iye asakhonda cikhulupiro, pontho ndi wakuipa kakamwe kupiringana munthu wakusowa cikhulupiro.+

9 Nkazi anafunika kulemberwa ninga nzice, ndi ule adafikisa pyaka 60 pyakubalwa, wakuti akhali wakukhulupirika kuna mamunace,* 10 anadziwika kuti acita pinthu pyadidi,+ akuza mwadidi anace,+ akhatambira mwadidi alendo,+ akhatsuka miyendo ya anthu akucena,+ akhaphedza anthu akuti akhafuna ciphedzo,+ wakuti akhali waphinga mʼmabasa adidi onsene.

11 Mbwenye leka kulembera azice akuti adzati kukalamba, thangwi pifuno pyawo pyakupita mʼmabonde pingadzakhala ninga mpingizo mu ndzidzi unatumikira iwo Kristu, anadzafuna kusembwa.* 12 Natenepa, iwo anadzakhala na mulando thangwi nee atoweza cikhulupiro cidapangiza iwo pakutoma.* 13 Mu ndzidzi ubodzi ene, iwombo asakhala na nsambo wakusowa pyakucita, mbaenda nyumba na nyumba; iwo nee asasowa pyakucita basi, mbwenye asalongambo mapsweda, asadzudzumika na pinthu pyakuti nee ndi pyawo,+ mbalonga pinthu pyakuti nee akhafunika kupilonga. 14 Natenepa, ndisafuna kuti azice akuti adzati kukalamba asembwe,+ abale ana,+ aphate mabasa a panyumba pawo, toera apingizi akhonde kuona njira yakulonga mwakuipa. 15 Mwandimomwene, azice anango apeuka kale, mbatowera Sathani. 16 Khala nkazi wakuti ndi Nkristu ali na azice panyumba pace, asafunika kuatsalakana toera mpingo ululupirwe. Natenepa, mpingo unakwanisa kutsalakana ale akuti mwandimomwene ndi azicedi.*+

17 Akulu a mpingo anatsogolera mwadidi,+ asafunika kulemedzwa kakamwe,+ makamaka ale anaphata basa mwakuwanga pakulonga* na pakupfundzisa.+ 18 Thangwi Malemba asalonga kuti: “Leka kumanga mulomo wa ngʼombe mu ndzidzi unaphata iyo basa yakutingʼinda mbeu,”+ pontho: “Nyabasa athema kutambiriswa.”+ 19 Leka kutawira kupambizirwa kwa nkulu wa mpingo, kusiyapo khala pana umboni wa anthu awiri peno atatu.+ 20 Ale anacita madawo,+ asandike+ pamaso pa anthu onsene, toera pikhale cenjezo kuna anango.* 21 Ine ndisakupanga mwakubveka pamaso pa Mulungu na Kristu Yezu pabodzi na aanju adasankhulwa, toera utowezere pitsogolero pyenepi mwakusowa tsankhulo peno kuyangʼana nkhope.+

22 Leka cimbiza kusandzikira munthu manja;*+ pontho leka kukhala na mulando wa madawo a anthu anango; pitiriza kukhala na makhaliro akucena.

23 Leka kumwa madzi basi,* mbwenye umwe vinyu pangʼono thangwi ya utenda wako wa mʼmimba, pontho thangwi usaduwala kazinji kene.

24 Madawo a anthu anango asaoneka pakweca, mbatongwa mwakucimbiza, mbwenye madawo a anango asadziwika mukupita kwa ndzidzi.+ 25 Munjira ibodzi ene, mabasa adidi asaoneka pakweca,+ maseze akhonde kuoneka, nee anapitiriza kukhala akubisika.+

6 Ale akuti ndi mabitcu asafunika kupitiriza kulemedza ambuyawo na ntima onsene,+ toera anthu akhonde kulonga mwakuipa dzina ya Mulungu na cipfundziso cace.+ 2 Kusiyapo pyenepi, mabitcu akuti ambuyawo ndi anyakukhulupira, nee asafunika kuapwaza thangwi yakukhala kwawo abale. Mbwenye asafunika kuphata basa na ntima onsene, thangwi anaphedzeka na mabasa awo adidi ndi anyakukhulupira andzawo na abale awo akufunika.

Pitiriza kuapfundzisa pinthu pyenepi, mbuacenjeza toera apicite. 3 Khala munthu asapfundzisa pipfundziso pinango, mbakhonda kutawira cipfundziso cadidi*+ cinabuluka kuna Mbuyathu Yezu Kristu, cipfundziso cakuti nee cisabverana na kuperekeka kwathu kuna Mulungu,+ 4 iye ndi munthu wakudzikuza kakamwe,* pontho nkhabe cinabvesesa iye.+ Iye afungika manyerezero thangwi yakufuna mphoka na kuketesana thangwi ya mafala.+ Pinthu pyenepi pisasosa bibvu, nthonga, kulongana mwakuipa,* kupenulana* mwakuipa, 5 kuketesana ndzidzi onsene thangwi ya pinthu pyakusowa basa pakati pa anthu a manyerezero akuipa+ akuti nkhabe kubvesesa undimomwene, ananyerezera kuti kuperekeka kuna Mulungu ndi njira yakuwina nayo pinthu.+ 6 Mwandimomwene, khala munthu ndi wakuperekeka kuna Mulungu+ mbakomerwa na piri na iye,* asawina pinthu pizinji. 7 Thangwi ife nee tabalwa na cinthu pa dziko yapantsi, pontho tingafa nee tinakwata cinthu.+ 8 Natenepa, khala tiri na cakudya* na cakubvala,* tikomerwe* na pinthu pyenepi.+

9 Mbwenye ale anasankhula kukhala akupfuma asagwa mʼmayesero na mʼmisampha,+ mbakhala na pifuno pizinji pyakusowa basa na pyakuipa; natenepa, iwo asathabuka na nyatwa, mbafa.+ 10 Thangwi kufuna kakamwe kobiri ndi ntcitci wa ntundu onsene wa pinthu pyakuipa, anango adasaka kukhala na ufuni unoyu, apeuswa mu cikhulupiro, mbathabusika okhene na nyatwa zizinji.+

11 Natenepa, iwe ntumiki wa Mulungu,* thawa pinthu pyenepi. Mbwenye pitiriza kusaka ulungami, kukhala wakuperekeka kuna Mulungu, kukhala na cikhulupiro, kukhala na ufuni, kukhala wakupirira na wakupfulika.+ 12 Menya nkhondo yadidi ya cikhulupiro; phatisisa na manja mawiri umaso wakukhonda mala udacemererwa iwe, wakuti wauperekera umboni wadidi pamaso pa anthu azinji.

13 Ine ndisakupanga pamaso pa Mulungu anacitisa kuti pinthu pyonsene pipitirize kukhala na umaso, na pamaso pa Kristu Yezu adapereka umboni wadidi pamaso pa Ponsyo Pilato,+ kuti: 14 Bvera matongero mbupitiriza kukhala wakusowa midonthi, pontho ukhonde kukhala na mathangwi akusandikwa nawo mpaka pakuonekera kwa Mbuyathu Yezu Kristu,+ 15 kwakuti iye wakutsandzaya, Mbuya mʼbodzi basi Wamphambvu anadzapangizika pa ndzidzi wakuthema. Iye ndi Mambo wa ale anatonga ninga amambo, na Mbuya wa ale anatonga ninga ambuya,+ 16 iye basi wakuti nkhabe kufa,+ anakhala mu ceza cakuti nkhabe kufendedzereka,+ wakuti nkhabe munthu adamuona peno anakwanisa kumuona.+ Iye mbalemedzwe, pontho mphambvu zace mbazikhale kwenda na kwenda. Ameni.

17 Pereka pitsogolero kuna* anyakupfuma a mu ndzidzi uno,* toera akhonde kukhala anthu akudzikuza,* pontho akhonde kuikha cidikhiro cawo mu mpfuma yakukhonda kunyindirika,*+ mbwenye anyindire Mulungu, wakuti asatipasa mwakudzala manja pinthu pyonsene pinatitsandzayisa.+ 18 Apange toera acite pinthu pyadidi, akhale anthu akupfuma mʼmabasa adidi, akhale anthu akupasa mwakudzala manja,* akhale dzololo toera kupasambo anango,+ 19 agumanye mpfuma kuna Mulungu, mbakhala na citsidzikizo cadidi kutsogolo,+ angacita pyenepi, iwo anaphatisisa na manja mawiri umaso wandimomwene.+

20 Timoti, tsidzikiza pinthu pidapaswa iwe,*+ leka kubvesera makani akusowa basa anapswipisa pinthu pyakucena na manyerezero apezi akuti mwauthambi anthu asaacemera “cidziwiso.”+ 21 Thangwi yakutowera cidziwiso ceneci, anango asiya cikhulupiro.*

Kukoma ntima kukulu kwa Mulungu mbakukhale na imwe.