TSAMBA YACIWIRI KUNA TIMOTI

1 Ine Paulu, mpostolo wa Kristu Yezu thangwi yakufuna kwa Mulungu mwakubverana na pikiro ya umaso idacitwa kubulukira mwa Kristu Yezu,+ 2 ndiri kulembera iwe Timoti, mwananga wakufunika:+

Mulungu Baba pabodzi na Mbuyathu Kristu Yezu mbapangize kukoma ntima kukulu, ntsisi na ntendere kuna iwe.

3 Ine ndisapereka takhuta kuna Mulungu, ule anaphatira ine basa yakucena ninga pidacita ambuyanga, pontho na cikumbuntima cakucena, ine ndisakukumbuka ndzidzi onsene unacita ine maphembero anga akudembetera, masiku na masikati. 4 Mu ndzidzi unakumbuka ine misozi yako, ndisafuna kakamwe kukuona toera ntima wanga udzale na kukomerwa. 5 Thangwi ine ndisakumbuka cikhulupiro cako cakusowa umpfakafaka,+ cakuti pakutoma capangizwa pakweca na yavu wako wankazi Loidhi na mai wako Eunise, mbwenye ndiri na cinyindiro cakuti iwembo uli naco.

6 Na thangwi ineyi, ine ndisakukumbusa toera usesere ninga moto* muoni wa Mulungu uli muna iwe, udatambira iwe pidakusandzikira ine manja anga.+ 7 Thangwi Mulungu nee atipasa nzimu wakugopa,+ mbwenye atipasa nzimu wamphambvu,+ waufuni na wamanyerezero adidi. 8 Natenepa, leka kukhala na manyadzo pakupereka umboni unalonga pya Mbuyathu+ peno pya ine, wakuti ndiri nkaidi thangwi ya iye; mbwenye nyindira mphambvu ya Mulungu,+ mbutawira kuona nyatwa+ thangwi ya mphangwa zadidi. 9 Iye atipulumusa mbaticemera toera tikhale anthu akucena,+ tayu thangwi ya mabasathu, mbwenye thangwi ya cifuniro cace na kukoma ntima kwace kukulu.+ Iye apangiza kale kakamwe kukoma ntima kukulu kweneku kuna ife kubulukira mwa Kristu Yezu, 10 mbwenye cincino kwapangizwa pakweca thangwi yakuonekera kwa Mpulumusi wathu, Kristu Yezu,+ ule adafudza kufa,+ wakuti kubulukira mu mphangwa zadidi,+ iye atidziwisa mwadidi umaso+ wakukhonda kufudzika.+ 11 Thangwi ya mphangwa zadidi zenezi, ine ndasankhulwa toera ndikhale mʼmwazi mphangwa, mpostolo na mpfundzisi.+

12 Na thangwi ineyi, inembo ndisaona nyatwa zenezi,+ mbwenye nee ndisakhala na manyadzo.+ Thangwi ndisadziwa ule anakhulupira ine, pontho ndiri na cinyindiro cakuti iye anakwanisa kutsidzikiza pinthu pidapereka ine kuna iye toera apitsalakane mpaka pa ntsiku idakhazikiswa.+ 13 Pitiriza kuphatisisa na manja mawiri ntundu wa mafala+ adidi adabva iwe kuna ine, mu ndzidzi unapangiza iwe cikhulupiro na ufuni thangwi yakukhala wakuphatana na Kristu Yezu. 14 Na ciphedzo ca nzimu wakucena uli muna ife, koya mwadidi pinthu pyenepi pyakufunika kakamwe pidatambira iwe.+

15 Iwe usadziwa kuti anthu onsene a mu provinsya ya Azya+ amala kundithawa, kuphatanizambo Fijelo na Ermojene. 16 Mbuya mbabvere ntsisi anthu a panyumba ya Onesiforo,+ thangwi iye andibalangaza kazinji kene, pontho nee akhala na manyadzo thangwi yakumangwa kwanga. 17 Mbwenye pikhali iye ku Roma, andisaka konsene kwene mbandigumana. 18 Mbuya mbamʼphedze toera abverwe ntsisi na Yahova* pa ntsiku idakhazikiswa. Pontho iwe usadziwa mwadidi mabasa onsene adaphata iye ku Efeso.

2 Natenepa, iwe mwananga,+ pitiriza kugumana mphambvu kubulukira mu kukoma ntima kukulu kunagumanika mwa Kristu Yezu; 2 pontho, pinthu pidabva iwe kuna ine, mbapitawirirwa na amboni azinji,+ pinthu pyenepi pipfundzise anthu akukhulupirika, akuti iwombo anadzakhala akuthema toera kupfundzisa anango. 3 Ninga nyankhondo wadidi+ wa Kristu Yezu, tawira kuona nyatwa.+ 4 Munthu anaphata basa ninga nyankhondo nkhabe kucita malonda* ninga pinacita anthu mu umaso wa ntsiku na ntsiku, thangwi iye asafuna kukomeresa ule adansankhula toera akhale nyankhondo. 5 Pyenepi ndi sawasawa na mʼmapika, ale anacita mapika nkhabe kupaswa muoni* angakhonda kutoweza pitsogolero pya mapika.+ 6 Nyakulima anaphata basa mwaphinga ndiye adathema kukhala wakutoma kudya misapo ya pinthu pidabzwala iye. 7 Ndzidzi onsene nyerezera mwadidi pinakupanga ine. Mbuya anakuphedza toera ubvesese* pinthu pyonsene.

8 Kumbuka kuti Yezu Kristu alamuswa muli akufa,+ pontho iye akhali wa dzindza* ya Dhavidhi,+ mwakubverana na mphangwa zadidi zinamwaza ine,+ 9 thangwi ya mphangwa zenezi, ine ndiri kuona nyatwa, pontho ndiri wakumangwa na maunyolo ninga ndine phanga.+ Ngakhale tenepo, mafala a Mulungu nee amangwa.+ 10 Na thangwi ineyi, ine ndisapitiriza kupirira pinthu pyonsene thangwi ya anthu adasankhulwa,+ toera iwombo apulumuswe kubulukira mwa Kristu Yezu, mbatambira mbiri yakukhonda mala. 11 Mafala awa athema kunyindirwa: Mwandimomwene, khala tafa pabodzi na iye, tinadzakhalambo na umaso pabodzi na iye;+ 12 tingapitiriza kupirira, ifembo tinadzatonga pabodzi na iye ninga amambo;+ tinganʼkhonda, iye anadzatikhondambo;+ 13 tingakhonda kukhala akukhulupirika, iye anapitiriza kukhala wakukhulupirika, thangwi iye anacimwana kukhondeka ekhene.

14 Pitiriza kuakumbusa pinthu pyenepi, mbuapfundzisa* pamaso pa Mulungu toera akhonde kuketesana thangwi ya mafala, pinthu pyakuti nkhabe phedza nee pangʼono pene, thangwi pisapeusa* ale anapibvesera. 15 Cita pyonsene pinakwanisa iwe toera ukhale wakutawirika kuna Mulungu, ninga nyabasa wakusowa cinthu cakupasika naco manyadzo, wakuti asaphatisira mwadidi mafala a undimomwene.+ 16 Mbwenye khonda makani akusowa basa akuti asapswipisa pinthu pyakucena,+ thangwi anadzatsogolera munthu toera apitirize kucita pinthu pyakuipa kakamwe, 17 pontho mafala awo anadzamwazika ninga kunyeka kwa cironda ca diro. Imineu na Fileto ali pakati pa anthu anewa.+ 18 Anthu anewa asiya undimomwene, mbalonga kuti kulamuswa kwa anyakufa kwamala kucitika kale,+ pontho asafudza cikhulupiro ca anango. 19 Mwakukhonda tsalakana pyenepi, Mulungu aikha miyala yakuwanga panafuna kumangwa nyumba, yakuti isapitiriza kukhala yakuwanga, iyo iri na cidzindikiro ici: “Yahova* asadziwa anthu ace,”+ pontho “Onsene analonga dzina ya Yahova*+ asafunika kusiya pinthu pyonsene pyakuipa.”*

20 Nʼnyumba ikulu nkhabe kugumanika pyombo pya ouro na pya parata basi, mbwenye musagumanikambo pyombo pya matabwa na pya dongo. Pinango pisaphatisirwa toera kucita pinthu pyakupasa cilemedzo, mbwenye pinango toera kucita pinthu pyakukhonda kupasa cilemedzo. 21 Natenepa, munthu angakhala kutali na pyombo pinaphatisirwa toera kucita pinthu pyakukhonda kupasa cilemedzo, anadzakhala combo cinaphatisirwa toera kucita pinthu pyakupasa cilemedzo, cidaceneswa, cakufunika kuna mwanaciro, cidasasanywa toera kuphatisirwa mʼmabasa adidi onsene. 22 Natenepa, thawa pifuno pya mu ndzidzi wa uphale,* mbwenye pitiriza kusaka ulungami, cikhulupiro, ufuni na ntendere. Cita pyenepi pabodzi pene na ale anacemera Mbuya na ntima wakucena.

23 Kusiyapo pyenepi, calira makani aupswiru na akusowa basa,+ thangwi iwe usadziwa kuti pyenepi pisasosa kuketesana. 24 Ntumiki wa Mbuya nee asafunika kuketesana na anthu, mbwenye asafunika kukhala wakukoma ntima* kuna anthu onsene,+ wakuthema kupfundzisa, asafunika kukhala wakukhurudzika angacitirwa cinthu cakuipa,+ 25 apfundzise mwakukhurudzika ale anakhonda kutawira pinapfundzisa iye.+ Panango Mulungu anaatawirisa kuti atcunyuke* toera akwanise kudziwa mwadidi undimomwene,+ 26 munjira ineyi, iwo anakwanisa kudzindikira, mbasudzuka pa nsampha wa Dyabo, thangwi iwo aphatwa* na Dyabo toera acite pinafuna iye.+

3 Mbwenye dziwa kuti mu ntsiku zakumalisa,+ inadzaoneka midzidzi yakugopswa na yakunentsa kupirira. 2 Thangwi anthu anadzafunika okhene basi,* anadzafuna kakamwe kobiri, anadzakhala anthu akugaya, akudzikuza, akuxola, akukhonda kubvera anyakubala, akukhonda kupereka takhuta, akukhonda kukhulupirika, 3 akusowa ufuni, akukhonda funa kucita cibverano na anango, anadzakhala anyamapsweda, akukhonda kuphata ntima,* ausumankha, akukhonda kufuna pinthu pyadidi, 4 anyakusandukira andzawo, akukhonda kubva pinalonga andzawo, akudzala na kudzikuza, anadzafuna pinakomerwa na iwo basi, mbakhonda kufuna Mulungu, 5 anadzaoneka ninga anthu adaperekeka kuna Mulungu,* mbwenye umaso wawo nee unadzapangiza pyenepi.+ Iwe khala kutali na anthu anewa. 6 Pakati pawo asaoneka amuna anaenda mʼmanyumba toera kunyengeza anthu mwakucenjera, mbapeusa akazi akufewa adalemerwa na madawo, akuti asatsogolerwa na pifuno pyakusiyana-siyana, 7 akazi anewa asapfundza ndzidzi onsene, mbwenye cipo asafika pakudziwa mwadidi undimomwene.

8 Ninga Jane na Jambre apingiza Mose, iwombo asapitiriza kupingiza undimomwene. Anthu anewa ali na manyerezero akuphonyeka kakamwe, akukhonda thema kukhala anthu a cikhulupiro. 9 Ngakhale tenepo, iwo nee anafika kutali, thangwi upswiru* wawo unadzapangizika pakweca kuna anthu onsene, ninga pidacitika kuna amuna awiri ale.+ 10 Mbwenye iwe watoweza mwadidi pipfundziso pyanga, makhaliro a umaso wanga,+ pifuniro pyanga, cikhulupiro canga, kukhurudzika kwanga, ufuni wanga, kupirira kwanga, 11 kutcingwa kwanga na nyatwa ninga zidaona ine ku Antiyokiya,+ ku Ikoniyo+ na ku Listra.+ Ine ndapirira kutcingwa kweneku, pontho Mbuya andiombola mʼmitcingo ineyi yonsene.+ 12 Mwandimomwene, onsene anafuna kukhala na umaso wakuperekeka kuna Mulungu mwakuphatana na Kristu Yezu, anadzatcingwambo.+ 13 Mbwenye anthu akuipa na akunyengeza anadzathimiza kucita pinthu pyakuipa kakamwe, iwo anadzanyengeza, mbanyengezwambo+ na anango.

14 Mbwenye iwe, pitiriza mu pinthu pidapfundziswa iwe, pyakuti wakhala na cinyindiro toera kupikhulupira,+ thangwi iwe usadziwa kuti mbani adakupfundzisa pinthu pyenepi, 15 pontho kubulukira mu uwana wako,+ iwe usadziwa malemba akucena,+ akuti anakwanisa kukuphedza toera ukhale munthu waudziwisi, toera upulumuke thangwi yakukhulupira Kristu Yezu.+ 16 Malemba onsene alembwa mukutsogolerwa na Mulungu,+ pontho asaphedza toera kupfundzisa,+ kusandika, kusasanyira* pinthu, kulanga mwakulungama,+ 17 toera ntumiki wa Mulungu* akhale wakuthema kakamwe, wakukhunganyika mwadidi toera kuphata mabasa adidi onsene.

4 Ine ndisakupanga pamaso pa Mulungu na Kristu Yezu, ule anafuna kudzatonga+ anthu ali mʼmaso na akufa,+ angadzaonekera pakweca,+ mu ndzidzi unafuna kutonga iye mu Umambo wace:+ 2 Mwaza mafala;+ cita pyenepi mwakucimbiza, mʼmidzidzi yadidi na mʼmidzidzi yakunentsa; alange,+ asandike, acenjeze, cita pinthu pyenepi pyonsene mwakukhurudzika kakamwe mbuphatisira luso yakupfundzisa.+ 3 Thangwi unadzafika ndzidzi wakuti iwo anadzakhonda cipfundziso cadidi,+ mbwenye mwakubverana na pifuno pyawo, iwo anadzasaka apfundzisi anafuna kudzalonga pinthu pinakomerwa na iwo basi.*+ 4 Iwo anadzasiya kubvesera undimomwene, toera kubvesera pithankano pyapezi. 5 Mbwenye iwe, koya manyerezero ako adidi mu pinthu pyonsene, pirira nyatwa,+ phata basa ya mʼmwazi mphangwa,* phata mwadidi basa yako yakutumikira Mulungu.*+

6 Thangwi ine ndiri kuperekwa ninga ntsembe ya pyakumwa,+ pontho ndzidzi wa kuombolwa+ kwanga uli cifupi. 7 Ine ndamenya nkhondo yadidi,+ ndamalisa mapika akuthamanga,+ ndakoya cikhulupiro. 8 Kutomera cincino, ndiri kukoyerwa nthimba yaulungami,+ yakuti Mbuya, ntongi wakulungama+ anadzandipasa ninga muoni pa ntsiku ineyi,+ tayu ine basi, mbwenye alembo onsene anadikhira na cifuno cikulu ndzidzi wakuonekera kwace.

9 Cita pyonsene pinakwanisa iwe toera ubwere kudzandiona mwakucimbiza. 10 Dhema+ andisiya ndekhene, thangwi iye akhafuna pinthu pya dziko,* iye aenda ku Tesalonika, Keresenti aenda ku Galasya, Tito aenda ku Dhalimasya. 11 Ali na ine kuno ndi Luka basi. Bwera pabodzi na Marko, thangwi iye anandiphedza mu utumiki wanga. 12 Ine ndatuma Tikiko+ toera aende ku Efeso. 13 Ungafuna kubwera kuno, kwata kapoti wanga adasiya ine ku Troadhe panyumba ya Karpo, pontho bweresa mabukhu,* makamaka ale a nthembe.

14 Alexandre, wakuti ndi nyakufula pinthu pya nkuwa, andicitira pinthu pyakuipa kakamwe. Yahova* anadzamʼbwezera mwakubverana na pidacita iye.+ 15 Iwembo usafunika kucita mphole-mphole na iye, thangwi iye apingiza kakamwe mphangwa zathu.

16 Pikhalonga ine pakutoma toera kutsidzikizika pamaso pa utongi, nkhabe munthu adandiphedza, mbwenye onsene andisiya ndekhene. Mulungu mbaleke kuabwezera pidacita iwo. 17 Mbwenye Mbuya andiphedza mbandiwangisa toera kubulukira mwa ine, basa yakumwaza mphangwa iphatwe mwakukwana, toera madzindza onsene akwanise kuzibva;+ pontho ine ndaombolwa nkanwa mwa nkhalamu.+ 18 Mbuya anadzandiombola mu pinthu pyonsene pyakuipa, pontho anadzandipulumusa mbandiendesa mu Umambo wace wakudzulu.+ Iye mbapaswe mbiri kwenda na kwenda. Ameni.

19 Pereka mwanyikiro wanga kuna Priska na Akila+ pabodzi na anthu a panyumba ya Onesiforo.+

20 Erasto+ asala ku Korinto, mbwenye Trofimo+ ndansiya ku Mileto thangwi iye akhaduwala. 21 Cita pyonsene pinakwanisa iwe toera ufike kuno mbudzati kutoma ndzidzi wa khoni.*

Eubhulo akutumiza mwanyikiro kuna iwe, pontho Pudheni, Linu, Klaudhya na abale onsene akutumizambo mwanyikiro kuna iwe.

22 Mbuya mbakupase nkhombo thangwi ya makhaliro adidi anapangiza iwe. Kukoma ntima kwace kukulu mbakukhale na imwe.