TSAMBA YACIWIRI YA PEDHRU

1 Ine Simau Pedhru, bitcu na mpostolo wa Yezu Kristu, ndiri kulembera ale akuti ali na cikhulupiro cadidi kakamwe ninga cathu, kubulukira mu ulungami wa Mulungu wathu na Mpulumusi wathu, Yezu Kristu:

2 Ndisacita phembero toera kukoma ntima kukulu na ntendere pithimizirike kuna imwe kubulukira mu cidziwiso candimomwene+ ca Mulungu na ca Yezu Mbuyathu, 3 thangwi Mulungu, kubulukira mu mphambvu yace, atipasa* pinthu pyonsene pinafuna ife toera tikhale na umaso wakuperekeka kuna iye, kubulukira mu cidziwiso candimomwene ca Ule adaticemera+ na mbiri yace pabodzi na udidi wace. 4 Kubulukira mu pinthu pyenepi, iye atipasa* mapikiro makulu+ na akufunika kakamwe, toera kubulukira mwa iwo, imwe mukhale na makhaliro ninga a Mulungu,+ thangwi imwe mwapulumuka mʼmakhaliro akuipa a dziko anabwereswa na pifuno pyakuipa.*

5 Na thangwi ineyi, citani pyonsene pinakwanisa imwe+ toera pa cikhulupiro canu muthimizire makhaliro adidi,+ pa makhaliro anu adidi muthimizire cidziwiso,+ 6 pa cidziwiso canu muthimizire kudzitonga,+ pa kudzitonga kwanu muthimizire kupirira, pa kupirira kwanu muthimizire kuperekeka kuna Mulungu,+ 7 pa kuperekeka kwanu kuna Mulungu muthimizire kufuna abale, pa kufuna kwanu abale, muthimizire kufuna anthu onsene.+ 8 Thangwi pinthu pyenepi pingakhala muna imwe, mbapidzala mpaka kutayikira, pinakuphedzani toera mukhonde kusiya kutumikira peno kukhonda kubala misapo+ mu pinthu pinacita imwe mwakubverana na cidziwiso candimomwene ca Mbuyathu Yezu Kristu.

9 Thangwi munthu adasowa pinthu pyenepi ndi boliboli, iye asakhonda kuona ceza,*+ pontho aduwala kuceneswa kwa madawo ace+ akale. 10 Natenepa abale, citani pyonsene pinakwanisa imwe toera mupitirize kukhala akukhulupirika ninga anthu adacemerwa+ na adasankhulwa, thangwi mungapitiriza kucita pyenepi, imwe nee munadzagwa.+ 11 Mwandimomwene, mungacita pyenepi, imwe munadzapaswa nkhombo yakufungulirwa nsuwo wakupita mu Umambo wakukhonda mala+ wa Mbuyathu na Mpulumusi wathu Yezu Kristu.+

12 Na thangwi ineyi, ndzidzi onsene ndisafuna kukukumbusani pinthu pyenepi, maseze imwe musapidziwa kale, pontho mwakhazikika mwadidi mu undimomwene uli muna imwe. 13 Mbwenye mu ndzidzi unapitiriza ine mʼmanungo awa akuti ndi ninga khumbi,*+ ndisaona kuti mphyadidi ndikukumbuseni+ pontho pinthu pyenepi, 14 thangwi ine ndisadziwa kuti mwakukhonda dembuka, ndinadzasiya khumbi iyi, ninga mudandipangiza Mbuyathu Yezu Kristu.+ 15 Ndzidzi onsene ndinacita pyonsene pinakwanisa ine, toera ndingaenda, imwe mukwanise kukumbuka* mwekhene pinthu pyenepi.

16 Pidakudziwisani ife pya mphambvu na kuonekera kwa Mbuyathu Yezu Kristu, ife nee tapicita mwakubverana na pithankano pyapezi pinabuluka mʼmanyerezero a anthu, mbwenye tapicita thangwi yakukhala kwathu amboni adaona na maso mbiri yace.+ 17 Thangwi Mulungu Baba, ampasa cilemedzo na mbiri pa ndzidzi udapangwa iye mafala awa na mbiri ikulu: “Uyu ndi Mwananga wakufunika, anakomerwa na ine.”+ 18 Inde, ife tabva mafala anewa adabuluka kudzulu mu ndzidzi ukhali ife pabodzi na iye paphiri yakucena.

19 Natenepa, mafala a profesiya ndi akunyindirika kakamwe kwa ife, pontho imwe musacita mwadidi kuabvesera, ninga nyale+ inagaka pa mbuto ya cidima (mpaka kuca kunja, mbibuluka nyenyezi*+ yakumacibese) mʼmitima yanu. 20 Kusiyapo pyenepi, dziwani kuti nee profesiya ibodzi ya mʼMalemba isabuluka mʼmanyerezero a anthu. 21 Thangwi profesiya cipo yalongwa mwakubverana na pinafuna munthu,+ mbwenye anthu alonga mphangwa za Mulungu mukutsogolerwa* na nzimu wakucena.+

2 Ngakhale tenepo, aonekambo aprofeta authambi pakati pa mbumba. Munjira ibodzi ene, anadzaonekambo apfundzisi authambi pakati panu.+ Iwo anadzatomesa mwacibisobiso misoka yakuti inadzafudza cikhulupiro canu, pontho iwo anadzakhonda mbuyawo adaagula,+ mbabweresa okhene kufudzwa kwawo mwakucimbiza. 2 Kusiyapo pyenepi, anthu azinji anadzatowezera makhaliro akupasa manyadzo*+ a apfundzisi anewa, pontho thangwi ya iwo, anthu anadzalonga mwakuipa+ pya njira ya undimomwene. 3 Pontho, thangwi yakufuna kwawo pizinji, iwo anadzaphatisira mafala akunyengeza toera kukudyerani nkopekope. Mbwenye kutongwa kwawo kudakhazikiswa kale kakamwe+ nee kunadembuka, mwakukhonda penula, ndzidzi wakufudzwa kwawo unadzafika.+

4 Mwandimomwene, Mulungu nee asiya kutcunyusa aanju adadawa,+ mbwenye aaponya mu Tartaro,*+ mbaamangira ncidima* cikulu kakamwe, mbaakoya toera atongwe.+ 5 Iye nee asiya kutcunyusa dziko yakale,+ mbwenye pidabweresa iye madzi makulu* pa dziko ya anthu akuipa,+ iye apulumusa Nowa wakuti akhamwaza mphangwa za ulungami,+ pabodzi na anthu anango anomwe.+ 6 Pontho iye atcunyusambo+ mizinda ya Sodhoma na Gomora, mbaidzesa dotha, natenepa iye apangiza kuna anthu akuipa pinthu pinafuna kudzacitika ntsogolo.+ 7 Mbwenye iye apulumusa Loti,+ munthu wakulungama, wakuti akhatsukwala thangwi ya makhaliro akupasa manyadzo* a anthu akuipa, 8 thangwi ntsiku zonsene munthu unoyu wakulungama akhanentseka muntima mwace thangwi ya pinthu pyakuipa pikhaona iye na pikhabva iye mu ndzidzi ukhakhala iye pakati pawo. 9 Natenepa, Yahova* asadziwa kuti anapulumusa tani mu nyatwa ale akuti ndi akukhulupirika kwa iye,+ mbwenye iye asadziwambo kuti anakoya tani anthu akuipa toera afudzwe* pa ntsiku yakutongwa,+ 10 makamaka ale anasaka kupswipisa manungo a anango,+ na ale anapwaza anthu anatonga* pakati pawo.+

Iwo nkhabe gopa, asacita pinafuna iwo basi, pontho iwo nkhabe gopa kulonga mwakusowa cilemedzo kuna anthu analemedzwa na Mulungu, 11 mbwenye aanju, maseze ndi akuwanga kakamwe na amphambvu, iwo nkhabe kuasumira na mafala akutikana, thangwi yakulemedza kwawo Yahova.*+ 12 Mbwenye anthu anewa, mwakulandana na pinyama pyakusowa ndzeru pinacita pinthu mwakukhonda nyerezera, pyakuti pisabalwa toera piphatwe mbapiphiwa, asalonga mwakuipa pinthu pyakuti iwo nkhabe kupidziwa.+ Iwo anadzafudzwa thangwi ya macitiro awo akuipa, 13 iwo anadzatcunyuswa thangwi ya pinthu pyakuipa pidacita iwo.

Pontho asaona kuti mphyakutsandzayisa kucita pinthu pyaunyama pinasirira iwo,+ ngakhale namasikati. Iwo ndi midonthi na pinthu pyakupswipisa pakati panu, pontho asakomerwa na pipfundziso pyawo pyauthambi mu ndzidzi unadya iwo pabodzi na imwe mʼmaphwando anu.+ 14 Maso awo adzala na upombo,+ iwo nkhabe kwanisa kusiya kucita madawo, pontho iwo asanyengerera ale akuti ndi akufewa. Iwo apfundzisa mitima yawo kufuna pyonsene. Iwo ndi ana adapaswa dzedze. 15 Iwo asiya njira yakulungama, mbatayika. Iwo atoweza njira ya Bhalamu,+ mwana wa Bheori, adacita pinthu pyakuipa thangwi akhafuna kakamwe kupaswa muoni,+ 16 mbwenye asandikwa thangwi yakuswa kwace mwambo.+ Buru, cinyama cakuti nkhabe kulonga, calonga ninga munthu, mbacipingiza macitiro akusowa ndzeru a mprofeta unoyu.+

17 Anthu anewa ndi ninga micera yakusowa madzi, iwo ndi ninga makole anakwekwetwa na mphepo yamphambvu, pontho iwo akoyerwa cidima cikulu kakamwe.+ 18 Mafala analonga iwo asabveka ninga ndi akufunika, mbwenye ndi akusowa basa. Iwo asaphatisira pifuno pyaunyama+ na makhaliro akupasa manyadzo,* mbanyengerera ale adakwanisa kubuluka mʼmanja mwa anthu anacita pinthu pyakuipa.+ 19 Maseze iwo asapikira kuapasa ufulu, iwo ene ndi mabitcu a pinthu pyakuipa;+ thangwi munthu anakundwa na unango, asakhala bitcu wa munthu adankunda.*+ 20 Mwandimomwene, khala pakumala kubuluka mu pinthu pyakupswipisa pya dziko+ thangwi yakukhala na cidziwiso candimomwene ca Mbuya na Mpulumusi wathu Yezu Kristu, iwo abwerera pontho mu pinthu pyenepi, mbakundwa; makhaliro awo akumalisa asakhala akuipa kakamwe kupiringana akutoma.+ 21 Mbapidakhala pyadidi kakamwe kwa iwo mbadakhonda kudziwa mwadidi njira yaulungami, kupiringana kuidziwa, buluka penepo, mbapeuka mʼmatongero akucena adatambira iwo.+ 22 Pidacitika kuna iwo ndi sawasawa na pinalonga nsangani uyu wandimomwene: “Mwanambwa abwerera mbadya matapiko ace, nkhumba idamala kusambiswa, yabulumunda pontho mʼmatope.”+

3 Abale akufunika, iyi ndi tsamba yaciwiri inakulemberani ine, yakuti ninga yakutoma, ine ndisakukumbusani+ toera kuwangisa luso yanu yakunyerezera mwadidi, 2 toera mukumbuke mafala adalongwa kale* na aprofeta akukhulupirika,* na matongero a Mbuya na Mpulumusi wathu adaperekwa na apostolo anu. 3 Pakutoma dziwani kuti mu ntsiku zakumalisa anadzaoneka anyakusingirira, akuti anadzalonga mafala akusingirira. Iwo anadzacita pinthu mwakubverana na pifuno pyawo,+ 4 mbalonga: “Kodi iye nee apikira kuti mbadabwera, mphapo ali kupi?*+ Onani, kubulukira mu ndzidzi udafa ambuyathu, pyonsene piri sawasawa ninga mukhali ipyo kubulukira mu ndzidzi udacitwa pinthu.”+

5 Mbwenye mwakufuna, iwo asapwaza undimomwene wakuti kutomera kale kakamwe kudzulu kukhalipo, pontho ikhalipombo dziko yapantsi idakhazikika mwakuwanga kunja kwa madzi na pakati pa madzi kubulukira mu fala ya Mulungu;+ 6 kubulukira mu pinthu pyenepi, dziko ya mu ndzidzi unoyu yafudzwa pidadzala iyo na madzi.+ 7 Mbwenye kubulukira mu fala ibodzi ene, kudzulu na dziko yapantsi inaona ife lero pisakoyiwa toera kufudzwa na moto, pontho pisakoyiwa mpaka pa ntsiku yakutongwa na yakufudzwa kwa anthu akuipa.+

8 Mbwenye imwe abale anga, lekani kuduwala kuti ntsiku ibodzi kuna Yahova* ndi ninga pyaka 1.000, pontho pyaka 1.000 ndi ninga ntsiku ibodzi.+ 9 Yahova* nee akudembuka toera kucita pidapikira iye,+ ninga munanyerezera anthu anango kuti iye akudembuka; mbwenye iye asapangiza kupirira kuna imwe, thangwi iye nkhabe funa kuti munthu afudzwe, mbwenye asafuna kuti anthu onsene atcunyuke.+ 10 Mbwenye ntsiku ya Yahova*+ inadzafika ninga mbava,+ pa ntsiku ineyi kudzulu kunadzapita+ na kudhima kukulu kakamwe, mbwenye thangwi yakupisa kakamwe kwa pinthu pyakudzulu na pya pa dziko yapantsi, ipyo pinadzanyunguluka, pontho dziko yapantsi na mabasa anacitwa mwenemo, pinadzaoneka pakweca.+

11 Nakuti pinthu pyenepi pyonsene pinadzafudzwa munjira ineyi, nyerezerani kuti musafunika kukhala anthu a ntundu wanji. Musafunika kukhala anthu a makhaliro akucena, mbamucita pinthu pinapangiza kuti ndimwe anthu adaperekeka kuna Mulungu, 12 mu ndzidzi unadikhira imwe mbamukumbuka* kubwera* kwa ntsiku ya Yahova.*+ Pa ntsiku ineyi, kudzulu kunadzafudzwa+ na malirimi a moto, pontho pinthu pya kudzulu na pya pa dziko yapantsi pinadzanyunguluka thangwi ya kupisa kakamwe! 13 Mbwenye ife tisadikhira kudzulu kupswa na dziko yapantsi ipswa mwakubverana na pikiro yace,+ mwenemu munadzaoneka ulungami.+

14 Natenepa abale anga akufunika, nakuti musadikhira pinthu pyenepi, citani pyonsene pinakwanisa imwe toera pakumalisa mugumanwe kuti ndimwe anthu akusowa midonthi, akusowa mulando, pontho kuti muli muntendere.+ 15 Kusiyapo pyenepi, onani kupirira kwa Mbuyathu ninga cipulumuso, ninga mudakulemberanimbo Paulu mʼbale wathu wakufunika, mwakubverana na cidziwiso cidapaswa iye.+ 16 Iye asalonga pinthu pyenepi mʼmatsamba ace onsene. Mbwenye pinthu pinango mʼmatsamba anewa pisanentsa kupibvesesa, pontho ale anakhonda kupibvesesa* na anyakusowa cikhulupiro, asapidodomesa ninga munacitira iwo na makhundu anango a Malemba, pyenepi pinadzabweresa kufudzwa kwawo.

17 Natenepa abale anga akufunika, nakuti imwe musadziwa pinthu pyenepi mwanyapantsi, citani mphole-mphole toera mukhonde kupeuswa na madodo a anyakudawa, pontho mukhonde kuluza kuwanga kwanu mu cikhulupiro.+ 18 Mbwenye pitirizani kutambira kukoma ntima kukulu, mbamukhala na cidziwiso ca Mbuya na Mpulumusi wathu Yezu Kristu. Iye mbapaswe mbiri cincino mpaka kwenda na kwenda. Ameni.