Munadziwa Tani Undimomwene?
“Kudzulu na dziko yapantsi pyacitika pyokha.”—Adalonga pyenepi ndi siyentista Stephen Hawking na Leonard Mlodinow, mu caka ca 2010.
“Mulungu acita kudzulu na dziko yapantsi.”—Bhibhlya isalonga pyenepi pa Genesi 1:1.
Kodi kudzulu, dziko yapantsi na pinthu pyonsene piri na umaso, pyacitwa na Mulungu peno pyacitika pyokha? Mafala adalongwa na asiyentista awiri na mafala anagumanika m’Bhibhlya pa Genesi 1:1, asapangiza kuti mbvundzo unoyu uli na mitawiro miwiri yakusiyana kakamwe. Mbwenye makhundu mawiri ene anthu asaphedzera. Ngakhale tenepo, azinji nkhabe dziwa kuti anakhulupira pipi, thangwi mabukhu na maprogramu a televizau asalonga kakamwe thangwi ya pyenepi.
Panango kuxikola apfundzisi anu akupangani na cinyindiro consene kuti nkhabepo Nciti, pontho kuti pinthu pyonsene piri kudzulu na pa dziko yapantsi pyacitika pyokha. Mphapo apfundzisi anu akupangizani umboni unalonga kuti nkhabepo Nciti? Panango mwabva kale atsogoleri amauphemberi mbakalonga kuti alipo Nciti. Kodi iwo akupangizani umboni wa pinthu pinalonga iwo? Peno basi ene asakupangani toera mukhulupire thangwi ndi pyenepi pinapfundzisa iwo?
Panango mwacitika kale mbvundzo unoyu, pontho mwaona kuti nkhabepo munthu ali na cinyindiro cakuti alipo Nciti. Kusiyapo pyenepi, panango munabvundzika: Kodi kudziwa ntawiro wa mbvundzo unoyu ndi kwakufunikadi?
Revista ino ya Lamukani! inalonga pinthu pingasi pinacitisa anthu azinji kukhulupira kuti alipo Nciti. Inalongambo kuti thangwi yanji kudziwa ntawiro wa mbvundzo wakuti umaso watoma tani pa dziko yapantsi ndi kwakufunika kakamwe.