Abrahamu—xamwali Wa Mulungu

KHUNDU ibodzi idaenda kakhala anthu pakumala kwa Cigumula ikhacemerwa Uri. Khundu ineyi yadzakhala nzinda wakufunika na nyumba zinango zadidi mwenemo. Mbwenye anthu mwenemo akhalambira milungu yauthambi. Pyenepi ndipyo pikhacitambo iwo m’Babeli. Anthu a Uri na Babeli nee akhali ninga Nowa na mwanace Semu tayu, ale adapitiriza na kutumikira Yahova.

Pakumalisira, mudapita piaka 350 pakumala cigumula, Nowa, munthu wakukhulupirika, afa. Piaka piwiri basi kubulukira penepo abalwa munthu anaonemwe pa cithunzithunzi cino. Iye akhali munthu wakupambulika kakamwe kwa Mulungu. Dzinace ikhali Abrahamu. Iye akakhala na banjace m’nzinda wa Uri.

Ntsiku inango Yahova apanga Abrahamu: ‘Siya Uri na acibale ako, uende ku dziko inafuna kukuonesa ine.’ Kodi Abrahamu abvera Mulungu mbasiya nduli udidi onsene wa Uri? Inde, abvera. Thangwi ya kubvera Mulungu m’nzidzi onsene, Abrahamu adziwika ninga xamwali wa Mulungu.

Acibale anango a Abrahamu aenda pabodzi naye mudabuluka iye ku Uri. Babace Tera aenda naye. Nzukulu wace Loti aendambo. Na mwandimomwene, Sara, nkazi wa Abrahamu, aendambo. M’kupita kwa nzidzi iwo onsene afika ku mbuto inacemerwa Harani, idafa Tera. Iwo akhali kutali kakamwe na Uri.

M’nzidzi wakucepa Abrahamu na banjace asiya Harani mbaenda ku dziko inacemerwa Kanani. Kweneko Yahova alonga: ‘Ino ndi dziko inafuna dzapasene ana ako.’ Abrahamu akhala m’misasa m’Kanani.

Mulungu atoma kuphedza Abrahamu natenepa adzakhala na mikumbi ikulu ya mabira na pinyama pinango na madzana a anzakazi. Mbwenye iye na Sara nee akhali na ana awo ene tayu.

Mukakhala Abrahamu na piaka 99 pyakubalwa, Yahova alonga: ‘Ndisapikira kuti unadzakhala baba wa madziko mazinji a anthu.’ Mbwenye mbipidakwanisika tani pyenepi kucitika, nakuti Abrahamu na Sara akhali akugwesera kakamwe towera akhale na mwana?