Nsasa Wakulambira

KODI musadziwa kuti nyumba iyi ndi ninji? Ndi nsasa wakupambulika wakulambira Yahova. Usacemerwambo tabernakulu. Mbumba yamalisa kuumanga pakupita caka cibodzi mbidamala kubuluka ku Ijitu. Kodi musadziwa kuti ikhali nyerezero ya ani kuti umangiwe?

Ikhali nyerezero ya Yahova. Mozese mbakhali pa Phiri ya Sinai, Yahova ampanga mamangiro ace. Iye ampanga kuti umangiwe mwakuti ungakwanise kusudzulwa mwakukhonda nensa. M’njira ineyi maphidzo ace mbadakwanisa kuthukulwa kuenda nawo ku mbuto inango, kweneko mbaphatanizwa pontho. Natenepa mukhafuluka Aisrayeli mbuto na mbuto m’thando, iwo akhathukula nsasa.

Mukayang’ana nkati mwa kwartu ing’ono kunkhomo kwa nsasa, mungakwanise kuona bokosi, peno kaixa. Ineyi isacemerwa bokosi ya cibverano. Ikhali na maanju awiri peno akerubi akucitwa na ndalama, m’nkhomo ibodzi na ibodzi. Mulungu alemba papswa Matongero Khumi m’miyala miwiri yakuphaphatika, thangwi Mozese akhadaswa yakutoma ire. Miyala ineyi yakoiwa nkati mwa bokosi ya cibverano. Pina, mulinga wa mana wakoiwambo mwenemo. Kodi musakumbuka kuti mana ndi ninji?

Mbale wa Mozese, Aroni, ndiye adasankhulwa na Yahova kuti akhale nyantsembe wankulu. Iye atsogolera mbumba m’kulambira Yahova. Anace akhalambo anyantsembe.

Cincino yang’anani kwartu ikulu ya nsasa. Iyi ndi ikulu mwakuphindikiza kwartu ing’ono. Kodi musaona bokosi, peno kaixa ing’ono, inabuluka utci mbukwira? Ndi guwa ya ntsembe panapisa anyantsembe pyakununkhira mwadidi pinacemerwa lubani. Pina mwenemo muli cakuikhira nyale ciri na nyale zinomwe. Cinthu cacitatu ciri m’kwartu ndi meza. Padzulu payo pali mikate 12.

Kunja kwa tabernakulu kukhali na ndiro, peno phande ikulu, ikhadzadzwa madzi. Anyantsembe akhaiphatisira towera kupitsuka iwo ene. Kweneku kukhalimbo guwa ya ntsembe ikulu. Penepo pakhapiswa pinyama pyakuphiwa ninga ntsembe kwa Yahova. Nsasa wakulambira ukhalidi pakati pa misasa, na Aisrayeli akakhala m’misasa yawo mbauzungulira.