Mambo Wakumalisa Wadidi Wa Israyeli

YOSIYA akhali na piaka pisere basi pyakubalwa mudakhala iye mambo wa madzinza mawiri a kubangwe a Israyeli. Iyi ndi thunga ing’ono kakamwe kuti munthu akhale mambo. Natenepa, pakutoma anthu angasi akulu amphedza kutonga dziko.

Mudapita piaka pinomwe Yosiya mbakhali mambo, iye atoma kusaka Yahova. Iye atowerera citsanzo ca amambo adidi ninga Davidi, Yehosafati na Hezekia. Buluka penepo, iye mbaciri mphale ene, Yosiya acita cinthu cacipapo.

M’nzidzi wakulapha, Aisrayeli azinji akhali akuipa kakamwe. Iwo akhalambira milungu yauthambi. Akhagodamira adzimunthu. Natenepa Yosiya abuluka na amunace mbatoma kubulusa ulambiri wauthambi m’dziko. Iyi ikhali basa ikulu thangwi anthu azinji kakamwe akhalambira milungu yauthambi. Mungakwanise kuona Yosiya na amunace pano mbaswa adzimunthu.

Buluka penepo, Yosiya aikha amuna atatu kuti ayang’anire kusasanywa papswa kwa templo ya Yahova. Yagumanyizwa kobiri kubuluka kwa mbumba mbiperekwa kwa amuna anewa towera kulipa basa ikhafuna kucitwa. Mukaphata iwo basa m’templo, nyantsembe wankulu Hilikiya agumana mwenemo cinthu cakufunika kakamwe. Ikhali bukhu ene ya mwambo idatuma Yahova Mozese kuti ailembe kalene kakamwe. Iyo ikhadatayika m’piaka pizinji.

Bukhu ineyi yakwatwa mbiendeswa kwa Yosiya, na iye aphemba kuti alerirwi. Mukabvesera iye, Yosiya akwanisa kuona kuti mbumba nee ikhakoya miyambo ya Yahova tayu. Iye atsukwala kakamwe thangwi ya pyenepi, natenepa apandula pyakubvala pyace, ninga mungakwanise kuona pano. Iye alonga: ‘Yahova aipirwa na ife, thangwi ababa athu adapitiriza tayu na kukoya miyambo idalembwa m’bukhu iyi.’

Yosiya atuma nyantsembe wankulu Hilikiya kuti akadziwe pikhafuna kucita Yahova kwa iwo. Hilikiya aenda kwa nkazi Hulida, unoyu akhali mprofeta wankazi, mbambvunza. Hulida ampasa mphangwa izi zakubulukira kwa Yahova kuti abwerere nazo kwa Yosiya: ‘Yerusalemu na mbumba yonsene anadzalangwa thangwi alambira milungu yauthambi na dziko yadzadzwa na uipi. Mbwenye thangwi yakuti iwe, Yosiya, wacita pinthu pyadidi, kulanga uku nee kunadzabwera mpaka iwe kufa.’