Kodi Dziko Ino Iri Kuenda Kupi?
Nyatwa zikulu na pyakucitika pyakudzidzida ndi mphangwa za ntsiku na ntsiku m’dziko yonsene yapantsi! Kodi pyenepi pisafuna kulonganji?
CITSIDZIKIZO CA MUNTHU: Mabomba asaswiwa m’misika. Apfunzisi na anyakupfunza asaphiwa na mfuti m’xikola. Ana asabiwa mwakucimbiza anyakubala mbali akudzudzumika. Akazi na amuna akugwesera asacitwa makunje dzuwa mbiri bvuu.
MAKHALIRO M’UPHEMBERI: Magereja asaphedza misoka m’nkhondo. Atsogoleri auphemberi asapambizirwa kupha dzinza ya anthu. Apadiri asagumaniza piwalo pyakubala na ana ang’ono; gereja isabisa pyenepi. Anthu akubuluka m’gereja; magereja akuguliswa.
MAKHALIRO AKUDAMBO: Misitu isafudzwa thangwi ya mabasa a malonda. Misitu isamaliswa na acerengi thangwi ya kusaka nkhuni peno makala. Madzi asapswipiswa, mbakhonda nyindirika kumwa. Umedzi usafudzwa na pirombo pinaponywa m’madzi na mafabirika na njira zacincino za umedzi. Muya usakhuiya na upswipi.
UTSIDZIKIZI WA UMASO: Pisalongwa kuti phindu ya munthu mbodzi na mbodzi pa caka ku Afrika wa kubangwe kwa Sahara ndi yakucepa kakamwe. Kufuna kwa pyonsene kwa makompanyia kusagwisa malonda, mbukusiya pikwi pya anthu pyakusowa basa. Nvinviniso usacitisa anaciro makompanyia kuluza pyakupulumusa umaso.
KUSOWEKA KWA PYAKUDYA: Cifupi na anthu 800.000.000 m’dziko yonsene asagona na njala nzidzi onsene.
NKHONDO: Anthu akupiringana 100.000.000 aluza umaso wawo thangwi ya nkhondo m’piaka dzana 20. Nzidzi onsene pana mfuti za nyukiliya zakukwana zakuti zingakwanise kufudza anthu onsene. Nkhondo ya anthu a dziko ibodzi ene. Terrorismo yamwazika m’dziko yonsene yapantsi.
MULIRI NA MATENDA ANANGO: Nyampwanda wa Espanya apha anthu 21.000.000 kutomera pa caka ca 1918. Cincino SIDA adzakhala “muliri wakupha kakamwe kupiringana unango m’mbiri ya anthu.” Cancro na utenda wa ntima pisatsukwalisa dziko yonsene yapantsi.
Lekani kuyang’ana mphangwa basi tayu. Kodi ndi ninji piri nduli mwa pyenepi? Kodi pyakucitika pyenepi si khundu ya makhaliro a dziko yonsene pyakuti piri na mabvekero andimomwene?
[Bokosi/Foto pa tsamba 5]
Kodi Mulungu Asatitsalakanadi?
Thangwi ya kutsukwaliswa na pinthu pyakudzidzida peno na kuluza kukulu kwa munthu, anthu azinji asasaka kudziwa thangwi yanji Mulungu nkhabe kukhondesa pinthu pyenepi.
Mulungu asatitsalakanadi. Iye asapasa cincino citsogolero cakunyindirika na cisudzulo candimomwene. (Mateyu 11:28-30; 2 Timoti 3:16, 17) Iye acita masasanyiro towera kumalisiratu uphanga, utenda na kufa. Masasanyiro ace asapangiza kuti iye asatsalakana anthu amadziko onsene, madzinza na pilongero, tayu anthu a dziko ibodzi basi.—Machitiro 10:34, 35.
Kodi tisatsalakana tani cifuniro ca Mulungu? Kodi musadziwa kuti mbani Nciti wa kudzulu na dziko yapantsi? Kodi dzinace mbani? Kodi cifuniro cace ndi cipi? Iye asatawira mabvunzo awa m’Bibilya. Mwenemo iye asatipanga kuti ndi mathanyo api anakwata iye towera kumalisa uphanga pabodzi na utenda na kufa. Kodi ndi ninji pinafunika kwa ife towera tiphindule na pyenepi? Tisafunika kupfunza pya iye na cifuniro cace. Kodi tinakwanisa tani kudikhira kuphindula na masasanyiro ace khala ife nkhabe kupangiza cikhulupiro kwa iye? (Juwau 3:16; Aheberi 11:6) Mphyakufunika pontho kubvera pinafuna iye. (1 Juwau 5:3) Kodi musatsalakana mwakukwana kuti mucite pyenepi?
Towera kubvesesa thangwi yanji Mulungu asatawirisa makhaliro alero, tisafunika kubvesesa cinthu cakufunika. Bibilya isacifokotoza. Pa tsamba 15 ya bruxura ino, mungakwanise kupfunza cinthu ceneci.