Kodi Umaso Wanu Ukukutsogolerani Kupi?
• Anthu azinji asadzudzumika kakamwe na pinthu pya umaso wa ntsiku na ntsiku kwakuti nkhabe nzidzi wakunyerezera na pang’ono pene kunaenda iwo.
• Bibilya isatipanga pya pinthu pyadidi pya ntsogolo. Iyo isatipangambo pya kucinja kukulu kwa mautongi a anthu kunafuna bwera. Towera tiphindule na kucalira ngobzi, tisafunika kucita cinthu cadidi mwakucimbiza.
• Pana anthu anango akuti asadziwa pinalonga Bibilya na asayesera kupiphatisira mbwenye asasiya pidzudzumiso pya umaso piatsogolere m’njira yakudodomeka.
• Kodi musakomerwa na makhaliro a umaso wanu? Mukanyerezera kucita pinthu, kodi musapibvunza kuti pyenepi pinadzakhuya tani pifuno pyanu pya ntsogolo m’umaso?
[Bokosi/Mafoto pa tsamba 9]
Kodi Cakufunika Kakamwe Kwa Imwe Ndi Ninji?
Kodi mbumudapipamba tani? Pindandaliseni.
Pizinji pya ipyo pina mbuto zapyo m’umaso, mbwenye mbumudasankhula kuikhanji pa mbuto yakutoma? yaciwiri? kuenda kutsogolo.
․․․ Pyakubalangaza/masenzekero
․․․ Basa yanga
․․․ Ungumi wanga
․․․ Kutsanzaya kwanga
․․․ Nzanga wamuukwati
․․․ Anyakubalanga
․․․ Ananga
․․․ Nyumba yadidi, nguwo zadidi
․․․ Kufuna kukhala wadidi kupiringana anango m’pyonsene pinacita ine
․․․ Kulambira Mulungu
[Bokosi pa tsamba 10, 11]
Kodi Pyakusankhula Pyanu Pisakutsogolerani Kunafunadi Kuenda Imwe?
DINGANI PINTHU IPI
PYAKUBALANGAZA/MASENZEKERO: Kodi masenzekero anasankhula ine asandipumisa? Kodi asaphataniza tsenzo yakuti ingakwanise kuikha ungumi wanga pangobzi peno kundiphekesa m’umaso wanga onsene? Kodi asandipasa “kutsanzaya” panango kwa nzidzi wakucepa kwakuti pakumalisira kungakwanise kundibweresera kupha ntima kokhonda mala? Ngakhale kuti pyakubalangaza pinasankhula ine mphyaungumi, kodi pisandibvungisa nzidzi uzinji kakamwe kwakuti nkhabe sala unango towera kucita pinthu pyakufunika kakamwe?
BASA YANGA: Kodi isandipasa pyaumaso, peno isandicitadi bitcu? Kodi isandiphemba nzidzi uzinji na mphambvu mbiphekesa ungumi wanga? Kodi ndisasankhula kupiringana nzidzi m’basa yanga peno kuubvunga na nzanga wamuukwati peno ananga? Khala nzungu wanga asandiphemba kucita basa inadzokonya cikumbuntima canga peno yakuti kazinji kene isaphimba pinthu pyauzimu, kodi ndinadzaicita towera kukhonda kuiluza?
UNGUMI WANGA: Kodi ndisauona ninga wakukhonda luzika, peno ndisasaka mwacidikhodikho kuutsidzikiza? Kodi iwo usatonga makani anga? Kodi njira inautsalakana ine isapangiza kuti ndisanyerezera banja yanga?
KUTSANZAYA KWANGA: Kodi ndisakuikha pa mbuto yakutoma? Kodi ndisakuikha patsogolo pa kutsanzaya kwa nzanga wamuukwati peno kwa banja yanga? Kodi njira inakusaka ine isabverana na kukhala kwanga mulambiri wa Mulungu wandimomwene?
NZANGA WAMUUKWATI: Kodi ndisaona nzanga wamuukwati ninga xamwali pinthu pikandikomeresa basi? Kodi ndisalemedza nzanga wamuukwati ninga munthu wakuthema ukulu? Kodi kukhulupira Mulungu kusakhuya njira inaona ine nzanga wamuukwati?
ANYAKUBALANGA: Khala ndine wang’ono, kodi ndisabvera anyakubalanga—kuatawira mwakulemedza, kucita mabasa anandituma iwo, kubwerera kunyumba m’nzidzi unafuna iwo, kucalira kufambirana na kucita pinthu pinandicenjeza iwo? Khala ndine nkulu, kodi ndisabvesera anyakubalanga mwakulemedza, mbindiaphedza mwadidi mwakubverana na pinafuna iwo? Kodi njira inaatsalakana ine isatongwa na kufuna kwanga peno na uphungu wa Mafala a Mulungu?
ANANGA: Kodi ndisadzindikira basa yanga ya kupfunzisa ananga makhaliro adidi, peno ndisadikhira maxikola kuti acite pyenepi? Kodi ndisabvunga nzidzi na ananga, peno ndisadikhira kuti pyakusenzeka napyo, TV, peno ntcini wanzeru piabalangaze? Kodi ndisalanga ananga mwakukhonda phonya akapwaza macenjezo a Mulungu, peno ndisaalanga makamaka angandiipirisa?
NYUMBA YADIDI, NGUWO ZADIDI: Kodi ndi ninji cinatsogolera citsalakano cinapasa ine maonekero na mpfuma yanga—pinafuna ine kupangiza anyakuendekana anga? kukhalika kwa banja yanga? peno kukhala mulambiri wa Mulungu?
KUFUNA KUKHALA WADIDI KUPIRINGANA ANANGO M’PYONSENE PINACITA INE: Kodi ndisapibva kuti ndi kwakufunika kucita pinthu mwadidi? Kodi ndisawangisira kukhala wadidi kupiringana anango? Kodi ndisadzudzumika khala munthu unango acita mwadidi?
KULAMBIRA MULUNGU: Kodi kutawirwa na Mulungu ndi kwakufunika kakamwe kwa ine kupiringana kutawirwa na nzanga wamuukwati, ananga, anyakubalanga, peno nzungu wanga? Kodi mbindidatawira kuikha basa ya Mulungu pa mbuto yaciwiri towera kugumana makhaliro adidi a umaso?
NYEREZERANI MWACIDIKHODIKHO UPHUNGU WA BIBILYA
Kodi mbuto ya Mulungu ndi ipi m’umaso mwanu?
Mlaliki 12:13: “Gopa Mulungu wandimomwene na koya matongero ace. Thangwi ici ndico consene cinafunika kwa munthu.”
PIBVUNZENI: Kodi umaso wanga usapangiza kuti ndisaona pinthu m’njira ineyi? Kodi kubvera matongero a Mulungu kusatonga matsalakaniro akupitawirira kwanga kunyumba, kubasa na kuxikola? Kodi pinthu na pikakamizo pinango pya umaso pisatonga kukoya kwanga nzidzi towera kucita basa ya Mulungu?
Kodi imwe muli na uxamwali wa ntundu wanji na Mulungu?
Misanje 3:5, 6: “Khulupira Yahova na ntima wako wonsene na leka nyindira udziwi wako ene. Nsake m’njira zako zonsene, na iye ene anadzalungamisa njira zako.”
Mateyu 4:10: “Gwera pantsi Mbuya Mulungu wako mbamulambira iye ekha ene basi!”
PIBVUNZENI: Kodi ndisapibva tenepa thangwi ya Mulungu? Kodi pinacita ine ntsiku zonsene, pabodzi na njira inayang’anisana ine na pinenso, pisapangiza cikhulupiro na cinyindiro ceneci?
Kodi musaona kuleri na kupfunza Bibilya ninga kwakufunika?
Juwau 17:3: “Ndiwo moyo wakukhaliratu kuti anthu akudziweni imwe, Mulungu mbodzi kakamwe, mbadziwambo Yezu Kristu adatumwa na imwe.”
PIBVUNZENI: Kodi mbuto inaikha ine kuleri na kunyerezera Mafala a Mulungu isapangiza kuti ndisakhulupiradi pyenepi?
Kodi musaona kuenda ku misonkhano ya mpingo Wacikristu ninga kwakufunika?
Aheberi 10:24, 25: ‘Tioneranembo mbatiphedzana, towera munthu mbodzi na mbodzi apangize nzace kumfuna kwace mbacita mabasa adidi. Tikhonde kujomba misonkhano ya Akristu, makamaka na kuona kuti ntsiku inabwera Mbuya iri duzi.’
Masalimo 122:1: “Ndakomerwa mudandipanga iwo: ‘Tendeni kunyumba ya Yahova.’”
PIBVUNZENI: Kodi njira ya umaso wanga isapangiza kupereka takhuta utsogoleri unagumanika m’Mafala a Mulungu? Kodi nkati mwa mwezi udamala, ndajomba nsonkhano Wacikristu thangwi ya kusiya cinthu cinango kuuphimbira?
Kodi ndimwe waphinga m’kucita khundu m’kulonga na anango pya Mulungu na cifuniro cace?
Mateyu 24:14: “Mphangwa Zadidi zinabvekebswa pantsi pano ponsene, towera anthu onsene abve . . . Buluka penepo kunafika kumala.”
Mateyu 28:19, 20: “Chinchino ndokoni kuna anthu a madziko onsene mbumuachita anyakupfundza anga. . . . Apfunziseni kupichita pyonsene pidakupangani ine.”
Masalimo 96:2: “Imbirani Yahova, simbani dzina yace. Longani ntsiku na ntsiku mphangwa zadidi za upulumusi wace.”
PIBVUNZENI: Kodi mabasa anewa ndisaaikhadi m’mbuto yakutoma m’umaso wanga? Kodi njira inacitene mabasa anewa isapangiza kukhulupira kwanga kwakuti nzidzi unakhala ife ndi wakuipa?