Miliri Inango Mitanthatu

Mose na Aroni aenda kuna Farau kampanga mphangwa za Mulungu: ‘Ungakhonda kusiya kuti mbumba yanga iende, ndinatumiza ntcentce zikulu mu dziko ino.’ Ntcentce zenezi zapita m’manyumba mwa Aejitu onsene, akupfuma na atcerengi ene. Dziko yonsene yadzala na ntcentce zenezi. Mbwenye mu dziko ya Gozeni ikakhala Aizraeli nee kukhali na ntcentce. Kutomera muliri wacinai mpaka wakumalisa ikhathabusa basi ene Aejitu. Farau adembetera Mose: ‘Phemba Yahova toera abuluse ntcentce. Ndinasiya mbumba yako iende.’ Mbwenye pidabulusa Yahova ntcentce zonsene, Farau acinja manyerezero ace. Kodi Farau apfundza cinthu na miliri ineyi?

Yahova alonga: ‘Farau angakhondesa mbumba yanga kuenda, pinyama pya Aejitu pinadzaduwala mbapifa.’ Mangwana mwace, pinyama pyawo pyatoma kufa, mbwenye pinyama pya Aizraeli nee pyafa. Farau nee abvera pontho mbapitiriza kukhondesa Aizraeli.

Buluka penepo, Yahova apanga Mose toera aende pontho kuna Farau mbaponya dotha ndzulu. Dotha yamwazika mbitoma kuphekesa Aejitu. Iyo ikhacitisa Aejitu onsene na pinyama kukhala na pironda pyakupha kakamwe. Ngakhale tenepo, Farau nee atawirisa Aizraeli kuenda.

Yahova atuma pontho Mose toera akapange Farau mphangwa izi: ‘Kodi ukupitiriza basi kukhondesa mbumba yanga toera iende? Mangwana, matalala anabvumba mu dziko ino yonsene.’ Mangwana mwace, Yahova acitisa kudhima mbabvumbisa matalala na moto. Cikhali condzi cikulu cakuti cipo cikhadacitika kale mu Ejitu. Miti yonsene na pyonsene pikhali m’maminda pyamala fudzika, kusiyapo dziko ya Gozeni. Farau alonga: ‘Phemba Yahova amalise muliri uyu toera ndikusiyeni muende.’ Mbwenye pidamala condzi na matalala, Farau acinja manyerezero ace.

Buluka penepo, Mose alonga: ‘Cincino, anyadzombe anadzadya miti yonsene idasiyiwa na condzi ca matalala.’ Anyadzombe azinji kakamwe adya pyonsene pikhadasala m’maminda na m’miti. Farau adembetera: ‘Phemba Yahova toera abuluse anyadzombe.’ Mbwenye ngakhale pidabulusa Yahova anyadzombe, Farau apitiriza kukhondesa Aizraeli kuenda.

Yahova apanga Mose: “Lamusa djanja yako uthonye kudzulu.” Mu ndzidzi ubodzi ene kwaoneka cidima kakamwe. Mu ntsiku zitatu, Aejitu nee akwanisa kuona cinthu, pontho nee kuonana. Mbwenye Aizraeli akhali na ceza n’nyumba zawo.

Farau apanga Mose: ‘Ndokoni pabodzi na ananu, mbwenye mabira na ng’ombe zanu pinasala.’ Mbwenye Mose alonga: ‘Tisafunika kukwata pinyama toera tipipereke ninga ntsembe zakupiswa kuna Mulungu wathu.’ Farau aipirwa kakamwe, mbakhuwa: ‘Buluka pamaso panga! Ndingakuona pontho, ndinakupha.’