Cirengo Cidacitika pa Bara Yakufuira

Pidabva Farau kuti Aizraeli abuluka mu Ejitu, iye acinja manyerezero ace. Iye apanga anyakutekenya ngolo: ‘Gumanyani ngolo zonsene za nkhondo, tiatowere! Nee tisafunika kuasiya kuti aende.’ Iye na anyankhondo ace atoma kutowera Aizraeli.

Yahova akhatsogolera mbumba yace. Namasikati akhaphatisira khole, namasiku akhaphatisira khole ya moto. Iye aatsogolera mpaka ku Bara Yakufuira, mbaapanga toera amange misasa.

Buluka penepo, Aizraeli aona Farau na anyankhondo ace mbakaatowera. Kutsogolo kwawo akhadafungirwa na bara, pontho nduli mwawo akhadafungirwa na anyankhondo a Ejitu. Iwo akhuwira Mose: ‘Ife tinaphiwa! Mbapidakhala mwadidi kutisiya pyako ku Ejitu.’ Mose alonga: ‘Lekani kugopa. Dikhirani, pontho onani njira inafuna kutipulumusa Yahova.’ Mose akhanyindira kakamwe Yahova.

Yahova apanga Aizraeli kuti akhunganyike toera kubuluka. Ntsiku ineyi namasiku, Yahova acitisa kuti khole ikhale pakati pa Aejitu na Aizraeli. Kukhundu ya Aejitu kukhali na cidima. Mbwenye kukhundu ya Aizraeli kukhali na ceza.

Yahova apanga Mose toera athonye bara na ndodo yace. Penepo Yahova acitisa mphepo ikulu masiku onsene. Bara yagawika, pakati mbapakhala na njira. Aizraeli onsene apita na njira ineyi mbafamba pa mataka akuuma mpaka kuntunda unango.

Farau na anyankhondo ace atowerera Aizraeli mbapitambo na pakati pa bara. Buluka penepo, Yahova aacitisa kuti acimwane kufamba mwadidi. Maroda a ngolo zawo atoma buluka. Anyankhondo akhuwa: ‘Tendeni tithawe! Yahova akuamenyera nkhondo.’

Yahova apanga Mose: ‘Lamusa nkono wako uthonye bara.’ Natenepa, madzi abwerera mbabiza anyankhondo a Ejitu. Farau na anyankhondo ace afa. Nee m’bodzi mwa iwo apulumuka.

Kukhundu inango ya bara, mwinji ukulu wa Aizraeli ukhasimba Mulungu na nyimbo: ‘Imbirani Yahova, thangwi apangiza ukulu wace. Aponya m’bara makavalo na anthu adakwira pa makavalo.’ Mu ndzidzi ukhaimba mbumba, akazi akhabvina, pontho akhamenya ng’oma. Onsene akhali akutsandzaya thangwi yakupulumuswa.