Templo ya Yahova

Pidamala Salomoni kukhazikiswa ninga mambo wa Aizraeli, Yahova ambvundza: ‘Usafuna ndikupasenji?’ Salomoni atawira: ‘Ndine m’phale, ine nkhabe dziwa ndinatonga tani. Ndaphata miyendo, ndipaseni udziwisi toera nditsalakane mwadidi mbumba yanu.’ Yahova alonga: ‘Nakuti waphemba udziwisi, ine ndinadzakucitisa kukhala mamuna waudziwisi kakamwe pa dziko yapantsi. Ndinakupasambo mpfuma. Ungandibvera, unakhala m’maso pyaka pizinji.’

Salomoni atoma kumanga templo. Iye aphatisira, ouro, parata, matabwa na miyala. Amuna na akazi azinji akuti akhali na maluso akumanga, aphedzera kumangwa kwa templo. Pakupita pyaka pinomwe, templo yamala kumangwa toera kuperekwa kuna Yahova. Templo ineyi ikhali na guwa toera kuperekera ntsembe. Salomoni agodama kutsogolo kwa guwa mbaphemba: ‘Yahova, templo iyi ndi ing’ono, pontho nee ndi yakubalika kakamwe kuna imwe, mbwenye ndaphata miyendo tawirani ulambiri wathu na bveserani maphembero athu.’ Kodi Yahova aona tani templo na phembero idacita Salomoni? Pidamala Salomoni kucita phembero, wabuluka moto kudzulu mbupisa ntsembe zikhali pa guwa. Natenepa, templo yakhala yakutawirika kuna Yahova. Aizraeli akomerwa kakamwe pidaona iwo pyenepi.

Mambo Salomoni adzadziwika kakamwe thangwi ya udziwisi wace. Anthu a mbuto zizinji akhaenda kuna iye toera kuphedzwa kumalisa nyatwa zawo. Ngakhale mambo wankazi wa ku Sabha aendambo kuna Salomoni mbancita mibvundzo yakunentsa. Pidamala iye kubva mitawiro ya Salomoni, iye alonga: ‘Pidabva ine pyenepi nee ndapitawira. Natenepa ndabwera kuno kudzapiona na maso anga, mbwenye cincino ndaona kuti imwe muli na udziwisi kakamwe. Yahova Mulungu wanu asakupasani nkhombo.’ Mbumba ya Izraeli ikhali yakutsandzaya. Mbwenye pinthu pyadzacinja.