Umambo Unafuna Kudzatonga Kwenda na Kwenda

Ntsiku inango namasiku, Mambo Nabhukodhonozore alota ndoto yakudzumatirisa. Iye adzudzumika kakamwe mbacimwana kugona. Natenepa acemeresa anyakucita masalapita mbaapanga: ‘Ndifokotozereni pidalota ine.’ Iwo atawira: ‘Mambo, tipangeni pidalota imwe.’ Mbwenye Nabhukodhonozore aapanga: ‘Nkhabe! Ndifokotozereni pidalota ine, mungakhonda ndinakuphani.’ Amuna anewa alonga pontho: ‘Tipangeni pidalota imwe toera tikufokotozereni.’ Nabhukodhonozore alonga: ‘Imwe musafuna kundinyengeza. Ndifokotozereni pidalota ine!’ Iwo apanga mambo: ‘Nkhabepo munthu anakwanisa kucita pyenepi. Pinaphemba imwe nkhabe kwanisika.’

Nabhukodhonozore aipirwa kakamwe mbalonga kuti amuna onsene audziwisi a Bhabhilonya asafunika kuphiwa. Pyenepi pikhaphatanizambo Dhanyeli, Sadhrake, Mezaki na Abhedhenego. Dhanyeli pidabva iye pyenepi, aphemba mambo toera ampase ndzidzi wakuti mbudam’phedza kufokotoza pidalota iye. Buluka penepo iye na axamwali ace aphembera kuna Yahova toera aaphedze. Yahova acitanji?

Kubulukira m’masomphenya, Yahova apangiza Dhanyeli ndoto ya Nabhukodhonozore na mabvekero ace. Mangwana mwace, Dhanyeli aenda kuna ntumiki wa mambo mbampanga: ‘Lekani kupha amuna audziwisi. Ine ndinafokotoza ndoto ya mambo.’ Ntumiki unoyu akwata Dhanyeli mbaenda naye kuna Nabhukodhonozore. Dhanyeli apanga mambo: ‘Mulungu akupangizani pinafuna kukucitikirani ntsogolo. Ndoto yanu ndi iyi: Mwaona dzimunthu ikulu kakamwe. Nsolo wa dzimunthu ineyi ukhali wa ouro, diti na mikono ikhali ya parata, mimba yace na ntcafu zace zikhali za nkuwa; miyendo ikhali ya utale, khundu ibodzi ya manyalo ace ikhali ya utale, khundu inango ikhali ya dongo. Buluka penepo, mwala wabuluka paphiri mbugwera miyendo ya dzimunthu ineyi. Dzimunthu yanyedzeka mpaka kudza pfumbi mbimwazika na mphepo. Mwala wadzakhala phiri ikulu, mbiphimbira dziko yonsene.’

Buluka penepo, Dhanyeli alonga: ‘Mabvekero a ndoto yanu ndi awa: Nsolo wa ouro ndimwe. Parata ndi umambo unafuna kutowera. Buluka penepo, panadzaoneka umambo unango wakulandana na nkuwa, wakuti unadzatonga dziko yonsene. Ungamala umambo unoyu, unadzatowera unango wakuwanga ninga utale. Pakumalisira, panadzaoneka umambo wakugawika, khundu ibodzi inadzakhala yakuwanga ninga utale, khundu inango inadzakhala yakufewa ninga dongo. Mwala wakuti wadzakhala phiri ikulu ndi Umambo wa Mulungu. Umambo unoyu unadzafudza maumambo awa onsene, pontho iwo unadzakhala kwenda na kwenda.’

Pidabva Nabhukodhonozore pyenepi, agodama patsogolo pa Dhanyeli mbakotamisa nkhope yace mpaka pantsi. Iye alonga: ‘Ndi Mulungu wako adakufokotozera mabvekero a ndoto yanga. Nkhabepo Mulungu unango ninga iye.’ M’mbuto mwakupha Dhanyeli, Nabhukodhonozore an’khazikisa ninga ntsogoleri wa amuna onsene audziwisi, pontho amuikha ninga ntongi wa mizinda yonsene ya Bhabhilonya. Yahova atawira tani phembero ya Dhanyeli?