Esteri Apulumusa Mbumba Yace

Esteri akhali ntsikana Waciyuda wakuti akakhala mu nzinda wa Persya, ku Suza. Esteri akakhala kweneko thangwi Nabhukodhonozore am’bulusa ku Yerusalemu pabodzi na banja yace. Esteri akuzwa na m’bale wa babace, Mordhekai, wakuti akhali ntumiki wa Mambo Asuwero wa ku Persya.

Mambo Asuwero akhafuna nyanyi unango. Atumiki ace am’bweresera akazi akubalika kakamwe a mu dziko yace, kuphatanizambo Esteri. Mbwenye mambo asankhula Esteri toera akhale nkazace. Mordhekai akhadapanga Esteri toera akhonde kulonga kuti ndi Muyuda.

Amani akhali nkulu wa atumiki onsene a mambo, pontho akhali wakudzikuza. Iye akhafuna kuti anthu onsene an’godamire. Pidakhonda Mordhekai kucita pyenepi, Amani aipirwa kakamwe mbafuna kumupha. Pidadzindikira Amani kuti Mordhekai akhali Muyuda, iye acita masasanyiro toera kupha ayuda onsene mu Bhabhilonya, mbapanga mambo: ‘Ayuda ndi akugopswa; musafunika kuapha onsene.’ Asuwero alonga: ‘Cita pinafuna iwe.’ Mambo atawirisa Amani toera kukhazikisa ntemo. Amani akhazikisa ntemo toera kupha Ayuda onsene pa ntsiku 13 ya mwezi wa Adhari. Mbwenye Yahova akhaona pyonsene.

Esteri nee akhadziwa kuti pakhadakhazikiswa ntemo. Natenepa, Mordhekai atumiza tsamba kuna iye, mbampanga toera akalonge na mambo. Esteri atawira: ‘Munthu angaenda kuna mambo nee kucemerwa anaphiwa. Papita ntsiku 30, nee ndacemerwa na mambo! Mbwenye ndinaenda. Angandithonya na ndodo yace, ndinapulumuka. Angakhonda kucita pyenepi, ndinaphiwa.’

Esteri apita n’nyumba inatongera mambo. Mambo aona Esteri, mban’thonya na ndodo yace. Esteri afendedzera cifupi, mambo mbambvundza: ‘Esteri, usafuna ndikucitirenji?’ Iye atawira: ‘Ndisafuna kucemera imwe na Amani toera mubwere ku phwando masiku ano.’ Pa phwando ineyi, Esteri aapanga toera abwere pontho pa phwando yaciwiri. Mu ndzidzi ukhadya iwo pa phwando yaciwiri, mambo ambvundza pontho: ‘Esteri, usafuna ndikucitirenji?’ Iye atawira: ‘Pali na munthu anafuna kundipha pabodzi na mbumba yanga. Ndaphata miyendo tipulumuseni.’ Mambo ambvundza: ‘Mbani unoyu anafuna kukupha?’ Iye atawira: ‘Ndi uyu mamuna wakuipa Amani.’ Asuwero aipirwa kakamwe, natenepa akhafuna kuti Amani aphiwe ndzidzi ubodzi ene.

Mbwenye nkhabe munthu akhafuna kwanisa kufudzisa ntemo wa Amani, ngakhale mambo. Mambo asankhula Mordhekai toera atsogolere atumiki ace onsene, mbampanga toera akhazikise ntemo upswa. Mordhekai akhazikisa ntemo toera Ayuda atsidzikizike angapomokerwa. Mu ntsiku 13 ya Adhari, Ayuda apha anyamalwa awo. Kutomera ndzidzi unoyu, iwo akhakumbuka ntsiku ineyi pyaka pyonsene.