Mipanda ya Yerusalemu

Mu nzinda wa Suza ku Persya, kukhali Muizraeli akhacemerwa Neemiya. Iye akhali ntumiki wa Mambo Artaxerxe. M’bale wace Neemiya abweresa mphangwa zakuipa kubulukira ku Yuda: ‘Mbumba idabwerera ku Yerusalemu iri pangozwi. Mipanda na misuwo idafudzwa na Abhabhilonya nee yamangwa pontho.’ Neemiya atsukwala kakamwe. Iye akhafuna kuenda ku Yerusalemu kaphedza mbumba, natenepa acita phembero toera mambo antawirise.

Mukupita kwa ndzidzi, mambo adzindikira kuti Neemiya akhadatsukwala. Mambo alonga: ‘Cipo ndakuona kale tenepo. Ninji pikucitika?’ Neemiya atawira: ‘Ndiri wakutsukwala thangwi nzinda wanga wa Yerusalemu uli pangozwi.’ Mambo ambvundza: ‘Mphapo usafuna ndikucitirenji?’ Mwakucimbiza, Neemiya acita phembero mwacipantsipantsi. Buluka penepo, iye alonga: ‘Ndaphata miyendo, ndisiyeni ndiende ku Yerusalemu toera ndikamange pontho mipanda.’ Mambo Artaxerxe atawirisa Neemiya toera aende, pontho acita masasanyiro toera acite ulendo wadidi. Iye akhazikisa Neemiya ninga ntongi wa Yuda, pontho ampasa matabwa toera kucita nawo misuwo ya nzinda.

Pidafika Neemiya ku Yerusalemu, iye azungulira toera kuona mipanda ya nzinda. Buluka penepo, acemeresa anyantsembe na atongi mbaapanga: ‘Pinthu nee piri mwadidi. Tisafunika kuphata basa.’ Anthu onsene atawira, mbatoma kumanga mipanda.

Mbwenye anyamalwa anango a Aizraeli akhaasingirira, mbalonga: ‘Mwanambwa wantsanga angayesera kukwira mpanda unamanga imwe, unagomoka wakucimbiza.’ Anyakumanga nee abwerera nduli thangwi yakutikanwa, mbwenye apitiriza kumanga. Mipanda ikhapitiriza kulapha mbikhala yakuwanga.

Anyamalwa akhacita masasanyiro toera kuphatisira njira inango toera kufudza nzinda mwakututumusa. Pidadziwa Ayuda masasanyiro anewa, iwo agopa. Mbwenye Neemiya alonga: ‘Lekani kugopa. Yahova anatiphedza.’ Neemiya aikha anyakuonera toera kutsidzikiza anyakuphata basa. Pyenepi pyacitisa kuti anyamalwa acimwane kuakunda.

Mbumba yamala kumanga mipanda na misuwo mu ntsiku 52. Neemiya abweresa Alevi onsene ku Yerusalemu toera atome kuphatisira templo. Iye aagawa m’misoka miwiri yakuimba. Iwo akwira padzulu pa mipanda kukhundu ya Nsuwo wa Mphuno za Madzi, nsoka ubodzi mbuenda na kukhundu yamadyo, unango mbuenda na kukhundu yabzwere. Iwo akhaimba matuluka na pyakuimba napyo pinango, mbasimba Yahova. Esdhra akhafamba na nsoka ubodzi, Neemiya akhafamba na nsoka unango, mpaka kugumanikana pa templo. Mbumba yonsene, amuna, akazi na anapiana apereka ntsembe kuna Yahova mbacita phwando. Kukhuwa thangwi ya kutsandzaya kwawo kukhabveka na kutali kakamwe.