Yezu na Nkazi wa ku Samariya

Pidamala Paskwa, pikhabwerera iwo ku Galileya, Yezu na anyakupfundzace apita na ku Samariya. Cifupi na nzinda wa Sikari, Yezu alimira dhuzi na pa ncera wa Yakobe. Mu ndzidzi unoyu anyakupfundzace akhadaenda ku nzinda kagula cakudya.

Nkazi wa ku Samariya afika pa ncera kudzatunga madzi. Yezu alonga: “Ndipasembo madzi ndimwe.” Nkazi abvundza: ‘Thangwi yanji mukulonga na ine? Ine ndine nkazi wa ku Samariya. Ayuda nee asalonga na Asamariya.’ Yezu antawira: ‘Mbudadziwa kuti ndine ani, mbudandiphemba madzi, ine mbidakupasa madzi a umaso.’ Nkazi abvundza: ‘Pyenepi pisabvekanji?’ Yezu antawira: ‘Munthu onsene anamwa madzi anampasa ine nee anabva pontho nyota.’ Nkazi antawira: ‘Mbuya, ndipaseni madzi anewa.’

Natenepa, Yezu alonga: ‘Kacemere mamunako.’ Nkazi atawira: ‘Ine nkhabe mamuna.’ Yezu alonga: ‘Iwe ukulonga undimomwene. Ukhadamanga banja kaxanu, cincino usakhala na mamuna wakuti nee ndi mamunako.’ Nkazi atawira: ‘Ndikuona kuti ndimwe mprofeta. Mbumba yathu isalonga kuti tisafunika kulambira Mulungu pa phiri iyi, mbwenye Ayuda asalonga kuti tisafunika kulambira mu Yerusalemu. Ndisakhulupira kuti Mesiya angafika, anadzatipfundzisa kuti tinalambira tani.’ Buluka penepo, Yezu apanga nkazi unoyu cinthu cakuti nee akhadapanga kale anthu anango: ‘Ine ndine Mesiya.’

Nkazi athamanga mbaenda ku nzinda kapanga Asamariya: ‘Ndisaona ndagumana Mesiya. Iye asadziwa pyonsene thangwi ya ine. Tendeni mukamuone!’ Iwo aenda naye pa ncera mbabvesera pikhalonga Yezu.

Asamariya aphemba Yezu toera akhale mu nzinda wawo. Mu ntsiku ziwiri, iye apfundzisa mu nzinda unoyu, pontho anthu azinji an’khulupira. Anthu a mu nzinda apanga nkazi wa ku Samariya: ‘Cincino tisadziwa kuti mamuna uyu ndi mpulumusi wa dziko.’