Yezu Acita Pirengo Pizinji

Yezu abwera pa dziko yapantsi toera kumwaza mphangwa zadidi za Umambo wa Mulungu. Toera kupangiza pinafuna kudzacita Yezu ninga Mambo, Yahova apasa Yezu nzimu wakucena toera kucita pirengo. Iye akhakwanisa kuwangisa mautenda onsene. Natenepa, mbuto zonsene zikhaenda iye, anthu akhaphemba toera kuwangiswa, pontho iye akhaawangisa. Iye akhawangisa maboliboli, anyakukhonda kubva, anyakulamala, pontho akhabulusa madimonyo. Anango akhawangiswa basi ene angakhuya nguwo zace. Anthu akhatowera Yezu konsene kukhaenda iye. Iye cipo asiya kuphedza anthu ngakhale mu ndzidzi ukhafuna iye kukhala ekhene.

Ntsiku inango, anthu akwata mamuna wakulamala mpaka panyumba ikhali Yezu. Nakuti anthu akhadadzala n’nyumba ineyi, iwo nee mbadakwanisa kupita nkati. Natenepa iwo afungula benga pantsoi mbatcitisa mamuna unoyu mpaka pa mbuto ikhali Yezu. Buluka penepo, Yezu apanga mamuna unoyu: ‘Lamuka ufambe.’ Iye alamuka mbafamba, natenepa anthu adzumatirwa kakamwe.

Pontho, ntsiku inango, pikhapita Yezu n’cisa, amuna khumi akuti akhali na matanya ancemera: ‘Yezu, tiphedzeni!’ Mu ndzidzi unoyu, anthu a matanya nee akhatawiriswa kukhala cifupi na anthu anango. Yezu apanga amuna anewa toera kuenda ku templo, pyenepi ndipyo pikhafunika kucitwa na anthu a matanya mbadzati kuwangiswa mwakubverana na Mwambo wa Yahova. Pidaenda iwo kweneko, iwo awangiswa. M’bodzi mwa iwo pidaona iye kuti awangiswa, abwerera toera kupereka takhuta kuna Yezu mbasimba Mulungu. Mwa anthu khumi, ndi m’bodzi basi adaenda kapereka takhuta kuna Yezu.

Nkazi wakuti akhaduwala mu pyaka 12 nee akhali na cidikhiro cakuti mbadawanga. Iye aenda nduli mwa Yezu pakati pa mwinji wa anthu mbakhuya nguwo zace. Mwakukhonda dembuka, iye awangiswa. Pidacitika pyenepi, Yezu abvundza: “Mbani adandikhuya?” Nkazi agopa mbafendedzera Yezu, buluka penepo mbampanga undimomwene onsene. Yezu am’balangaza mbampanga: ‘Mwananga, ndoko muntendere.’

Nkulu wa Sinagoga akhacemerwa Jairo adembetera Yezu: ‘Tendeni kunyumba kwanga! Mwananga wantsikana akubva kupha kakamwe.’ Mbwenye Yezu mbadzati kufika panyumba pa Jairo, ntsikana afa. Pidafika Yezu, iye aona anthu azinji mbakalira pabodzi na banja ineyi. Yezu aapanga: ‘Lekani kulira; iye basi ene akugona.’ Buluka penepo, iye aphata djanja ya ntsikana mbalonga: ‘Ntsikana, lamuka!’ Mwakukhonda dembuka, iye alamuka. Yezu apanga anyakubalace toera ampase cakudya. Mwakukhonda penula, anyakubala a ntsikana unoyu atsandzaya kakamwe!