“Ife Tagumana Mesiya”!

Pyaka madzana manai pakumala kulembwa khundu yakumalisa ya Bhibhlya ya malemba Acihebere, profesiya ya Mikeya inalonga pya Mesiya ikhadakwaniriswa: Yezu akhadabalwa kale m’Betelehemu. Pakupita pyaka cifupi 30, mu caka 29 N.W., khundu yakutoma ya profesiya ya Dhanyeli inalonga pya kufika kwa Mesiya ikhadakwaniriswa. Yezu abatizwa, pontho Mulungu andzodza na nzimu wakucena. Mesiya, Mbeu yakuti ikhadikhirwa mu ndzidzi wakulapha, adzafika pa ndzidzi wakuthema!

Mwakukhonda dembuka Yezu atoma utumiki wace wa ‘kumwaza mphangwa zadidi za umambo wa Mulungu.’ (Luka 8:1) Ninga mudalongerwa ipyo, Yezu apangiza kukhala munthu wakukoma ntima, wakufikirika na wakutsalakana anango. Mapfundzisiro ace akhali adidi, aufuni, pontho iye awangisa ntundu ‘onsene wa mautenda,’ kupangiza kuti Mulungu akhali na iye. (Mateo 4:23) Anthu a mathunga onsene akhaenda kuna Yezu alonga: “Ife tagumana Mesiya”!​—Jwau 1:41.

Yezu alongeratu kuti Umambo wace mbudzati kutoma kutonga pantsi pano, pa dziko panadzaoneka nkhondo, piteketeke na nyatwa zinango zizinji. Iye acenjeza onsene toera ‘kukhala maso.’​—Marko 13:37.

Yezu akhali munthu waungwiro wakuti apitiriza kubvera Mulungu, mbwenye akhali na anyamalwa akuti kupita kwa ndzidzi amupha. Kufa kwace kwapereka ntsembe yaungwiro toera kutiombola ku pinthu pidaluza Adhamu na Eva, umaso wakukhonda kumala mu Paradizu.

Kufa kwa Yezu kwakwanirisa profesiya, ninga pidacita Mulungu kulamusa Yezu ninga cakucitwa camphambvu ca uzimu pakumala ntsiku zitatu. Kubuluka penepo, aonekera kwa anyakupfundzace akupiringana 500. Mbadzati kuenda kudzulu, Yezu apasa atowereri ace basa yakumwaza mphangwa zadidi zinalonga pya iye na Umambo wace kwa “anthu a mitundu yonsene.” (Mateo 28:18) Kodi iwo acita tani basa ineyi mwakukwana?

​—Yabuluswa pa Mateo, Marko, Luka, Jwau, 1 Akorinto.