Kutumikira Mulungu Ndi Ntombwe Wace!

Mukacedzera apainiya awiri nyumba ibodzi ku Keniya, iwo adzumatirwa kuona mamuna wakubvira kakamwe mbakagona pa talimba. Iye akhali na nsana wakubvira kakamwe na mikono yakubvira. Mukhacedza iye na apainiya thangwi ya pikiro ya Mulungu yakuti, “anyanfutete anadzafamba mbanumpha ninga mbawala,” iye atawira na kutsandzaya kakamwe.​—Iza. 35:6.

Apainiya adzindikira kuti Onesmus, cincino ali cifupi na pyaka 40, iye abalwa na utenda wakufewesa magogodo. Magogodo ace akhali akufewa kakamwe kwakuti kuapfinya pang’ono mbadagwandika. Nakuti nkhabe mitombwe peno ukonzi wa utenda unoyu, Onesmus akadikhira kubva kupha mu umaso wace onsene na kuphatisira njinga ya anyakulamala.

Onesmus atawira pfundziro ya Bhibhlya. Mbwenye, mai wace akhonda kuti iye agumanike pa misonkhano Yacikristu, mbanyerezera kuti pyenepi mbipidathimizira kakamwe kubva kupha kwace. Natenepa, abale akhagravari misonkhano toera Onesmus abvesere kunyumba. Pakumala nthanda zixanu mbakapfundza, Onesmus atonga kugumanika pa misonkhano mwakukhonda kutsalakana ngozwi ya utenda wace.

Kodi kugumanika pa misonkhano Yacikristu kwathimizira kubva kupha kwa Onesmus? Pidacitika pikhali pyakusiyana. Onesmus asakumbuka, “Kubva kwanga kupha kukhacita mbwenye m’midzidzi ya misonkhano.” Iye anyerezera kuti cidikhiro cace cipswa cikhali thangwi ikhancitisa kupibva mwadidi. Mai wa Onesmus aona kucinja kwa makhaliro a mwanace, pontho pikhali pyakutsandzayisa kuti iye atawirambo pfundziro ya Bhibhlya. Iye alonga: “Kutumikira Mulungu ndi ntombwe wa mwananga.”

Mwakukhonda dembuka, Onesmus adzakhala m’mwazi mphangwa wakukhonda kubatizwa. Mu kupita kwa ndzidzi, iye abatizwa, cincino ndi ntumiki wakutumikira. Ngakhale kuti iye nee asakwanisa kuphatisira miyendo yace na nkono wace ubodzi, Onesmus ali na cifuno toera kucita pyonsene pinakwanisa iye m’basa ya Yahova. Iye akhafuna kukhala mpainiya wakuphedza mbwenye akhanyinyirika toera kulembesa. Thangwi yanji? Thangwi iye akhadziwa kuti mbadafuna kakamwe ciphedzo ca anango toera kukhuba njinga yace. Mudalonga iye cifuno cace kuna Akristu andzace, iwo alonga kuti anamphedza. Iwo acita pyenepi, aphedza Onesmus ninga mpainiya wakuphedza.

Onesmus akhafuna kukhala mpainiya wa ndzidzi onsene mbwenye akhali na nyatwa ibodzi ene. Natenepa, lemba ya ntsiku yamuwangisa. Lemba ikhali Masalmo 34:8: “Bwerani kudzayesera udidi wa Yahova.” Pakumala kunyerezera lemba ineyi mwacidikhodikho, Onesmus atonga kukhala mpainiya wa ndzidzi onsene. Cincino asamwaza mphangwa ntsiku zinai pa sumana na ali na anyakupfundza Bhibhlya azinji akuti akuthambaruka mwauzimu. Mu caka 2010, iye agumanika pa Xikola ya Basa ya Upainiya. Ndi wakutsandzaya tani Onesmus kukhala na mpfundzisi wace m’bodzi mwa apainiya awiri adacedza na iye pa ulendo wakutoma!

Anyakubala a Onesmus alowa, mbwenye abale na alongo m’mpingo asatsalakana pyakufuna pyace pya ntsiku na ntsiku. Iye asapereka takhuta thangwi ya nkhombo zonsene zinakhala na iye cincino, na asadikhira ntsiku yakuti ‘nee m’bodzi anakhala n’dziko mwathu anadzadwala.’​—Iza. 33:24.