Kumanga Nyumba Za Umambo—Khundu Yakufunika Ya Basa Yakucena

¹ Nkati mwa piaka pixanu pidapita, Nyumba za Umambo zakukwana 450 zamangwa m’dziko yathu ya Mosambiki. Tiri akukomerwa kakamwe na basa ya Misoka Yakumanga Nyumba Za Umambo na ale anaaphedza. Maseze basa izinji yamala kukwaniriswa, iciripo basa inango ikulu kuti icitwe m’kumanga Nyumba za Umambo. Kodi ife tonsene tinakwanisa tani kuphedza khundu ineyi yakufunika ya basa yathu yakucena kwa Yahova?—Apok. 7:15.

² Khalani Dzololo: Khala ndimwe mmwazi mphangwa wakubatizwa, tiri kukuphembani kuti muperekeke towera muphate basa pabodzi na Misoka Yakumanga Nyumba Za Umambo. (Sal. 110:3) Anyakuperekeka onsene asafunika kukhala dzololo towera kuphata basa na asafunika kukhala na nzimu wa kubverana. (Sal. 133:1) Ngakhale kuti imwe nkhabe luso ya kumanga, mungakwanise kupereka ciphedzo cikulu kakamwe towera basa ya kumanga ipembere. Mungakwanisembo kupfunziswa luso yakumanga yakuti inadzakucitisani kuphatisirwa kakamwe ntsogolo.

³ Khala munakwanisa tayu kuperekeka, mungakwanise kupangiza ciphedzo canu m’kuwangisa ale anakwanisa kucita khundu m’basa ineyi. Mungakwanise kucita m’mpingo mabasa a ale adaenda kamanga Nyumba Za Umambo. Akulu ampingo asafunika kucita masasanyiro mwanyapantsi towera mpingo ukhale wakutsalakanwa mwadidi munaenda anango ku basa ya kumanga Nyumba za Umambo. Tingakwanisembo kuphedza basa ineyi m’kucita cakupereka ca kobiri, cakudya na kuthuka mitolo ya kumanga. Mwakukhonda kupenula, Yahova asakomerwa munaphata ife basa pabodzi mwakubverana towera kuendesa kutsogolo pifuno pya Umambo.—Aheb. 13:16.

⁴ Khalani Wakuwangisa: Kumanga mbuto za kulambira kusaphataniza nzidzi uzinji na basa ya kuwanga. Mwandimomwene, m’midzidzi inango ale adacemerwa kuenda kaphedza basa ya kumanga anadzakhala kutali na mipingo yawo. Tendeni tisimbe na kuwangisa anyakumanga akuperekeka, anawangisira kutsalakana “mabasa” anewa akufunika.—Mach. 6:3; Arom. 14:19.

⁵ Khalani Wakulinganira: Kumwaza mphangwa za Umambo wa Mulungu ndi basa yathu yakutoma m’ulambiri. (Mko. 13:10) Na nyerezero ineyi m’nsolo, Misoka Yakumanga Nyumba Za Umambo isawangisira towera anyakumanga akuperekeka akhonde khala kutali na mipingo yawo mwakusowa basa. M’njira ibodzibodzi, anyakumanga akuperekeka asafunika kuwangisira kukhala akulinganira m’kukwanirisa pitawiriro pyawo pizinji. Asacita masasanyiro kuti angakhala kutali mabasa awo ampingo atsalakanwe.

⁶ Mpostolo Paulu afokotoza piwalo pya mpingo ninga pyakuphata basa pabodzi mwakubverana “mpaka kurikha mwa kufunana na ndzache.” (Aef. 4:16) Kufuna kwathu Yahova na ulambiri wandimomwene kusatikulumiza kubverana m’kuphedza basa ya kumwaza mphangwa na kumanga Nyumba za Umambo.

[Study Questions]

1. Kodi ndi ninji pidakwaniriswa m’kumanga Nyumba za Umambo, na ndi basa ipi yakuti iciripo?

2. Kodi tinakwanisa tani ife ene kuphedza basa ya kumanga Nyumba za Umambo?

3. Kodi ndi m’njira zipi zinango zakuti tingakwanise kupangiza ciphedzo cathu ku masasanyiro anewa?

4. Kodi tinakwanisa tani kuwangisa ale anacita khundu ya kumanga Nyumba za Umambo?

5. Kodi anakwanisa tani anyakumanga akuperekeka kupangiza kulinganira?

6. Kodi ndi ninji cinakwanirisika munabverana anthu onsene ali m’mpingo towera kuendesa kutsogolo ulambiri wandimomwene?