Kodi Muli Kuphatisira Basa Mabukhu A Cilongero Canu?

“Anthu azinji asakomerwa munatambira iwo mabukhu mu pilongero pyawo. Onani mafala mangasi a kupereka takhuta: Tikupereka takhuta na thangwi ya kutitumizira katsamba kakuti Kunenseka Konsene Kuli Duzi Na Kumala! (n’Cindau) Madzana a abale na alongo asakomerwa thangwi asakwanisa kuleri mabukhu akubuluswa mu Biblya mu cilongero cawo cene!” “Tiri kupereka takhuta kwa Yahova mu kutipasa cakudya cauzimu mu nzidzi wakuthema! Tiri akukomerwa na kubuluswa kwa mabruxura mu cilongero cathu cene! (n’Cilomwe)” “Tiri kupereka takhuta pabodzi na kulonga bweraniko...tikhadikhira kutomera kale! (n’Cindau)” “Tiri akukomerwa kakamwe mu kutambira bukhu yakuti Kodi Mwandimomwene Biblya Isapfunzisanji! (n’Citshwa)”

Kodi muli na pyakugumana napyo pyakukomeresa pyakulandana na thangwi ya kuleri mabukhu mu cilongero canu? Khala imwe nkhabe kwanisa kuleri mabukhu a cilongero canu, thangwi yanji nkhabe kubanza mwai wa xikola ya kulemba na kuleri inacitwa pa mpingo panu. Towera mugumane mphangwa za mafambisiro a xikola, dingani Nosso Ministério do Reino wa Janeiro wa 2002, tsamba 7.

Imwe munakwanisambo kukomerwa na kumwaza mphangwa na kupfunzisa anango akuti asalonga cilongero canu. M’bale m’bodzi adapfunza kuleri na kulemba kubulukira ku masasanyiro anewa alonga: “Ndiri kupereka takhuta kakamwe ku masasanyiro akupfunzisa anthu akupicepesa towera kuleri na kulemba! Mu midzidzi inango mukhagona ine na masiku, ndìkhapitiriza kupereka takhuta kwa Yahova kuti ndasiya kukhala munthu wakukhonda kuleri na kulemba mu dziko ino.” Inde, kutsanzaya kukulu kusabwera na kuleri mabukhu a cilongero cathu cene. Kodi muli kuaphatisira?