Balangazani Anyakutsukwala
1 Nkhabepo ndzidzi unango m’mbiri ya anthu wakuti ukhafunika kakamwe kubalangaza anango ninga lero. Mu kutowerera citsogolero ca Mambo wathu, Kristu Yezu, ife tisafunikambo kuwangisira towera “kubalangaza anyakutsukwala.”—Iza. 61:1.
2 Njira Yakupereka Cibalangazo: Towera kubalangaza anthu, utumiki wathu usafunika kudzindikirwa na maperekero umboni akulinganira na adidi. Munalonga ife pyakucita pyakuipa pya dziko na pipfunziso pyaunthawatawa, undimomwene wa Malemba na cidikhiro cadidi ca mapikiro akubalangaza a Mulungu pisafunika kugomezerwa pa kucedza kwathu. Pyenepi nee pisabveka kuti Harmagedoni nkhabe funika kulongwa tayu. Basa yathu ndi yakubvekesa “ndzidzi unapulumusa Mbuya mbumba yache” na ntsiku ya kutonga kwa Mulungu wathu, na towera kucenjeza munthu wakuipa kuti “asiye njira zache zakuipa.” Mbwenye, cenjezo ya Harmagedoni na mafokotozero a kufudza kunafuna kudzacita nkhondo ineyi nkhabe funika kuphimbira nsolo wa mphangwa zadidi za Umambo wa Mulungu tayu.—Iza. 61:2; Ezek. 3:18; Mat. 24:14.
3 Ku Nyumba Na Nyumba: Si pyacilendo tayu kugumana anthu akutsukwala thangwi ya kubva kupha, kufa kwa nyakufunika wawo, uipi, peno nyatwa za kobiri. Ninga akusangizira Kristu, ife ‘tisabvera ntsisi’ na tisapangiza n’khaliro wakukoma ntima kwa ale anagumana ife mu utumiki. (Luka 7:13; Arom. 12:15) Maseze tileri lemba ibodzi peno mawiri akulonga pya nyatwa ineyi, ife tisafunika kukhala ‘akuchimbizisa na kubva,’ mbiticitisa tenepa kuti munthu alonge mabvero ace. (Tgo. 1:19) Tingabvesera pakutoma, tinadzakhala akukwanisa kupereka cibalangazo cadidi.
4 Pa ndzidzi wakuthema nkati mwa kucedza, ife tingakwanise kulonga: “Ndisafuna kuona pabodzi na imwe mafala mangasi a kupasa cipapo anagumanika m’Biblya.” Tisafunika kuphatisira nzeru zadidi towera tikhonde kupokanya maonero onsene akuipa akuti munthu angakwanise kualonga. Mbuto mwace, cifuniro cathu cisafunika kukhala ca kupasa cipapo na cibalangazo mu kuphatisira Malemba towera kuwangisa ntima. M’pinthu pyenepi, imwe mungakwanise kuphatisira bukhu yakuti Raciocínios à Base das Escrituras tsamba 133-7 pantsi pa nsolo wakuti “Encorajamento.” Peno mungakwanise kupasa mwanaciro nyumba kopya ya katsamba kakuti Consolo Para os Deprimidos na kudinga mphangwa zakuwangisa zinagumanika mwenemu.
5 Sakani Miyai Towera Kubalangaza Anango: Kodi musadziwa nyakuendekana, nzanu wa kubasa, nzanu wa kuxikola, peno munthu unango wa m’banja wakuti asafuna cibalangazo? Thangwi yanji nkhabe kuwangisira towera kuenda kaona anthu anewa kunyumba kwawo na cifuno ca kuapasa cibalangazo cakubuluka m’Malemba? Kudziwa kuti thangwi yanji iwo asafuna cibalangazo, imwe mungakwanise kukhunganyika mwakubverana na n’khaliro unoyu. Towera kupereka cibalangazo ceneci, anango asalemba matsamba peno kumenya mitokodzi. Kufuna kwandimomwene nyakuendekana wathu kunadzaticitisa kukhala na ntsisi na kupasa cibalangazo cinafunika ca kubuluka m’Malemba.—Luka 10:25-37.
6 Inde, ife tapaswa basa ya kubalangaza ale anabulira, kupasa cipapo anthu akuti ali na mitima yakutsukwala na kupereka cidikhiro cadidi ca ntsogolo. Ceneci ndi cibalangazo cinafuna anthu mu dziko yonsene yapantsi. Kulonga mwakukomerwa pinthu pizinji pyadidi pidapikira Mulungu kunadzabweresa cibalangazo na cidikhiro kwa anthu a ntima wadidi. Ndzidzi onsene tendeni tikumbuke kufunika kwa kubalangaza anyakutsukwala.