Cipangizo Ca Cikhulupiro Cakuwanga!
1 Apostolo abvesera mwacidikhodikho pikhalonga Yezu pya kubwera kwace na mamalisiro a makhaliro a pinthu. Pinthu pyakudzudzumisa anthu mbipidacitika—nkhondo zizinji, kusoweka kwa cakudya, piteketeke na miliri. Patsogolo pace, Yezu alonga kuti atowereri ace mbadaidiwa, kuoneswa nyatwa, na kuphiwa. Aprofeta aunthawatawa mbadaoneka na kupeusa anthu azinji. Kufuna kwa anthu azinji kakamwe mbukudathowa.
2 Mwakusiyana na pyenepi, mphyakukwanisika kuti pikhali pyakugopesa kwa apostolo mu ndzidzi udalonga Yezu kuti mphangwa zadidi za Umambo wa Mulungu mbizidamwazwa pa dziko yonsene yapantsi. (Mat. 24:3-14) Lero ife tisaona kukwanirisika kwakudzumisa kwa profesiya ineyi yakukomeresa. Maseze tikukhala m’midzidzi yakugopswa, Mboni za Yahova mwaphinga zisamwaza mphangwa zadidi. Munathowa kufuna kwa anthu a dziko, kufuna kwathu kusathimizirika kakamwe. Maseze “anthu a mitundu yonsene” atiyide, ife tingakwanise kulonga kuti tisamwaza mphangwa kwa anthu a mitundu yonsene.
3 Ndi pyakuwangisa tani kudinga basa idacita Mboni za Yahova nkati mwa caka ca basa cidamala ninga pinapangizwa pa ndandanda pa tsamba 3 mpaka 6! M’piaka 16, yabvungwa midzidzi yakupiringana biliyau ibodzi m’basa yakumwaza mphangwa na kucita anyakupfunza. Ndi cipangizo tani ceneci ca cikhulupiro cakuwanga! Pakhala kuthimizirika kwa mapurusento 5.8 mu cilengeso ca apainiya, mapurusento 3.1 a amwazi mphangwa na mapurusento 4.4 a mapfunziro a Biblya. Ubatizo wathimizirika mapurusento 20.1 kupiringana caka ca basa cidamala. Ndi pyakukomeresa kuona kuti cifupi na mamiliyau manomwe a anthu akutumikira Yahova mwakukhulupirika—anthu azinji kakamwe cincino kupiringana ndzidzi unango onsene m’mbiri ya anthu! Munadinga imwe ndandanda, kodi ndi ninji cinaona imwe cakuti cisakuwangisani kakamwe?
4 Maseze cilengeso ceneci ndi cakudzumisa, ife nkhabe funika kuduwala kuti cilengeso ceneci cisaimirira anthu anapangiza cikhulupiro cawo. Dingani citsanzo cibodzi. Guillermo akula ku Bolivia. Iye abalwa caka 1935, na kutomera mu ndzidzi ukhali iye na piaka pipfemba basa yace ikhali ya kutceka miti ya coca. Kutomera uwana, iye akhatafuna masamba a coca towera kupungula nyatwa yakucita mabasa akuwanga. Mu kupita kwa ndzidzi atoma kumwa mwakupiringana n’dida na kufumali. Mudatoma iye kupfunza pinafuna Yahova kwa iye, Guillermo asiya kufumali na patsogolo pace aleka kumwa mwakupiringana n’dida. Nyatwa ikulu kakamwe idasala ikhali kusiya nsambo wace wakale kakamwe wa kutafuna masamba a coca. Iye aphembera mwaphinga na akwanisa kumalisa nsambo wace wakuipa. Pidamala iye kusiya misambo yace yakuipa, iye abatizwa. Iye asalonga: “Cincino ndisapibva kukhala wakucena na wakutsanzaya kakamwe.”
5 Mwandimomwene Yahova asatsalakana anthu. Cifuno cace ndi cakuti anthu onsene atcinyuke. (2 Ped. 3:9) Cifuno cathumbo ndi ceneci. Tendeni mphapo tisiye kuti mitima yathu itikulumize kucita pyonsene pinakwanisa ife towera tipitirize kuphedza anthu a ntima wadidi kuti adziwe na afune Yahova ninga pinacita ife.
[Study Questions]
1. Kodi ndi pinthu pipi pyakudzudzumisa pidalongweratu na Yezu?
2. Thangwi yanji ndi pyakudzumisa kulonga kuti mphangwa zadidi zikumwazwa pa dziko yonsene yapantsi?
3. Kodi ndi cilengeso cipi cakuwangisa cidaona imwe pa lipoti ya dziko yonsene yapantsi?
4. Kodi ndi nyatwa ipi idamalisa mamuna unango pikhafuna iye kubatizwa?
5. Kodi cifuno canu ndi cipi?