Perekani Umboni Wakukwana Thangwi ya Umambo wa Mulungu

1. Kodi ndi bukhu ipi inafuna kudzapfunzwa pa Pfunziro ya Bhibhlya ya Mpingo kutomera pa sumana inatoma pa ntsiku 14 ya nthanda ya Murope?

¹ Kutomera sumana inatoma pa ntsiku 14 ya nthanda ya Murope ya 2011, tinadzatoma kupfunza bukhu yakuti “Dê Testemunho Cabal” sobre o Reino de Deus pa Pfunziro ya Bhibhlya ya Mpingo. Bukhu ineyi isalonga pya bukhu ya Macitiro mu njira yakuti anyakuleri anakwanisa kukhala akutsanzaya na pyakucitika pidalembwa m’bukhu ineyi. Mbuto mwakudinga vesi ibodzi na ibodzi, bukhu yakuti Testemunho Cabal isapereka pipfunziso pyakubuluswa mu pyakucitika pya m’bukhu ya Macitiro na isatiphedza toera kuona kuti munthu m’bodzi na m’bodzi anakwanisa tani kuiphatisira.—Arom. 15:4.

2. Longani pinthu pingasi pinagumanika m’bukhu yakuti Testemunho Cabal.

² Pya Nkati mwa Bukhu: Mafala akutoma anagumanika pa tsamba 2 ndi tsamba ya ufuni yakubuluka kwa Mathubo Akutonga inalonga kuti iwo asafuna tiphindule kakamwe na bukhu ineyi. Kutomera pa nsolo 2, misolo inatowerera iri na mafala a cigwagwa analonga pya nsolo ubodzi na ubodzi, na Lemba idaikhiwa yakuti isapangiza khundu ya bukhu ya Macitiro inafuna kupfunzwa. Misolo mizinji iri na mphangwa m’mabokosi akuti asalonga pya makhaliro a anthu, zimbuto peno pyakucitika. Mbuto zikulu zidasiyiwa n’khundu-n’khundu mwa matsamba mazinji zinatiphedza kulemba pinthu pinafuna ife kunyerezera. M’bukhu yonsene muli na pitsanzo pyadidi kakamwe pya ndzidzi wa Bhibhlya toera kutiphedza kuona pyakucitika pyenepi pyakufunika, pontho pa tsamba yakumalisa pana ndandanda unafokotoza pinapangizwa mu pithunzithunzi pyakusiyana-siyana. Nkati mwa kapa yakutoma na yakumalisa musagumanika mapa akuti anatiphedza kuona maulendo adacita alambiri anzathu a pyaka dzana yakutoma mudatoma iwo kumwaza mphangwa zadidi mpaka “ku nkhomo ya madziko onsene.”—Mach. 1:8.

3. Kodi ndi mibvunzo ipi yakufunika inafuna kudzatawirwa pa kupfunza kwathu bukhu ya Macitiro?

³ Matawiro a Mibvunzo Yakufunika: Kupfunza bukhu ya Macitiro kunadzatiphedza toera kugumana matawiro a mibvunzo yakufunika inalonga pya utumiki Wacikristu. Mwacitsanzo, ndi basa ipi na ndi mphangwa zipi zinadzindikirisa atowereri andimomwene a Yezu Kristu? Mbani asatsogolera basa ineyi ya kumwaza mphangwa mu dziko yonsene yapantsi, na asaitsogolera tani? Kodi kutcingwa pabodzi na mipingizo kusabweresa miyai ipi kwa atumiki? Kodi ndi basa ipi inacitwa na nzimu wakucena mu utumiki wathu?

4. Kodi tinaphindula tani mwakukwana pa kupfunza bukhu ya Macitiro?

⁴ Toera kuphindula kakamwe, pfunzani mwanyapantsi mphangwa zenezi na khunganyikani toera kupereka matawiro pa Pfunziro ya Bhibhlya ya Mpingo. Gumanikani pa misonkhano yonsene, na nyerezerani kuti munaphatisira tani mphangwa zenezi mu utumiki wanu. Kupfunza kwathu bukhu ineyi yakutsanzayisa kunadzaticitisa kupereka umboni wakukwana thangwi ya Umambo wa Mulungu!—Mach. 28:23, Mphangwa Zadidi.