N’khaliro Wakufunika Kakamwe wa Mpfundzisi Wadidi

1. Ndi n’khaliro upi wakufunika kakamwe wa mpfundzisi wadidi?

¹ Ndi n’khaliro upi wakufunika kakamwe usacitisa munthu kukhala mpfundzisi wadidi wa Bhibhlya? Mapfundziro a xikola ya kudziko? Pyakutambwa? Luso yacibaliro? Mwandimomwene, ndi n’khaliro ubodzi ene wakukwanirisika kwa Mwambo, wakuti usadzindikirisa anyakupfundza a Yezu, pontho ndi n’khaliro wa mphambvu kakamwe na wakutsandzayisa wa Yahova. (Jwau 13:35; Agal. 5:14; 1 Jwau 4:8) N’khaliro unoyu ndi ufuni. Apfundzisi adidi asapangiza ufuni.

2. Thangwi yanji mphyakufunika kwa ife kufuna anthu?

² Funani Anthu: Mpfundzisi Wankulu, Yezu, apangiza ufuni kuna anthu, pyenepi pyakulumiza anthu anewa toera kumbvesera. (Luka 5:12, 13; Jwau 13:1; 15:13) Tingatsalakana anthu, tinadzabandza mwai onsene toera kupereka umboni. Mipingizo ninga kutcingwa peno kugumana anthu akuti nee asafuna kubva mphangwa zathu nee kunadzatifewesa manungo. Tinadzapangiza cifuno cathu kwa ale anamwazira ife mphangwa na tinadzacinja maperekero athu aumboni toera abverane na pinthu pinaadzudzumisa. Tinadzafuna kukhala na ndzidzi tayu basi ene tingakhala na nyakupfundza Bhibhlya m’bodzi na m’bodzi mbwenye tinadzakhalambo na ndzidzi toera kukhunganyika pfundziro ibodzi na ibodzi mwanyapantsi.

3. Kufuna undimomwene wa Bhibhlya kunadzatiphedza tani mu utumiki?

³ Funani Undimomwene wa Bhibhlya: Yezu afunambo undimomwene wa Bhibhlya, pontho auona kukhala ninga mpfuma. (Mat. 13:52) Khala tisafuna undimomwene, tinadzalonga mwakugalamuka, pyenepi pinakwanisa kukomeresa anyakutibvesera. Ufuni unoyu unadzatiphedza toera kugomezera kufunika kwa mphangwa zinagawira ife mbuto mwakudzudzumika na kusowa kwathu luso mu utumiki, pyenepi pinadzaticitisa kukhonda gopa mu utumiki.

4. Tinakulisa tani ufuni?

⁴ Kulisani Ufuni: Tinakulisa tani ufuni wathu kwa anthu? Mu kunyerezera ufuni unapangiza Yahova na wa Mwanace, mbatinyerezerambo makhaliro akukhonda khala na cidikhiro a anthu a mu cisa cathu. (Mko. 6:34; 1 Jwau 4:10, 11) Kufuna kwathu undimomwene wa Bhibhlya kunadzathimizirika kubulukira ku pfundziro yakukhonda phonya ya munthu paekha na kunyerezera mwacidikhodikho. Ufuni usacita khundu ya makhaliro a nsapo wa nzimu. (Agal. 5:22) Natenepa tinakwanisa kudembetera kuna Yahova toera atipase nzimu wakucena, pontho kuti atiphedze toera kukulisa ufuni. (Luka 11:13; 1 Jwau 5:14) Mwakukhonda tsalakana mapfundziro athu a xikola ya kudziko, ndzidzi uli na ife mu undimomwene, maluso acibaliro, tinakwanisa kukhala apfundzisi akuphindulisa a Bhibhlya mu kupangiza ufuni.