Tsamba Yakubuluka Kwa Mathubo Akutonga

Andzathu A Mboni Za Yahova Akufunika:

Tiri akukomerwa kukulemberani imwe atumiki akukhulupirika a Yahova, akuti cincino numero ikupiringana mamiliyau manomwe. Mungagumanikana na nyakukhulupirika ndzanu wakubuluka ku dziko inango, mu ndzidzi ubodzi ene musabva ufuni wakuphatana na munthu unoyu mu njira yakupambulika. (Jwau 13:34, 35) Mwakukhonda penula, munaleri imwe Anuário wa 2012, pyakucitika pyakuwangisa pya cikhulupiro na kukhulupirika kwa abale na alongo m’madziko akusiyanasiyana pinadzakucitisani pontho kubva kuphatana kweneku kwakupambulika.

Malipoti akubuluka ku madziko onsene asapangiza kuti azinji mwa imwe ali na programu ya Kulambira kwa Banja mwakukhonda phonya. Ale akuti ali na anapiana asathambaruka mu kuphatisira njira zakutsandzayisa toera kucitisa ana awo ang’ono kufunisisa kupfundza. (Aef. 6:4) Anyakumanga banja asawangisana mu ndzidzi unapfundza iwo pabodzi pene. (Aef. 5:28-33) Mwandimomwene, mabanja pabodzi na munthu paekha asaphindula kubulukira ku masasanyiro anewa akupfundza mwacidikhodikho Mafala a Mulungu.—Yos. 1:8, 9.

Ife tisabvera ntsisi imwe monsene mudagwerwa na pidengwa pyacibaliro. Natenepa, tikupereka takhuta kuna ale onsene akuti mwakukhonda kunyinyirika awangisira toera kupereka ciphedzo m’midzidzi ineyi ya pidengwa. (Mach. 11:28-30; Agal. 6:9, 10) Kusiyapo pyenepi, m’mpingo ubodzi na ubodzi musagumanika abale akuti asadzindikira pyakusowa pya anango, mbacita pinakwanisa iwo toera kuaphedza. Ninga Tabita peno Dorika, imwe mukucita ‘pinthu pyadidi pizinji, musapasambo atcerengi.’ (Mach. 9:36) Khalani na cinyindiro cakuti Yahova asaona pyenepi, pontho iye anadzakubwezerani mwakubverana na pyenepi.—Mat. 6:3, 4. 

M’madziko anango, ufulu wanu ukupondererwa na ale anakhazikisa mitemo toera kuthabusa anango mwakusowa thangwi. (Sal. 94:20-22, Tradução do Novo Mundo) Kudziwa kuti Yezu alonga kale kutcingwa kweneku, imwe mukupirira mwacipapo mbamusaka Yahova ninga pakuthawira panu. (Jwau 15:19, 20) Abale athu akufunika, khalani na cinyindiro cakuti ife tisakuphatanizani m’maphembero athu ndzidzi onsene munapitiriza imwe ‘kukhala dzololo toera kutawira ale anakubvundzani pya cikhulupiro canu.’—1 Ped. 3:13-15.

Tikusimba na ntima onsene pikwi na pikwi pya abale na alongo akuti akupitiriza m’makhaliro akucena caka na caka maseze ndzidzi onsene Sathani asakulumiza makhaliro aulukwali. Mu ndzidzi wakuti midida ya makhaliro a dziko ikutekera kakamwe, imwe ‘mukuwangiswa kakamwe na mphambvu zikulu za Mbuya.’ (Aef. 6:10) Imwe ‘musabvala pida pya Mulungu,’ natenepa muli dzololo toera kuthimbana na ‘manyengerero a Dyabo.’ (Aef. 6:11, 12) Dziwani kuti Yahova akuphatisira citsandzo canu toera kupereka ntawiro wakukwana kuna nyakunxola, Sathani!—Mis. 27:11.

Tatsandzaya kudziwa kuti mu caka 2011, agumanika pa Cikumbuso ca kufa kwa Mbuya wathu anthu akukwana 19.374.737. Numero ineyi ikulu kakamwe yakwanisika thangwi yakutawira kwanu na ntima onsene phembo yakutumikira ninga apainiya akuphedza mu nthanda ya Bwinja. Pikwi na pikwi pya anthu mu dziko yonsene akwanisa kubva nkhuwo wakuphatana wakusimba Yahova wakubuluka kwa Mboni zace zakukhulupirika! (Arom. 10:18) Khala ndimwe m’bodzi mwa anthu akukwana 2.657.377 adatumikira ninga apainiya akuphedza mu nthanda ineyi peno mwawangisira toera kuthimizira basa yanu mu njira zakusiyanasiyana, monsene mwacitisa Mathubo Akutonga kutsandzaya kakamwe thangwi yakupangiza kwanu nzimu wakufunisisa na phinga m’basa ineyi.—Sal. 110:3; Akol. 3:23.

Caka cidamala, anthu apswa akukwana 263.131 apangiza kuperekeka kwawo kwa Yahova. Tikupereka takhuta kuna Yahova thangwi ya pyenepi, tikuperekambo takhuta kwa imwe monsene munacita khundu pabodzi na ife mu kucemera anango: ‘Bwerani! Munthu angabva, alonge: bwerani! Munthu ana nyota mbabwere; ule anafuna atambire pezi madzi a moyo.’ (Apok. 22:17) Makamaka pakumala kudinga makhundu a Umambo wakukhazikiswa wa Mulungu pa nsonkhano wa gawo wa 2011, cincino tisalonga na cinyindiro consene kupiringana kale kuti, “Umambo wa Mulungu Mbudze!” Mu kuwangiswa na mafala a Yezu akupasa cinyindiro akuti ‘ndiri kudza mwakucimbiza,’ ife na ntima onsene tisagumanyiza mafala athu pabodzi na ntawiro wa mpostolo Jwau: “Amem. Bwerani Mbuya Yezu.”—Apok. 22:20.

Munapitiriza imwe kukhala akuyang’anira toera kuona pyakucitika pyakutsandzayisa, taphata miyendo khalani na cinyindiro cakuti ife tisafuna m’bodzi na m’bodzi wa imwe abale na alongo akufunika, akuti akupangiza ufuni wawo kwa Yahova ‘m’mabasa na mu udidi [undimomwene]!’—1 Jwau 3:18.

Abale anu,

Mathubo Akutonga a Mboni za Yahova