Njira Zitatu Toera Kuthimizira Kupfundzisa Kwanu
1. Thangwi yanji tisafunika kusaka kuthimizira kupfundzisa kwathu?
1 Amwazi mphangwa onsene ndi apfundzisi. Mwakukhonda tsalakana khala tikucita ulendo wakutoma, ulendo wakubwereza toera kukulisa cifuno, peno tikucitisa pfundziro ya Bhibhlya, mu kucita pyenepi ife tikupereka mphangwa. Mphangwa zinapfundzisa ife nee ndi zakupambulika. Tikumwaza ceza ca ‘mabukhu akucena,’ cakuti cinacitisa anthu kukhala na ‘ndzeru toera kupulumuka.’ (2 Tim. 3:15) Ndi mwai wakudzumisa tani! Tinadinga njira zitatu toera kuthimizira kupfundzisa kwathu.
2. Tinakwanisa tani kupfundzisa mu njira yakukhonda nentsa kubvesesa?
2 Mwakukhonda nentsa kubvesesa: Tingadziwa mwadidi mphangwa zinafuna pfundzisa ife, pinakhala pyakukhonda nentsa kunyerezera kuti mphangwa zenezi ndi zakunentsa kwa munthu wakuti nkhabe kuzidziwa. Na thangwi ineyi, pakucitisa pfundziro ya Bhibhlya, lekani kuthimizira mphangwa zizinji zakusowa basa. Mbwenye gomezerani ntsonga zakufunika. Kulonga pizinji nee kusabveka kuti ndi kupfundzisa kwadidi. (Mis. 10:19) Kazinji kene mphyadidi kuleri malemba akufunika basi. Pakumala kuleri lemba, fokotozani basi ene mphangwa zinabverana na nsolo unadinga imwe. Nkhani ya Paphiri, idalembwa pa Mateo kapitulu 5 mpaka 7, iri na undimomwene wakuzika kakamwe, mbwenye Yezu aupfundzisa mu njira yakukhonda nentsa, pontho m’mafala akucepa akusankhulwa mwadidi.
3. Misangani isaphedza tani, kazinji kene ndi ntundu upi wa misangani inaphindulisa kakamwe?
3 Misangani: Misangani isalamusa manyerezero, isakhuya mabvero, pontho isaphedza toera kukumbukira. Lekani kunyerezera kuti musafunika kukhala munthu wanthabwalabwa toera kulonga misangani yadidi. Yezu kazinji kene akhaphatisira misangani yakubvira, na yakukhonda nentsa kubvesesa. (Mat. 7:3-5; 18:2-4) Kulemba pithundzithundzi pa tsamba pinakwanisa kukhala pyakuphedza kakamwe. Kukhunganyika mwadidi kunadzakuphedzani kunyerezera misangani yakuphata basa.
4. Tinakwanisa tani kuphatisira mibvundzo mwakuphindulisa?
4 Mibvundzo: Mibvundzo isacitisa nyakupfundza Bhibhlya kunyerezera. Natenepa, pakumala kuncita mbvundzo ndikhireni atawire. Mungacimbiza kuutawira mwekhene, mwandimomwene nee munadzadziwa kuti ndi pinthu pipi pisabvesesa iye mwadidi. Khala nyakupfundza Bhibhlya atawira mwakudodomeka, mbuto mwakulungamisa ntawiro wace, mphyadidi kucita mibvundzo inango toera afike pakudzindikira ntawiro wadidi. (Mat. 17:24-27) Mwandimomwene nkhabepo mwa ife apfundzisi aungwiro. Natenepa, Bhibhlya isatikulumiza toera kucita mpholemphole na mapfundzisiro athu. Tingacita tenepa pinadzabweresa maphindu a kwenda na kwenda kwa ife na kwa ale anatibvesera.—1 Tim. 4:16.