Njira Zixanu Toera Kugumana Pfundziro Ya Bhibhlya
1. Khala mu cisa cathu ndi kwakunentsa kukhala na pfundziro ya Bhibhlya, tisafunika kucitanji, na thangwi yanji?
1 Musaona kukhala kwakunentsa kugumana munthu toera kupfundza naye Bhibhlya? Pitirizani kusaka. Yahova asapasa nkhombo ale anacita cifuno cace nee kubwerera nduli. (Agal. 6:9) Pantsi apa pasagumanika maonero maxanu toera kukuphedzani.
2. Tinaphatisira tani mbvundzo toera kutomesa pfundziro?
2 Abvundzeni Khala Asafuna Kupfundza Bhibhlya: Anthu azinji asadziwa kuti tisagawira A Sentinela na Despertai!, mbwenye panango iwo nee asadziwa kuti tisagawira mapfundziro a Bhibhlya. Pakucita utumiki wa nyumba na nyumba, thangwi yanji nkhabe kuabvundza khala asafuna kupfundza Bhibhlya? Munakwanisambo kubvundza anthu anapangiza cifuno anacitira imwe maulendo akubwereza khala asafuna kupfundza Bhibhlya. Angakhonda, munakwanisa kupitiriza kuagawira mabukhu na kukulisa cifuno cawo. Mu pyaka pizinji m’bale m’bodzi akhacita maulendo akubwereza kwa banja ibodzi ikhagawira iye marevista mwakukhonda phonya. Pakumala kuapasa marevista mapswa, iye azungunuka toera kuenda mbwenye anyerezera kucita mbvundzo: “Musafuna kupfundza Bhibhlya?” Mwakukhonda dikhira iwo atawira kuti inde. Cincino iwo ndi akubatizwa.
3. Tisafunika kunyerezera kuti ale anagumanika pa misonkhano asapfundza kale Bhibhlya na anthu anango? Fokotozani.
3 Bvundzani Ale Anagumanika Pa Misonkhano: Lekani kunyerezera kuti anthu anapangiza cifuno anaona imwe pa misonkhano ya mpingo ali kupfundza Bhibhlya. M’bale m’bodzi alonga: “Anyakupfundza Bhibhlya azinji ali na ine ndatoma kucedza nawo pa misonkhano ya mpingo.” Mulongo m’bodzi atonga kulonga na nkazi unango wamanyadzo kakamwe wakuti mwanace akhali mulongo wakubatizwa m’mpingo. Nkazi unoyu akhagumanika pa misonkhano mu pyaka 15, ndzidzi onsene iye akhabwera mbapita mu Nyumba ya Umambo pakutoma kwa misonkhano na akhabuluka mwakucimbiza pakumala kwa misonkhano. Nkazi unoyu atawira pfundziro ya Bhibhlya, pakumalisira apita mu undimomwene. Mulongo alemba: “Ndisatsumbika kakamwe thangwi ndadikhira pyaka 15 toera kumbvundza khala akhafuna kupfundza Bhibhlya!”
4. Tinagumana tani pfundziro kubulukira mu kubvundzisa?
4 Kubvundzisa: Mulongo m’bodzi asawangisira kuperekera anango ku mapfundziro awo a Bhibhlya. Mu kutawiriswa na nyakucitisa pfundziro, pakumala kwa pfundziro mulongo asabvundzisa nyakupfundza khala asadziwa anthu anango akuti asafunambo kupfundza Bhibhlya. Pakugawira bukhu Biblya Isapfunzisanji kwa munthu anacitira imwe maulendo akubwereza, munakwanisa kubvundzisa: “Alipo anadziwa imwe wakuti mbadafunambo bukhu iyi?” M’midzidzi inango, makhaliro nee asatawirisa kuti amwazi mphangwa na apainiya acitise pfundziro kwa munthu anagumana iwo mu utumiki. Natenepa, dziwisani andzanu kuti muli dzololo toera kucitisa pfundziro ya Bhibhlya.
5. Thangwi yanji tisafunika kubvundzisa anyakumanga banja akukhonda khulupira khala asafuna kupfundza Bhibhlya?
5 Anyakumanga Banja Akukhonda Khulupira: M’mpingo mwanu musagumanika amwazi mphangwa akuti ndi anyakumanga banja na munthu wakukhonda khulupira? Anyakukhonda khulupira anango nkhabe funa kulonga pya Bhibhlya na akazawo peno amunawo Acikristu, mbwenye mbadatawira kupfundza Bhibhlya na munthu unango wakuti nee ndi wa banja ibodzi ene. Kazinji kene mphyadidi kutoma bvundza m’bale peno mulongo mbamudzati kucedza na mamunace peno nkazace wakukhonda khulupira toera kuona njira yadidi yakucedza naye.
6. Kodi phembero ndi yakufunika tani pakusaka pfundziro?
6 Phembero: Lekani kupwaza mphambvu ya phembero. (Tgo. 5:16) Yahova asapikira kubvesera maphembo athu khala ndi akubverana na cifuno cace. (1 Jwau 5:14) M’bale m’bodzi wakuti akhali na ndandanda wakudzala na basa atoma kuphembera toera kukhala na pfundziro ya Bhibhlya. Nkazace akhanyerezera kuti iye nee mbadakhala na ndzidzi toera kutsalakana nyakupfundza, makamaka nyakupfundza angakhala na nyatwa zizinji. Natenepa, mulongo alonga pinthu pyenepi kwa Yahova pakucita phembero toera mamunace agumane pfundziro. Maphembero awo atawirwa nkati mwa masumana mawiri pa ndzidzi wakuti mpainiya m’bodzi m’mpingo agumana mamuna wakuti akhafuna kupfundza Bhibhlya, mpainiya apereka pfundziro ineyi kuna m’bale. Nkazace alemba: “Kwa munthu onsene ananyerezera kuti kucitisa pfundziro ya Bhibhlya mbukudakhala kwakunentsa kakamwe kwa iye, ndikulonga: Pakucita phembero longani pinthu pyenepi, pontho lekani kusiya kuphembera thangwi ya pyenepi. Tiri akutsandzaya kakamwe kupiringana mukhanyerezera ine.” Mungapitiriza kupirira, munakwanisambo kugumana pfundziro ya Bhibhlya, mbamukhala wakutsandzaya thangwi yakuphedza munthu toera kugumana “njira ya kwenda ku moyo.”—Mat. 7:13, 14.