Kumwaza Mphangwa Mwacipapo—Mphangwa izi zabuluswa mu Anuário das Testemunhas de Jeová de 2013
Tsamba 49 ndima 1-6—Afrika
“Pangiza M’Bhibhlya Kuti Iye Adodomeka”
Janet, mpainiya wa ndzidzi onsene wa dziko ya Ghana, iye akhaleri bukhu Biblya Isapfunzisanji mukhacita iye ulendo m’maxibombo. Nyakumwaza mphangwa wa uphemberi ubodzi akwirambo m’maxibombo, mbatoma kumwaza mphangwa, buluka penepo aphemba kobiri thangwi ya utumiki wace. Janet ampanga: “Imwe mwalonga kuti Yezu na Mulungu ndi m’bodzi ene. Khala ndi tenepo mbani adalonga na Yezu pa ndzidzi udabatizwa iye?”
Nyakumwaza mphangwa wa uphemberi atawira, “Pyenepi nkhabe kudziwika.”
Janet afungula kapitulo 4 ya bukhu Biblya Isapfunzisanji, asankhula malemba mangasi, mbaphemba anthu anango akhali m’maxibombo toera kuleri. Iye afokotoza kusiyana pakati pa Yezu na Mulungu wa Mphambvu Zonsene, Yahova.
Nyakumwaza mphangwa wa uphemberi alonga, “Iwe ndiwe nfiti.”
Pa ndzidzi unoyu anango akhali m’maxibombo acinjiriza Janet mbalonga kuna nyakumwaza mphangwa wa uphemberi kuti, “Iwe usafunika kupangiza m’Bhibhlya kuti iye adodomeka mbuto mwakuncemera nfiti.” Nyakumwaza mphangwa wa uphemberi aipirwa kakamwe, mbatcita m’maxibombo. Ntsikana m’bodzi akakhala pabodzi na Janet alonga: “Ine ndikhanyerezera kuti Yahova ndi dzina ya nyumba ya uphemberi ya Amboni. Nee ndikhadziwa kuti ndi dzina ya Mulungu, ndadziwa pyenepi thangwi yakucedza kwanu na nyakumwaza mphangwa ule wa uphemberi.”
Iwo apitiriza kucedza, Janet aphemba numero ya ntokodzi wa ntsikana unoyu mbalonga kuti anapita n’cibverano na iye. Mudafika ntsikana unoyu kunyumba, iye alonga pidacitika kuna yavu wace wankazi. Yavu wace adzumatirwa mudabva iye kuti Mulungu dzinace ndi Yahova. Mu kupita kwa ndzidzi Janet acita masasanyiro toera ntsikana unoyu na yavu wace apitirize kupfundza Bhibhlya. Cincino iwo asagumanika pa misonkhano.
Tsamba 69 ndima 1, mpaka tsamba 70 ndima 2—Ukraniya
“Ndaphata Miyendo Pitiriza Tepo”
Valya, mulongo wa pyaka 15 wa ku Ukraniya, adzindikira kuti mpfundzisi wace wankazi abvala nguwo zakupswipa, pontho akhali wakutsukwala. Mudadziwa iye kuti aferwa na mai wace, Valya am’balangaza mukuphatisira malemba analonga pya kulamuswa kwa akufa. Valya akwata Bhibhlya na mabruxura mawiri, O Que Acontece Conosco Quando Morremos? na Angafa Munthu Anafuna Imwe, mbatonga kuti pakumala kupfundza iye anaenda kacedza na mpfundzisi wace. Valya alonga: “Mu ndzidzi ukhadikhira ine mpfundzisi wanga pa nsuwo wa ofesi ya apfundzisi, ndikhagopa kakamwe, mbandiphembera kwa Yahova toera adiphedze.”
Mudapita Valya mu ofesi, mpfundzisi abvundza, “Usafunanji?”
“Ndanyerezera kuti panango musafuna munthu toera kucedza naye. Ndisadziwa kuti musapibva tani. Mu pyaka pingasi pidapita ndaluza yavu wanga wamamuna.”
Mpfundzisi akhuyiwa na citsalakano ca Valya. Iye alonga mbakalira kuti nee acibale ace nee apfundzisi andzace apangiza citsalakano ceneci. Buluka penepo, Valya aleri na kufokotoza Apokalipse 21:3, 4, pakumala mpfundzisi atambira mabruxura mbalonga, “Iwe ndiwe wakusiyana na apfundzi anango.”
Valya alonga, “Ine ndisawangisira toera kuleri Bhibhlya na kuphatisira pinapfundza ine, pontho ndisabvera anyakubalanga.”
Mu kupita kwa ndzidzi Valya apasa mpfundzisi Bhibhlya na bukhu Biblya Isapfunzisanji idaphemba iye. Mpfundzisi apereka pontho takhuta mbalonga kuna Valya kuti: “Uphemberi wako ndi wandimomwene, iwe uli na anyakubala adidi akuti asakupfundzisa pinthu pyadidi. Ndaphata miyendo pitiriza tepo.”