Towezerani Citsandzo Ca Aprofeta—Ozeya
1. Ndi mbvundzo upi wakuti panango mwabvundzika kale mwekhene?
1 ‘Kodi ndi kuwangisira kupi kunafuna ine kucita kuna Yahova?’ Panango mwabvundzika mbvundzo unoyu mu ndzidzi unanyerezera imwe mwacidikhodikho kukula kwa udidi na ntsisi za Yahova. (Sal. 103:2-4; 116:12) Mwakufunisisa, Ozeya acita pidaphembwa iye na Yahova, ngakhale kuti akhafunika kuwangisira kakamwe. Tinatowezera tani citsandzo ca Ozeya?
2. Tinatowezera tani citsandzo cadidi ca Ozeya mu kupirira m’basa yakumwaza mphangwa?
2 Kumwaza Mphangwa mu Ndzidzi Wakunentsa: Mphangwa za Ozeya zikhali makamaka kwa madzindza nkumi a umambo wa Israele, kwakuti ulambiri wandimomwene ukhali cifupi na kufudzwa. Mambo Yeroboamu II acita pinthu pyakuipa pa maso pa Yahova mbapitiriza kulambira dzimunthu ya mwana wang’ombe, ulambiri udatomeswa na Yeroboamu I. (2 Am. 14:23, 24) Amambo anewa apitiriza kufudza makhaliro auzimu a madzindza khumi a umambo mpaka kufudzwa kwawo mu caka 740 M.N.W. Mwakukhonda kutsalakana, kukula kwa uphemberi waunthawatawa, Ozeya atumikira mwakukhulupirika ninga mprofeta mu pyaka cifupi 59. Kodi tisatongambo kumwaza mphangwa caka na caka, ngakhale tisathimbana na kukhonda kwa anthu peno mipingizo?—2 Tim. 4:2, Tradução do Novo Mundo.
3. Kodi umaso wa Ozeya wapangiza tani ntsisi za Yahova?
3 Nyerezerani Ntsisi za Yahova: Yahova apanga Ozeya toera kumanga banja na “nkazi wa upombo.” (Oze. 1:2) Ngakhale kuti nkazi wace, Gomere, abala naye mwana wa mamuna, mu kupita kwa ndzidzi, Gomere acita upombo mbabala ana awiri. Kufunisisa kwa Ozeya kulekerera nkazi wace kusapangiza ntsisi zikulu za Yahova kwa Aisraele pa ndzidzi udatcinyuka iwo. (Oze. 3:1; Arom. 9:22-26) Kodi tisafunisisa kuikha pakhundu pifuno pyathu toera kubvekesa ntsisi za Yahova kwa anthu a madzindza onsene?—1 Akor. 9:19-23.
4. Ndi kuwangisira kupi kwakuti tinakwanisa kukucita kwa Yahova?
4 Atumiki anango a Yahova asiya mabasa akulipa kobiri izinji toera kuphatisira ndzidzi uzinji mu utumiki. Anango asapitiriza nee kumanga banja peno kukhonda khala na ana toera kuikha pa mbuto yakutoma pifuno pya Umambo. Tingadinga umaso wa Ozeya, panango tinakwanisa kunyerezera tekhene, ‘Cipo mbindidakwanisa kucita ninga pidacita iye.’ Natenepa, munapitiriza ife kuthimizira kupereka takhuta thangwi ya udidi wakukhonda kutithema wa Yahova mbatinyindira nzimu wace wakucena toera kutiwangisa, tinakwanisa kuphatisirwa na iye mu njira zakuti cipo tazinyerezera kuti zinakwanisika, ninga pidacitikira Ozeya.—Mat. 19:26; Afil. 2:13.