Pfundzisani Ananu Toera Akhale Atumiki
1. Kodi lemba ya Masalmo 148:12, 13 isakulumiza anyakubala Acikristu toera kucitanji?
1 Yahova asacemera aphale na atsikana toera ansimbe. (Sal. 148:12, 13) Natenepa, anyakubala Acikristu, asacita pizinji kupiringana kupfundzisa anawo undimomwene wa Bhibhlya na miyambo ya makhaliro adidi a Mulungu. Iwombo asapfundzisa anawo toera kukhala atumiki a mphangwa zadidi. Kodi pyenepi pinacitwa tani mwakwenda kutsogolo?
2. Kodi citsandzo cadidi ca anyakubala cinakhuya tani anawo?
2 Citsanzo Cadidi: Ntongi Gedheoni alonga kwa amuna ace akukwana 300: “Pinadzandiona imwe mbandichita, chitanimbo sawasawa.” (Atongi 7:17) Mwacibaliro ana asaona na asasangizira anyakubalawo. Baba m’bodzi asaphata basa namasiku, mbwenye n’Sabudu namacibese, mbuto mwa kwenda kagona angafika ku nyumba, iye asakwata anace mbaenda mu utumiki maseze iye ali wakuneta kakamwe. Mwakukhonda kulonga, iye asapfundzisa anace kuti utumiki usafunika kuikhwa pa mbuto yakutoma. (Mat. 6:33) Kodi ananu asaona kutsandzaya kwanu m’mabasa akusiyana-siyana a ulambiri, ninga kuphembera, kuleri Bhibhlya, kutawira pa misonkhano na kumwaza mphangwa? Mwandimomwene, imwe nee munadzakwanisa kukhala citsandzo caungwiro. Mbwenye ananu anadzakhala na cipendamiro cikulu cakutawira kuwangisira kwanu kuapfundzisa toera kulambira Yahova khala iwo asaona phinga yanu yakutumikira Yahova.—Deut. 6:6, 7; Arom. 2:21, 22.
3. Kodi ndi pifuno pipi pyauzimu pyakuenda kutsogolo pinafunika anyakubala kuphedza anawo toera kukhala napyo na kupifikira?
3 Pifuno Pyakuenda Kutsogolo: Mwakukhonda neta anyakubala asapfundzisa anawo kufamba, kulonga, kubvala okhene na pinthu pinango pyakusiyana-siyana. Ana angafikira cifuno ceneci, anyakubala asaaikhira pifuno pipswa. Khala anyakubala ndi Akristu, iwo asaphedzambo anawo kusaka na kufikira pifuno pyauzimu mwakubverana na thunga yawo pabodzi na maluso awo. (1 Akor. 9:26) Kodi musapfundzisa ananu toera kutawira m’mafala awo na kukhunganya okhene nkhani zawo pa Xikola Ya Utumiki Wa Mulungu? (Sal. 35:18) Kodi musaapfundzisa kucita utumiki mu njira zakusiyana-siyana? Kodi musaikha patsogolo pawo cifuno ca kubatizwa na cakupita m’basa ya ndzidzi onsene? Kodi musaaphedza kukhala na amwazi mphangwa aphinga na akutsandzaya akuti anadzakwanisa kuawangisa?—Mis. 13:20.
4. Kodi ana asaphindula tani mu kukhala na anyakubala akuti asaapfundzisa mu utumiki kutomera pa uwana wawo?
4 Nyamasalmo alonga: “Mulungu, mwandipfundzisa kutomera uwana wanga; ine mpaka lero ndiri kudziwisa pirengo pyanu.” (Sal. 71:17) Tomani kupfundzisa ananu pa uwana wawo toera akhale atumiki. Phata yauzimu yakuti musaaphedza kukulisa mwandimomwene inadzaaphindulisa kakamwe angadzakula!—Mis. 22:6.