Ife Cipo Tiri Tekha—Mphangwa izi zabuluswa mu Anuário das Testemunhas de Jeová de 2013 — BHIBHLIYOTEKA MU INTERNETI ya Torre de Vigia

Ife Cipo Tiri Tekha—Mphangwa izi zabuluswa mu Anuário das Testemunhas de Jeová de 2013

Tsamba 47 ndima 3, mpaka 48 ndima—2Afrika

Akhamwaza Mphangwa Ekhene ku Cisa Cakutali

David wa ku Kenya, atoma kupfundza Bhibhlya na Mboni za Yahova pikhakhala iye mu nzinda kutali na kunyumba kwace. Mbwenye mu ndzidzi wakucepa, iye abwerera kunyumba kwace, ku Lokichar, cisa cakutali na nzinda kunkwiriro kwa dziko ya Kenya. Mpingo wa cifupi kakamwe ukhagumanika pa nsindzo wa makilometru akukwana 160 mu nzinda wa Lodwar. Mu pyaka pinai, David nee aonana kazinji kene na Mboni za Yahova, mbwenye iye akhamwaza mphangwa kwa anyakuendekana ace na acibale ace, mu kulonga pinthu pidapfundza iye mu ndzidzi wakucepa udapfundza iye Bhibhlya. Anango apangiza cifuno, mu ndzidzi wakucepa, iye akhacitisa mapfundziro a Bhibhlya mazinji. Mu caka 2007, iye apita n’cibverano na abale a ku Lodwar, atoma pontho kupfundza Bhibhlya mbakacita ulendo kawiri pa nthanda mu kuphatisira ndhudhudhu, na motokala.

Mukhapitiriza iye kupfundza, phinga yace mu utumiki ikhathimizirika. Maseze akhadzati batizwa, David amanga “Nyumba ya Umambo” ya mapfupfu a dongo na ntsoi ya maudzu cifupi na nyumba yace toera kuiphatisira mu ndzidzi wakucepa, mbasonkhana mwenemu na ale akhapangiza cifuno. Mbwenye anthu azinji pacisa nee akhakomerwa na basa yace yakumwaza mphangwa, mu pyaka piwiri iye akhatikanwa na kumenywa. Ntsiku inango, anthu ampambizira kuti iye akhabweresa “ulambiri wa Dyabo” pacisa, natenepa iwo am’menya mpaka kukomoka. Mbwenye pakumala kusaka ciphedzo ca utongi pa luwani, David nee akhathabuswabve, mbapitiriza kumwaza mphangwa. David alonga, “undimomwene ndi umaso wanga.” “Nkhabe cinthu cibodzi cinafuna kundipingiza.”

Mu caka 2009, David abatizwa, lero iye ndi ntumiki wakutumikira na mpainiya wa ndzidzi onsene. Maseze iye na mwanace wamamuna wa pyaka 15 ndiwo basi anamwaza mphangwa mu cisa ceneci, mu nthanda ya Bwinja ya 2012, anthu akukwana 60 a pacisa ceneci agumanika pa Cikumbuso ca kufa kwa Kristu cidacitwa mu Nyumba ya Umambo idamanga David cifupi na nyumba yace.