Munaadzindikira Thangwi Ya Misapo Yawo—Mphangwa izi zabuluswa mu Anuário das Testemunhas de Jeová de 2013
Tsamba 47, ndima 1 na 2—Afrika
“Mulungu Anatumikira Iwe Ngwamphambvu”
Nkazi unango anacemerwa Caro anakhala ku Uganda, atoma kupfundza Bhibhlya. Mudapita nthanda ibodzi, mamunace anacemerwa Martin, wakuti akhaphatisira pyaufiti atoma kuntcinga kakamwe. Martin alonga: “Na thangwi ya mabukhu ako, mizimu ya makolo nkhabe pitabve n’nyumba mwathu.” Iye akham’menya, pontho akhanthusa mu kulonga kuti angakhonda kusiya kupfundza Bhibhlya anamupha. Martin akhadasiyambo kutsalakana banjace. Caro apitiriza kukhala wakukhurudzika, akhagulisa masamba toera kuona kobiri, mbapitiriza kupfundza Bhibhlya. Mukupita kwa ndzidzi, pidaona iye kuti umaso wace ukhali pangozwi, Caro abuluka panyumba. Iye awangisira toera kutsalakana umaso wace. Mbwenye pidabva iye kuti anace akhaduwala, Caro akwata kobiri yakucepa ikhali na iye, mbagula mitombwe mbaenda kaphedza anace.
Mudapita ntsiku zingasi, mamunace Caro am’menyera ntokodzi mbampanga: “Mbapidakhala pyadidi kuti ubwerere kunyumba. Ndandzindikira kuti Mulungu anatumikira iwe ngwamphambvu, pontho iye ali na iwe. Ndaphata miyendo, phemba anthu anakupfundzisa Bhibhlya toera abwere kudzandipfundzisambo. Mwandimomwene, ndisafuna ndicinje umaso wanga.” Martin akhalonga undimomwene. Cincino, banjace iri yakuphatana na yakutsandzaya. Martin na Caro abatizwa pa nsonkhano wa gawo mu nthanda ya Malimwe ya 2012.
Tsamba 52, ndima 1 mpaka 6
‘Iye Andipasa Cakudya Cace na Capeu Cace’
Pa nsonkhano wa gawo wa 2010 ku Chile, Marcelo, wa pyaka 10 pyakubalwa, aona kuti mamuna unango akhali cifupi na iye nee akhali na bukhu.
Marcelo alonga na mai wace mwaciwerewere, “Iye nkhabe Bhibhlya.”
Mai wace alonga: “Ona naye pabodzi m’Bhibhlya yako.” Marcelo acita pyenepi. Pidatoma ndzidzi wakupuma, Marcelo apanga mai wace, “Iye nkhabe cakudya.” Mai wace aphemba kuti agawane cakudya cace na mamuna unoyu anacemerwa Victor. Marcelo ampasa sanduíche na khomitco ya xaya. Mu ndzidzi ukhadya Victor, Marcelo ampangiza malemba onsene a Bhibhlya akhakumbukira iye.
Pa ndzidzi wa khundu yakumaulo, dzuwa ikhapisa kakamwe. Marcelo alonga pontho na mai wace: “Iye nkhabe capeu.”
Mai wace antawira: “Mpase capeu cako.” Marcelo ampasa. Pakumala kwa programu, Marcelo na Victor apanganizana.
Pa nsonkhano wa gawo wa 2011, Marcelo azungulira mbuto ya nsonkhano toera kuona khala Victor abwera pontho. Mwakutsandzayisa, iye akhali penepo, cakudzumisa kakamwe ndi cakuti paulendo unoyu Victor akhadabvala garavata. Pidaona iye Marcelo, Victor alonga: “Ine ndiri pano lero thangwi ya mphale uyu. Caka cidamala, ndatambira ncemerero wa nsonkhano wa gawo mbandibwera. Mphale uyu aphatisira Bhibhlya yace pabodzi na ine, andipasa cakudya cace na capeu cace. Cincino ndikupfundza Bhibhlya!” Lero, Victor ndi m’mwazi mphangwa wakukhonda batizwa.”