BHIBHLIYOTEKA MU INTERNETI ya Torre de Vigia

ya Torre de Vigia

mwb16 Abril ya tsa. 3
Wangisani Anango Kubulukira M’mafala Anu Adidi

Umaso Wathu Wacikristu na Utumiki—Programu ya Misonkhano—2016

mwb16 Abril ya tsa. 3

MPFUMA ZA MAFALA A MULUNGU | YOBE 16-20

Wangisani Anango Kubulukira M’mafala Anu Adidi

Mafala a munthu anapereka uphungu asafunika kuwangisa anango

Yobe anentseka kakamwe na nyatwa, natenepa iye akhafuna ciphedzo na ciwangiso ca anango
Axamwali atatu a Yobe nee alonga cinthu toera kum’balangaza. Mbuto mwace, iwo ampambizira mbathimizira kutsukwala kwace

Mafala akuipa a Bhilidhadhe atsukwalisa kakamwe Yobe

Yobe aphemba Mulungu toera afe peno apungule nyatwa zace
Yobe akhaikha manyerezero ace ku cidikhiro cace cakulamuswa muli akufa mbapitiriza kupirira mwakukhulupirika

Elifazi akulonga na Yobe mu ndzidzi wakuti Bhilidhadhe na Zofari akuayang’ana

APAMBIZIRI A YOBE

Elifazi:

Panango ndi wa ku Temani n’dziko ya Edhomi. Temani asalongwa pa Yeremiya 49:7 ninga mbuto yaudziwisi wa Aedhomi
Ninga nkulu, pontho wakudziwika ninga ‘nyakubalangaza,’ Elifazi akhali wakutoma toera kulonga. Iye alonga katatu na alonga kakamwe kupiringana amuna anango awiri

Mafala akupambizira:

Apokanya umumphu wa Yobe na alonga kuti Mulungu nee asakhulupira atumiki ace (Yobe 4, 5)
Alonga kuti Yobe ndi wakudzikuza na wakuipa, pontho alonga kuti Yobe nee akhagopa Mulungu (Yobe 15)
Apambizira Yobe kuti ndi waumbirimi na wakusowa ulungami, pontho alonga kuti munthu nkhabe kuphatisirwa na Mulungu (Yobe 22)

Bhilidhadhe:

Wa dzindza ya Suwa. Panango iye akakhala kukhundu ya Nyandza ya Eufrate
Iye akhali waciwiri toera kulonga. Iye alonga katatu mafala akucepa na akudzidzida kakamwe kupiringana a Elifazi

Mafala akupambizira:

Alonga kuti ana a Yobe adawa na thangwi ineyi agwerwa na nyatwa, alongambo kuti Yobe nee akhakhulupira Mulungu (Yobe 8)
Alonga kuti Yobe akhacita pyakuipa (Yobe 18)
Alonga kuti umumphu wa munthu ndi wakusowa basa (Yobe 25)

Zofari:

Wa ku Naamati, panango kumulolo kwa Arabya
Iye akhali wacitatu toera kulonga, pontho akhali waukali kakamwe. Iye alonga kawiri basi

Mafala akupambizira:

Apambizira kuti Yobe akhalonga mafala akusowa basa na ampanga toera kusiya macitiro ace akuipa (Yobe 11)
Alonga kuti Yobe akhali wakuipa na akhakomerwa kucita madawo (Yobe 20)