Kuthimizira Maluso Athu Mu Utumiki​—Kuphedza Anyakupfundza Bhibhlya Toera Kuthambaruka Mpaka Kuperekeka na Kubatizwa

THANGWI YANJI MPHYAKUFUNIKA: Toera kukhala akutawirika kwa Yahova, anyakupfundza Bhibhlya asafunika kupereka umaso wawo kuna iye mbabatizwa. (1 Ped. 3:21) Ale anakhala maso mwakubverana na kuperekeka kwawo, asatambira citsidzikizo cauzimu. (Masal. 91:1, 2) Akristu asaperekeka kuna Yahova, tayu kuna munthu, basa peno nsoka unango. Natenepa, anyakupfundza asafunika kukulisa ufuni na kupereka takhuta kuna Mulungu.​—Arom. 14:7, 8.

TINACITA TANI PYENEPI:

• Nkati mwa pfundziro, dingani kuti mphangwa zinapfundza imwe zisapfundzisanji thangwi ya Yahova. Gomezerani kuti mphyakufunika kuleri Bhibhlya ntsiku zonsene na kucita phembero kuna Yahova ‘mwakukhonda phonya.’​—1 Ates. 5:17; Tya. 4:8

• Wangisani nyakupfundza wanu toera akhale na cifuno cakuperekeka na kubatizwa. Pontho, mphedzeni toera akhale na pifuno pinango pyauzimu, ninga kutawira pa misonkhano, peno kupereka umboni kuna anyakuendekana na andzace akubasa. Kumbukani kuti Yahova nee asakakamiza munthu toera kuntumikira. Kuperekeka ndi cisankhulo ca munthu paekha.​—Deut. 30:19, 20

• Wangisani nyakupfundza wanu toera kucita macinjo akufunika toera kukomeresa Yahova na kukhala wakuthema toera kubatizwa. (Mis. 27:11) Midzidzi inango munthu asakhala na makhaliro peno misambo inango yakunentsa toera kuicinja, panango asafuna kuphedzwa mwakubwereza-bwereza toera asiye makhaliro ace akale. (Aef. 4:22-24) Mpangizeni misolo yakuti “Bhibhlya Isacinja Umaso wa Anthu,” inagumanika mu revista ya Ncenjezi.

• Mpangeni kutsandzaya kunakhala na imwe thangwi yakutumikira Yahova.​—Iza. 48:17, 18