Khalani Dzololo Thangwi Kumala Kuli Cifupi

THANGWI YANJI NDI PYAKUFUNIKA: Mwakukhonda dembuka, pinthu pinafuna kucitika pinadzayesera cipapo cathu na kukhulupirika kwathu kuna Yahova. Nyatwa ikulu inadzatoma na kufudzwa kwa uphemberi wauthambi. (Mat. 24:21; Apok. 17:16, 17) Mu ndzidzi unoyu wakunentsa, panango tinadzamwaza mphangwa zakutonga. (Apok. 16:21) Ife tinadzapomokerwa na Goge wa Magoge. (Ezek. 38:10-12, 14-16) Toera kutsidzikiza atumiki ace, Yahova anadzatomesa “nkhondo inafuna kucitika pa ntsiku ikulu ya Mulungu Wamphambvu Zonsene.” (Apok. 16:14, 16) Toera kukhala na cipapo cakuwanga thangwi ya pinthu pinafuna kucitika ntsogolo, tisafunika kupitiriza kukhala akukhulupirika mu ndzidzi unayeserwa cikhulupiro cathu.

MUNACITA TANI PYENEPI:

• Khalani acipapo, pontho phedzerani midida yakulungama ya Yahova.—Iza. 5:20

• Pitirizani kulambira Yahova pabodzi na abale na alongo.—Aheb. 10:24, 25

• Bverani mwakucimbiza pitsogolero pinapereka gulu ya Yahova.—Aheb. 13:17

• Nyerezerani mwadidi njira idapulumusa Yahova atumiki ace nduli.—2 Ped. 2:9

• Citani phembero kuna Yahova, pontho nyindirani iye.—Masal. 112:7, 8

ONANI VIDHYU YA NSOLO WAKUTI PINAFUNA KUCITIKA NTSOGOLO PYAKUTI PINADZAPHEMBA CIPAPO, BULUKA PENEPO TAWIRANI MIBVUNDZO IYI:

• 

  Ndi mayesero api adathimbana na abale na alongo mu ndzidzi udagawiwa mpingo wawo?

• 

  Cipapo cinaphedza tani munthu toera kukhala wakubvera?

• 

  Thangwi yanji tinadzafunika kukhala acipapo pa nkhondo ya Armajedhoni?

• 

  Ndi citsandzo cipi ca m’Bhibhlya cakuti cinatiphedza toera kukhulupira kuti Yahova anatipulumusa?—2 Pya dziko. 20:1-24