Kutumikira Ninga Mpainiya

Ife tinakwanisa kuphatisira mwadidi mphambvu zathu tingakhazikisa pifuno pyauzimu. (1 Akor. 9:26) Pifuno pyauzimu pinatiphedza toera kuphatisira mwadidi ndzidzi wathu kumala kwa dziko ino mbakudzati fika. (Aef. 5:15, 16) Mu ndzidzi wakulambira kwanu kwa banja, imwe munakwanisa kukhazikisa pifuno toera kupikwanirisa mu caka cipswa ca basa. Toera kudziwa kuti munacita tani pyenepi, programu ino ya misonkhano iri na misolo yakuti inakuphedzani toera kunyerezera mwadidi pifuno pinafuna imwe kukhazikisa.—Tiya. 1:5.

Mwacitsandzo, imwe munakwanisa kubverana pabanja panu toera panango m’bodzi atome kutumikira ninga mpainiya wa ndzidzi onsene. Khala musanyerezera kuti nee munakwanisa maora anaphembwa, cedzani na apainiya akuti akhalimbo na manyerezero mabodzi ene. (Mis. 15:22) Peno munakwanisa kucemera mpainiya m’bodzi toera muncite mibvundzo pakulambira kwanu kwa banja. Buluka penepo lembani ndandanda ya midzidzi inafuna kubuluka imwe m’basa ya m’munda. Khala imwe mwatumikira kale ninga mpainiya, yeserani kuona khala munakwanisa kutumikira pontho ninga mpainiya.

Kodi alipo pabanja panu wakuti anakwanisa kutumikira ninga mpainiya wakuphedza mwezi ubodzi peno miyezi mizinji? Khala ungumi wanu nee uli mwadidi, panango munakwanisa kutumikira ninga mpainiya wakuphedza mukumwaza mphangwa mu ndzidzi wakucepa pa ntsiku. Khala imwe nee muli na ndzidzi toera kubuluka m’basa ya m’munda pakati pa sumana thangwi ya basa yanu peno thangwi ya xikola, panango munakwanisa kusankhula mwezi wakuti uli na firiyadu peno mwezi uli na masumana maxanu. Lembani miyezi inafuna kutumikira imwe ninga mpainiya wakuphedza na ntsiku zinafuna imwe kumwaza mphangwa.—Mis. 21:5.

ONANI VIDHYU YA NSOLO WAKUTI KHALANI ACIPAPO . . . APAINIYA, BULUKA PENEPO TAWIRANI MBVUNDZO UYU:

• Kodi citsandzo ca Mulongo Aamand cisatipfundzisanji thangwi ya citsalakano ca Yahova kuna ale anawangisira toera kutumikira ninga apainiya?