Phatisirani Khundu Yakutoma ya JW.ORG mu Utumiki Wanu

Pa khundu yakutoma ya saiti yathu pasagumanika misolo na mavidhyu toera kuphedza anthu a mitima yadidi akuti nee ndi Mboni za Yahova. (Mabasa 13:48) Kazinji kene misolo ineyi isalonga thangwi ya mphangwa, peno pinthu pinanyerezera anthu na pinacedza iwo.

Munaphatisira tani khundu yakutoma ya jw.org mu utumiki wanu?

• Pitani kazinji kene mu saiti ineyi. Onani mphangwa zipswa zinagumanika mwenemu, pontho onani kuti munaziphatisira tani toera kuphedza anthu adapangiza cifuno. (Toera kuona mphangwa zinango zidaikhwa cincino pa khundu yakutoma ya saiti yathu, pfinyani pa “Ver Mais.”) Kudziwa mphangwa zipswa zinagumanika mu saiti yathu kunakuphedzani toera kukhala na maonero mapswa toera kuaphatisira mu utumiki.

• Phatisirani misolo na mavidhyu anagumanika pa khundu yakutoma ya saiti yathu toera kutomesa makani. Misolo na mavidhyu anewa pinatiphedza toera kukhala na maonero a pinthu pinanyerezera anthu mucisa cathu.

• Pangizani anthu khundu yakutoma ya saiti yathu. Fokotozani mwacigwagwa misolo yakufunika kuna munthu anacedza na imwe, pontho mpangizeni kuti anapita tani mu saiti yathu.

• Tumizani link. Anthu anango nee asafuna kucedza na ife, mbwenye iwo asafuna kupita mu saiti yathu. Natenepa tumizirani munthu adapangiza cifuno link ya khundu yakutoma ya saiti yathu, peno link ya nsolo wakufunika kuna iye peno link ya vidhyu inagumanika mwenemu.