Citsalakano Cidapangizwa Kuna Anambwa Anga
NICK anakhala ku Oregon, Estados Unidos da América alemba: “Pakutoma kwa caka ca 2014, ine ndatoma kufamba na anambwa anga awiri mu nzinda ukhakhala ine. Kazinji kene ndikhagumanikana na Mboni za Yahova mu nzinda mbazikamwaza mphangwa na makarinya awo a mabukhu. Iwo akhabvala mwadidi, pontho akhamwanyika mwakutsandzaya anthu onsene akhapita na penepo.
“Mboni za Yahova nee zikhapangiza citsalakano basi ene kuna anthu, mbwenye zikhapangizambo citsalakano kuna anambwa anga. Ntsiku inango, Elaine, wakuti akhalimira dhuzi na karinya ya mabukhu, apasa anambwa anga awiri mabhulaxa. Kutomera ntsiku ineyi, mbuto zonsene zikhagumana ife karinya ya mabukhu anambwa anga akhaenda kuna Mboni za Yahova toera akapaswe mabhulaxa.
“Papita miyezi mingasi, anambwa anga akhakomerwa na mabhulaxa akhapaswa iwo, inembo ndikhakomerwa kucedza na Mboni za Yahova. Mbwenye ndikhanyinyirika toera kucedza nawo kazinji kene. Ine ndikhali na pyaka pyakubalwa pyakupiringana 70, mbwenye nee ndikhadziwa mwadidi pikhakhulupira Mboni za Yahova. Nakuti ndikhadatsukwaliswa na mauphemberi mazinji, ndaona kuti mphyadidi ndipfundze pyanga ndekhene Bhibhlya.
“Mu ndzidzi unoyu, ine ndaona Mboni za Yahova zinango m’mbuto zakusiyana-siyana za mu nzinda, zakuti zikhalimira dhuzi na makarinya awo. Iwo akhalimbo akudzolowereka. Ndzidzi onsene iwo akhatawira mibvundzo yanga mukuphatisira Bhibhlya, pontho pyenepi pyandicitisa kuanyindira kakamwe.
“Ntsiku inango, Elaine andibvundza: ‘Kodi imwe musakhulupira kuti pinyama ndi muoni wakubuluka kuna Mulungu?’ Ine ndatawira: ‘Inde, ndisakhulupira.’ Buluka penepo Elaine aleri lemba ya Izaiya 11:6-9. Kutomera ntsiku ineyi, ine ndikhafuna kupfundza Bhibhlya, mbwenye ndikhapitiriza kunyinyirika kutambira mabukhu a Mboni za Yahova.
“Mu ntsiku zidatowera, ine ndatsandzaya kakamwe kucedza na Elaine pabodzi na mamunace, Brent. Iwo andipanga toera ndileri bukhu ya Mateu mpaka Mabasa toera ndibvesese kuti pisabvekanji kukhala Nkristu wandimomwene. Natenepa ine ndacita pyenepi. Mwakukhonda dembuka ine ndatoma kupfundza Bhibhlya na Brent pabodzi na Elaine. Pyenepi pyacitika mu caka ca 2016.
“Masumana onsene ndikhakomerwa kakamwe na kupfundza Bhibhlya na kuenda ku misonkhano pa Nyumba ya Umambo. Ine ndatsandzaya kakamwe thangwi ya kudziwa undimomwene unagumanika m’Bhibhlya. Pakupita caka cibodzi, ine ndadzakhala wakubatizwa ninga Mboni wa Yahova. Cincino ndiri na pyaka 79 pyakubalwa, pontho ndisapereka takhuta kakamwe thangwi yakugumana uphemberi wandimomwene. Yahova andipasa nkhombo thangwi ya kunditawirisa kucita khundu ya atumiki ace a pa dziko yonsene yapantsi.”