Mibvundzo Inacitwa Na Anyakuleri

Thangwi yanji anyamalwa a Yezu akhanentseka na nkhani ya kusamba manja?

Yezu na anyakupfundzace akhalongwa mwakuipa na anyamalwa awo thangwi ya pinthu pyakusiyana-siyana, ibodzi mwa mathangwi anewa ndi nkhani ya kusamba manja. Mwambo wa Mose ukhapereka pitsogolero pyakusiyana-siyana thangwi ya pinthu pyakuti mbapidacitisa munthu kukhala wakukhonda cena, ninga utenda wakubuluka pinthu kumaso, matanya, kuphata manungo a munthu wakufa peno cinyama. Mwambo ukhalonga kuti toera munthu wakupswipa akhale pontho wakucena akhafunika kupereka ntsembe, kutsukwa peno kuthirirwa madzi​—Levitiko, kapitulu 11-15; Numero, kapitulu 19.

Apfundzisi Aciyuda akhadziwikambo ninga rabhi, iwo athimizira mitemo yawo pa Mwambo wa Mose. Bukhu inango isalonga kuti atsogoleri auphemberi Waciyuda akhazikisa miyambo inango ikhalonga pinthu pyakuti mbapidacitisa munthu kukhala wakupswipa, pontho munthu mbadacitisa tani anango kukhalambo akupswipa. Iwo akhazikisa mitemo ikhalonga kuti ndi pyombo pipi pyakuti mbapidakwanisa kupswipa na pinango pyakuti nkhabe kupswipa na maserimonya akhafunika kutowezerwa toera anthu akhale pontho akucena.

Anyamalwa a Yezu abvundza: ‘Thangwi yanji anyakupfundza ako asapwaza mwambo wa makolo athu mbadya nee kusamba manja?’ (Marko 7:5) Pidalonga Afarisi mafala anewa nee akhadzudzumika thangwi yakusowa unyai. Iwo akhadakhazikisa ntemo wakuti munthu mbadzati kudya akhafunika kuthirirwa madzi m’manja mwace ninga khundu ya maserimonya. Bukhu idalongwa mu ndima idamala isafokotoza kuti “iwo akhazikisambo pyombo pikhafunika kuphatisirwa toera kuthirira napyo madzi, ntundu wa madzi, munthu akhafunika kuthirira madzi na makhundu a manja akhafunika kutsukwa.”

Kodi Yezu akhaona tani mitemo ineyi idakhazikiswa na anthu? Iye apanga atsogoleri Aciyuda: ‘Izaiya alonga mwanyapantsi thangwi ya imwe ampfakafaka, ninga mudalemberwa ipyo kuti: “Mbumba iyi isandilemedza na mulomo basi, mbwenye mitima yawo iri kutali na ine [Yahova]. Ulambiri wawo ndi wapezi, thangwi asapfundzisa mitemo ya anthu.” Imwe musasiya matongero a Mulungu mbamutowezera miyambo ya anthu.’​—Marko 7:6-8.