Kodi Imwe Mukhapidziwa?

Kodi mu ndzidzi wakale munthu mbadabzwaladi nyakasongole m’munda mwa munthu unango?

MWAKUBVERANA na lemba ya Mateo 13:24-26, Yezu alonga: ‘Umambo wakudzulu usalandaniswa na munthu adabzwala mbeu zadidi m’munda mwace. Mu ndzidzi ukhagona anthu, abwera nyamalwa wace, mbabzwala nyakasongole pakati pa tirigu, mbaenda pyace. Mbwenye pidakula mbeu mbikhala na mimba penepo aonekambo nyakasongole.’ Anyakulemba anango asapenula khala nsangani unoyu usabverana na pyakucitika pyandimomwene, mbwenye mwakubverana na anyakulemba akale Aciroma, pinthu ninga pyenepi pikhacitika.

Disionaryo inango ya Bhibhlya isalonga kuti pantsi pa mwambo Waciroma, ukhali nseru kubzwala nyakasongole m’munda wa munthu unango basi ene toera kubwerezera uipi. Kufunika kwa mwambo unoyu kusapangiza kuti pyenepi pikhacitikadi. Nyakudziwisa unango anacemerwa Alastair Kerr afokotoza kuti mu caka 533 Kristu mbadamala kale kubalwa, Ntongi Waciroma anacemerwa Justiniano abulusa Bukhu yace. Bukhu ineyi ikhali cigwagwa ca mwambo Waciroma yakuti ikhali na mafala adalonga anyakudziwisa pya mwambo a mu pyaka 100-250 Kristu mbadamala kale kubalwa. Mwakubverana na Bukhu ineyi, m’bodzi wa anyakudziwisa anewa, anacemerwa Ulpian, alonga kuti pyenepi pyatoma kucitika kubulukira mu pyaka madzana mawiri. Nyakasongole akhabzwalwa m’munda mwa munthu unango, pyenepi pikhafudza pinthu pidalimwa m’munda. Bukhu ikhalonga pya ufulu ukhali na nyakulima toera akwanise kulipwa thangwi ya pidacitika.

Pinthu pyenepi pikhacitika mu Utongi wakale Waciroma, pyenepi pisapangiza kuti pidalonga Yezu pa nsangani wace pikhali pyandimomwene.