B1
Mphangwa za Bhibhlya
Yahova Mulungu athema kutonga. Iye asatonga mwadidi kakamwe. Pinthu pinafuna iye kuna anthu na dziko yapantsi pinadzacitika.
Pakumala kwa caka 4026 K.M.K. “Nyoka” yapokanya kuthema kwa Yahova ninga ntongi na kutonga kwace. Yahova apikira kuti mbadabweresa “dzindza” peno “mbeu” yakuti mbidanyedza nyoka, yakuti ndi Sathani. (Genesi 3: 1-5, 15, cidzindikiro) Mbwenye Yahova atawirisa kuti anthu atongane okha-okha mu ndzidzi ungasi, mbakatsogolerwa na nyoka. |
Caka 1943 K.M.K. Yahova apanga Abhrahamu kuti “dzindza” idapikirwa mbidakhala mʼbodzi wa anace.—Genesi 22:18. |
Pakumala kwa caka 1070 K.M.K. Yahova apasa cinyindiro Mambo Dhavidhi, pontho mukupita kwa ndzidzi apasambo cinyindiro Salomoni mwana wa Dhavidhi kuti “dzindza” idapikirwa mbidabalwa na mʼbodzi wa dzindza yawo.—2 Samweli 7:12, 16; 1 Amambo 9:3-5; Izaiya 9:6, 7. |
Caka 29 P.K.K. Yahova apangiza kuti Yezu ndi “dzindza” idapikirwa, wakuti mbadatonga ninga Mambo pa mpando waumambo wa Dhavidhi.—Agalata 3:16; Luka 1:31-33; 3:21, 22. |
Caka 33 P.K.K. Nyoka yakuti ndi Sathani aphekesa “dzindza” idapikirwa, pidacitisa iye kuti Yezu aphiwe. Yahova alamusa Yezu muli akufa toera akhale na umaso kudzulu, pontho atawira ntengo wa ntsembe ya umaso wace wakusowa madawo, mbacitisa kuti anthu a dzindza ya Adhamu alekererwe madawo, pontho akhale na umaso wakukhonda mala.—Genesi 3:15; Mabasa 2:32-36; 1 Akorinto15:21, 22. |
Caka 1914 P.K.K. peno ndzidzi ungasi pakumala kwa caka ceneci Yezu aponya pa dziko yapantsi nyoka yakuti ndi Sathani, mbancitisa kuti akhale pa dziko yapantsi mu ndzidzi wakucepa.—Apokalipse 12:7-9, 12. |
Kutsogolo Yezu anadzafungira Sathani mu pyaka 1.000; buluka penepo iye anadzanfudza, kwakuti mwakuphiphirisa anadzanyedza nsolo wace. Pinthu pikhafuna Yahova pakutoma kuna anthu na dziko yapantsi pinadzacitika, dzina yace inadzaceneswa, pontho pinadzaoneka pakweca kuti iye athema kutonga.—Apokalipse 20:1-3, 10; 21:3, 4. |