4 Kulekererana

PYENEPI PISABVEKANJI

Kulekerera kusabveka kuduwala pinthu pyakuipa pidacitirwa imwe na kukhonda kupikoya muntima. Kulekerera nee kusabveka kululupisa pinthu pidacitika peno kucita pinthu ninga nkhabepo cinthu cakuipa cidacitika.

PINALONGA BHIBHLYA: “Pitirizani kupirirana unango na ndzace mbamulekererana na ntima onsene, mwakukhonda tsalakana khala munthu ali na thangwi toera kutsukwala na pidacitirwa iye na ndzace.”—Akolose 3:13.

“Tingafuna munthu, nee tisayang’ana kakamwe pinthu pyakuipa pinacita iye, mbwenye tisaona pinthu pyadidi pinawangisira iye kucita.”—Aaron.

THANGWI YANJI KULEKERERANA M’BANJA NDI KWAKUFUNIKA

Kukoya muntima pyakuipa pidacitirwa imwe, kunakucitisani kuphatwa na utenda wakumanungo peno wa m’manyerezero. Kusiyapo pyenepi kunakwanisambo kugudjula banja yanu.

“Ntsiku ibodzi mamunanga anditsukwalisa mbaphemba kulekererwa. Pakutoma pyandinentsa kakamwe toera ndimulekerere, mbwenye mukupita kwa ndzidzi ndamulekerera. Buluka penepo ndapasika mulando thangwi yakucita pyenepi mwakudembuka. Pyenepi pyadzudzumisa banja yathu.” —Julia.

PINAFUNIKA IMWE KUCITA

BVUNDZIKANI

Ntsiku inafuna mamunanu peno nkazanu kucita peno kulonga cinthu cakuti munatsukwala naco, bvundzikani:

• ‘Kodi ndiri na mathangwi adidi toera kutsukwala?’

• ‘Kodi iye asafunikadi kuphemba kulekererwa thangwi ya pidacita iye peno ndipisiye pyanga?’

CEDZANI THANGWI YA MIBVUNDZO INATOWERA NA NDZANU WA M’BANJA

• Kazinji kene tisamala midzidzi mingasi toera kulekererana?

• Tisafunika kucitanji toera tilekererane mwakucimbiza?

PINTHU PINAFUNA KUKUPHEDZANI

• Mungatsukwala, lekani kunyerezera kuti mamunanu peno nkazanu akhafuna kukutsukwalisani.

• Wangisirani toera kulekerera ndzanu wa m’banja, mbamukumbuka kuti “tonsene tisadodoma kazinji kene.”—Tiyago 3:2.

“Pisakhala pyakukhonda nentsa kulekererana tonsene tingadawa, mbwenye pingaoneka ninga adadawa ndi m’bodzi pisanentsa kakamwe toera kulekerera. Pyenepi pingacitika tisafunika kucepeseka toera kutawira ndzathu wa m’banja angaphemba kulekererwa mbatimulekerera.”—Kimberly.

PINALONGA BHIBHLYA: “Malisa nseru mwakucimbiza.”—Mateu 5:25.